一月八日 -- Passengers

3/1(二) -- 收工懶得煮, 去左北角係功夫點心。

1. 是日當事人親身消息: 呀囡終於都XXOOYYKK啦~~~ 好事多磨, 但係實在磨得太耐了~~~ 我已經聽夠你話fnd姐、無野ge、我覺得唔係咯...etc; 雖然無話一定會到最後, 但起碼都面對過去、嘗試走出傷痛、行出左第一步, 恭喜呀~~~

4/1(三) -- 收工返天晉食飯。

2. 今日繼續係人地trip緊的時候稍稍跟進, 似乎暫時問題不大丫~~

3. 假期同之後呢幾日翻睇返幽遊白書, 同埋順便睇一次買返來但無睇過ge完全版; 有彩頁好正, 不過d翻譯好似怪怪地, 有d意思同舊版直頭唔同(而有d我知ge好明顯係舊版先o岩), 好想睇日文版確認下真正意思呢~~ btw, 情意結又好, 咩都好, 真係好好睇~~~

5/1(四) -- 收工返TKO懶煮飯去左食將中foodcourt。

6/1(五) -- 出WC早收工接埋C返佢娘家食飯; 佢細佬車我地返去。

7/1(六) -- 中午同ConnieLoLo食意粉, 之後食寶林join埋呀珊行山, 行左小夏威夷瀑布, 幾易行又幾靚喎; 之後係井欄樹搭返巴士出鑽石山散; 夜晚返TKO同Edith同佢男友食放題。

8/1(日) -- 8-10中山, 以我自己能力範圍內算打得唔錯, 不過呀馬同佢地某d人打已打到好無癮, 可能佢以後都唔join了; 下午去奧海城睇公司贊助戲Passengers; 夜晚係foodcourt食埋飯返企。

4. Passengers -- 之前睇左影評, 知道唔係科幻災難片, 而係太空科幻愛情片。劇情想講係果個情況下男主角同女主角佢地心理想法、變化, 所以就算有唔合理位(例如點會無預有意外、點會無spare冬眠裝置、點會得一張醫療床etc), 都無損佢想表達的意思。初段半個鐘男主獨腳戲, 交代成件事+營造佢孤獨+佢想整醒人掙扎, 其實時間已經好多, 不過感覺個掙扎鋪排同描述得唔夠入肉(當然如果大家腦補能力強係應該感受到的); 之後女主醒左講佢地相處同愛情, 成件事就好自然, 去得好順, 加上2個係型男索女, 無得輸; 後段開始有危機同佢地去解救、要犧牲等等, 雖然大路但都緊凑, 結局無大驚喜但總算完滿, 成個起承轉合做得好好。場境來講雖然一直係架船度, 但都幾豐富, 尤其係失重力泳池果幕, 做得好正; 辛苦d演員幾乎齋係佈景做戲了~~交戲來講其實男女主都好努力交戲, 但諗返其實佢地靚樣都幾乎夠殺 xDD Bartender大叔Michael Sheen老戲骨, 都係一大亮點。總的來講係好睇呢~~

來緊:
12/1(四) -- 公司春茗
18/1(三) -- URFS K?
完

2016回顧

今次好少野寫, 主要唔係無大事發生, 亦都唔係懶搵返個blog之前d野來睇, 而係覺得2016過得舒服, 最值得講就係呢一份安逸。

好感恩 -- 當然亦唔係希望因為咁而令到以後變得唔好啦 -- 呢一年身邊親人朋友似乎都過得好唔錯; 爸爸媽媽哥嫂呀B都健康, 呀C屋企人都係; 而朋友們基本上都無好大唔好事發生, 就算有野之後都係recover返, 所以今年真係好感恩。

自己來講, 今年身體狀態尚算唔錯, 工作都習慣到, 而最緊要係所以幾自由舒適咁生活(我知自己屋企狀況真係比好多人幸福好多), 雖然無以前咁密, 但係都keep住見下朋友; 可以唱下K(少左好多); 砌模型(完成多左); 打波(keep住做運動); 唔多煩惱野。

雖然知道無野係可以永遠, 而且以後一定會有好多改變, 會有唔好野發生, 但係未來就係未知, 未知就有挑戰亦都先會有趣, 最希望係以後身邊親友同埋自己可以健健康康開開心心簡簡單單咁生活就好了。

完

欣宜現象

其實想講一個現象好耐, 不過都要講少少欣宜先。

首先要利申, 遠係我未用FB仲係打好多blog時, 欣宜已經係眾矢之的, 咩死亡之吻、扮白雪公主果d比人鬧到暈, 果時我係blog度曾經表達過幾欣賞佢, 好記得係佢仲細未出道時有次跟佢呀媽係大show表演又唱又跳, 覺得佢雖然唔靚又肥, 但係表演得幾放, 又有自信, 幾好的。之後佢出來唱歌, 把聲都算唔錯; 所以雖然當時好多人都唔like佢, 反而我覺得佢OK。

時至今日, 近年愈來愈多人like佢, 仲有好多好支持佢, 話佢好OK。
Sorry, 我唔係為反而反, 但係我真係覺得麻麻地。

首先, 我已經講過好多次, 做一個藝人, "聲色藝"起碼都要有2樣野係OK。明顯地, 佢係唔靚亦唔索, 呢樣野係好主觀, 但係我相信你問大部份人佢靚唔靚, 你話普世價值都好咩都好, 佢係唔靚咯。藝, 佢近年主打都唱歌, 拍戲拍劇演技來講經驗唔多, 當年同事三分親都已經見佢係麻麻地, 但佢唔係主攻呢方面, 算啦。跳舞來講近年唔係好覺佢跳, "你瘦夠了嗎?"雖然MV有跳但甚少見live, 姑且當佢OK啦。而佢身為一個歌手最重要?"聲", sorry, 我覺得佢只係消費緊佢以前?"OK"而已, 無進步, 只要聽一聽live就知。佢把聲唔厚, 即係無練基本功; 佢唱d音出來唔穩, 都係無練好基本功。作為一個職業歌手, 又係果句, 唔係同朋友唱K唔係玩, 你出來搵錢架, 連唱都未達標咁叫OK?

佢有歌好聽(say好多人鐘意?"女神")係佢公司同作曲填詞人比好野佢, 同佢唱得好唔好並唔係好直接關係。我亦都唔理佢有無消費佢呀媽同佢d叔祖兄弟?關係, 每個人上位都有佢理由, 有人關照都係一個長處, 無問題。最大問題係, 佢真係未夠班。同佢同期或後輩(唔好用前輩屈佢啦), 是但JW或Gin Lee都唱得好過佢, 講埋林二汶果d就更加無得比。

再次聲明, 我唔係佢hater, 因為香港歌壇有好多好唔掂?歌手, 我只係覺得佢唔值得而家?稱讚姐。
好, 講完欣宜。以下先係重點。(又來, 有幾多人會睇到呢度? xDD)

**********

唔只係歌壇, 而家娛樂圈、網上紅人甚至政治人物, 我最唔鍾意就係sell"態度"ONLY。有態度無問題, 但可唔可以唔"只係sell態度"?
欣宜為例。好多人讚佢好努力好勤力, 同埋佢好有態度, 唔介意自己肥, 唔理普世審美標準。Well, 我都好appreciate佢呢幾樣野, but咁唔代表佢係一個唱得好?歌手喎?? 歌手唔係應該基本係唱得好咩?大家可以覺得佢好努力係個圈度打滾, 好努力比人見到佢努力, 佢好有自己style好有態度, 但係唱歌? NO。

係現實世界, 你出到來係唔夠能力就係唔夠能力。好似我咁打波明明無技術體能下降意識又唔好, 但係我每一次都好勤力, 我嘗試去做好d, 每次有力唔痛時都比盡可以?力, 快攻唔夠人快都會跑前, 回防追唔到都會追, 自問係場內最勤力果幾個, 但係無意思架喎, 球技不足就係不足, 所以就算無沒到手/輸波/比人話做得唔好我都無得話我好勤力就無野喎? 現實世界都係咁, 唔係勤力就大晒, 一定要有能力, 無論係實力又好擦鞋又好, 要上世一定要有某d實力?。

勤力係一種"態度", 仲有好多其他"態度"。
(唔想講太多政治了。)
呢個世界偏偏就愈來愈多人愈來愈睇唔到重點。只要擺出來?感度/取態係正確(或政治正確)或者合乎好多人心態, 就係o岩, 之後就算做好多唔o岩?野都會大把人支持。或者明明無能力, 不過擺出來有noise有say有態度就盲目被支持。咁真係做到野果d人又點呢? 係咪呢個世界就緊要就係"公關"、識做"廣告"呢? 而家眼見唔單止係人, 連食店甚至係賣其他野咩店都好, 最緊要係"知名度", "有格調", 質素係點? 無人care。只要出名, 就大把人跟住去買、上FB呃like。Well...

一口氣打左一堆字, 無心機再打落去同check了, 就咁。

完