幽遊白書真人版

作為幽遊白書鐵粉，出真人版劇集，就算網上同朋友點評都好，真係點都要睇一睇。

眾所9知我而家係好少睇劇/動畫/片類嘅，因為實在無乜機會可以坐定定睇，而睇呢d時間太fix，相對於我睇字/書類算快來講，係晒好多時間。

趁住聖誕假期睇晒5集，總的來講，我覺得係OK的。

首先講下劇情。預左會大改，我覺得係有限資源下已經算改得合理，將漫畫本來前後幾個故事合埋一齊，算合得合理。都預左會cut好多，尤其要用特技整d妖怪樣出來應該好貴，所以cut左四聖獸篇都預左。同埋d齋打無劇情(即係暗黑武術大會)都係應該cut嘅。不過由於實在cut得太多野(i.e.四聖獸篇+幻海弟子選拔篇+暗黑武術大會篇)，無晒幾個主角之間友情嘅鋪墊同埋幽助同幻海之間嘅師徒之情，呢d真係爭好多，最難接受。

另一樣被詬病嘅當然就係造型。d人物可能本身動漫畫真係太靚，轉到來真人真係好難carry。但難carry還難carry，有幾個真係特別唔掂。

幽助 -- 我覺得算幾好。都唔醜樣，做到少少痞痞嘅感覺，不過其實可以再爛多少少。我覺得係劇情所限。

桑原 -- 幾型。相對於主角要擺下d型樣，佢個角色無乜呢個包袱反而做得放少少。

藏馬 -- 睇過演員原樣其實都唔差，但做藏馬個樣就真係好唔得...戲都麻麻地...

飛影 -- 傲嬌+中二病始祖，由於戲份唔多，所以無乜發揮。而個演員個表情都係keep住痾屎唔出咁...

螢子 -- 相對其他幾個女角叫幾靚女。

牡丹 -- 呢個係眾矢之的...個樣真係唔得。佢想做到動畫入面咁少少趣怪，但又唔夠放，又唔多戲份，演出來不倫不類...

溫子 -- 幽助老母係其中一個亮點。除左幾靚之外，係好少量嘅戲入面都發揮得好。

小閻王 -- 算幾靚仔，又多出場，但就無乜特別覺得好。唔知點解覺得佢個樣似陳柏宇。

雪菜 -- 靚就唔多靚架啦，最大問題有幾下佢笑我覺得佢奸奸地...

幻海 -- 唔識講。同動漫好唔同。不過如果係呀婆的話真係係咁又真係可能差不多，唔識講。

左京 -- 估唔到搵稻桓吾郎做，又幾OK。如果佢可以再做得淡然少少會更正。可惜唔係大爆炸死。

戶愚呂兄、弟、鴉、武威、剛鬼...etc敵角 -- 無論做型定各方面，敵角都好好，既還原又有返個人特色，仲吸引過主角們。

全劇最要讚嘅就一定係動作同特技。係打得好睇，動作流麗順暢，速度感擊中感都好強，實在好過某d武俠劇齋擺pose果d好多好多。

少少總結。

我覺得劇情刪減個定位有少少尷尬。如果係fans向，就cut得都幾多。但係如果唔係fans向，d人物之間嘅羈絆刻畫真係唔係好夠。

自己一向係"向好方向"果面睇嘅人，儘量會去睇返"製作人們想呈現咩比我地睇"，我覺得係有限嘅篇幅同budget(應該?)來講，已經算做得好好了。

其實以佢呢個表達方式，我覺得仙水篇好啱拍做真人版。希望而家呢套5集收視OK，Netflix肯落多d本去拍仙水篇啦~~

十二月二十六日 -- 聖誕

18/12(一) -- Team lunch; 臨時拿左下午假，去左SSP行之後去In's Point同果欄。夜晚返企C煮，呀媽都係度食埋先返去。

19/12(二) -- 出site收工返去夜晚C煮。

20/12(三) -- 晏晝MA早走，夜晚C煮。

1。今晚拿左棉被出來。啱啱好好彩拿，好凍。

21/12(四) -- 同事X'mas Party; 下午拿假TKW。夜晚同Penny食飯，ConnieLoLo臨時join埋。

22/12(五) -- 早放3點。收工幫Edf交收之後返企，夜晚入西貢同C屋企人BBQ做冬。舅父車返我地返來。

2。全日都攰同頭重重。

23/12(六) -- 本來約左悉悉一家，不過Trista發燒cancel。中午過天晉食飯，之後我好唔舒服恰左，C幫呀媽執野。4點零出去3個一齊排醫生。睇完醫生買外賣返企食，好早訓。

3。睇完鹿鼎記。新修版金庸完全制霸。鹿鼎記都無乜好講，作為金庸長篇小說收爐之作，大家都知好唔"武俠"，我亦唔多講了。其實成個故事睇落去相當流暢，睇住主角係幾方之間游走而又可以無事得來不斷做到野，雖然成日話佢不學無術，其實佢真係好勁。反應快，決斷準，落手狠，絕對唔係話行運就可以達成嘅成就。不過人就真係仆街少少...好彩佢係義氣上都算係守得幾嚴，兩邊不是人但佢都係真心唔想害兩邊嘅人嘅，唯一係刺多隆果下，雖說係為左自己命仔，又話佢流眼淚，最後多隆仲死唔去，不過我覺得同劍心斬張果下一樣，個開關係開左就係開左，就算對方無死，果下都係想殺對方嘅。

24/12(日) -- 朝早打波天晉8-10，食左藥個人好浮，打完同DerekBosco食野再買野返去，我沖涼再恰下; 下午Rita帶女來玩，夜晚佢老公來join一齊食飯。

25/12(一) -- 中午娟源來一齊食野，下午係屋企吹下水同B玩ringfit到4點幾B訓，B6點島起身一齊去尚德食埋晚飯走。我同源係街兜左陣傾多陣計。

4。睇左幽白真人版4集，其實都唔差嘅。

26/12(二) -- 朝早起身入康城食早餐同睇戲(Wish)，之後上天晉幫呀媽執野。下晏係天晉恰左下，7點島走，買外賣返去食。

5。Wish -- 兒童向動畫。可能睇廣東話版所以d歌可能比英文詞爭d。劇情其實幾普通。背後引申嘅野係究竟自由意志重要定係有個好嘅well-planned獨裁者好d? 不過最後講到個魔法師比邪惡嘅野入侵左，將佢嘅邪惡"合理化"，所以變得無左討論價值了。其實現實世界無論係邊種政權，普通人嘅生活都係不知不覺咁被規範左係頂上果班政客同有錢人嘅影響之下，大家都係活係"佢地想你如何生活"嘅生活之下，只不過係做唔同種類嘅豬罷了。

6。今晚睇埋幽白第五集。小心得另開一篇講罷。

來緊:

1/1(一) -- 中同lunch

完