一月二十四日 -- 雜記

今日都有幾多野發生, 要記一記

1. 呀強生日快樂!~~~

2. 尋日睇Nana2, 有d失望; Nana1好睇d, 個故事係1度圍繞2個Nana的友情同埋佢地互相扶持, 再牽涉到佢地各自o既愛情, 我覺得好睇d, 歌亦都好聽d; Nana2個故事主線放左好多落小松奈奈度, 但係呢個女人的行為同思想我覺得有d不知所謂, 咩都唔識做野返工又唔掂, 剩係識發夢同埋想要被愛, 又因為空虛寂寞好容易同男人上床, 仲傷害左人地o既心, 加上大埋肚, 總之不知所謂; 成個第2集故事講佢多, 大崎娜娜果面同埋佢地2個之間o既友情都講得唔多,
歌又無上集咁好聽, 又無啦啦換左角色, 總之就無第一集咁好...講起換角色, 其他人都OK, 不過市川由衣做小松奈奈麻麻地, 唔係話佢唔靚, 但係佢唔夠可愛, 無之前果個咁似, 而且佢仲要扮可愛...總的來講, 能夠睇2個幾鐘都唔太有悶場, 都OK啦...不過有d失望同埋唔太建議入場睇咯。另外, 字幕完左都仲有少少少少野一個畫面睇下o既, 出字幕就唔好走住啦。

3. 我會轉工o既事係公司揚晒了, 不過都預左會有一日係揚晒o既, 無咩野。

4. 今日同民、Angel同Mari-an唱K, 雖然人少少, 又唔係狂唱勁歌, 但係都幾開心, 個氣氛幾融洽同開心~ 而且唔知時間過, 當民仔話已經11點9時, 真係完全唔覺的!

5. 今日另一大事就係終於confirm左呀馬返來!! 向好果方面諗, 又反正搵唔到工, 再加上自私d講句, 好野~~~!!

6. 唱K時發現左好多野, 包括: 有歌手係演唱會唱左d好正o既舊歌, 例如林憶蓮唱細水長流, 容祖兒唱絕戀...等等, 勁開心; 最開心就係有歌手係演唱會唱舊歌或者男歌手係演唱會唱金仔歌, 因為咁樣會令我有得唱呢! 又唔使俾人話, 尤其係d會笑人唱舊歌o既人。最攪笑係當有歌手演唱會唱時又話d歌好正...

7. 返屋企睇返個朋友評薛凱琪把聲, 係"感冒聲", 各位留意啦:d

8. 今日唱K勁抵, 原來做埋會員真係幾抵的; 平時有d優惠都係是但用一個, 但係今日用到2個優惠: 恆生信用card+生日免一個人頭費, 所以最終4個人唱連埋食個cheap buffet都係總共$300島, 好平! 要趁呢2個星期唱多d K!

9. 本來有d野心今晚夾硬來都出7篇文, 不過有d眼訓, 都係唔玩了; 反正我係話一日出7篇, 咁即係訓完起身第日收工食完飯返企後都寫都得啦 :D (雖然我自己不嬲計法都係以訓覺為過一日o既 ^o^)

10. 打字打得快, 但係個人o既反應同意識開始低; 成3點了, 其實個人係知道自己累但係唔係好訓得著, 去唔去訓下好呢? 我天日仲返唔返到工呢?

完