又睇完新修版倚天屠龍記，少少讀後感。
講下劇情先。
感覺上呢部似係集之前幾部嘅大成。劇情好豐富，主線好清楚，有伏線，各個正反派人物塑造好清晰又特別，不過主角嘅成長雖然細個多災多難，但佢九陽神功一練完就差不多無敵，之後再加埋乾坤大挪移太極拳同聖火令神功其實都只係bonus，太勁。都幾同意佢武功應該勁過郭靖同楊過。雖然係咁，總算之後打金剛伏魔圈都叫係有理由地覺得難，同埋最後大佬成崑係由金毛獅王來打，有返d睇頭。
全書入面最精彩一段，個人覺得雖然六大派圍攻光明頂、萬安寺救中原武林人仕、少林寺屠師大會嘅格局都好大又打得勁秋，但最鍾意反而係張無忌同獅王同四條女同一條船果一段，真係玩野玩到盡，人人心中都有唔同感受，又勁串張無忌，佢尤其老尷。呢段我覺得真係神來之筆。
另一度幾得意嘅係張無忌答應趙敏做三件事，成件事鋪排得好好，第二件事其實都係故事一大轉折，而最後第三件事又承接張無忌答應周芷若嘅一件事，感覺條友真係幾無主見無限loop xDD
講下人物先。
張無忌 -- 好多其他評論甚至金庸自己都講過，佢係一個好人，好少去記人地嘅壞處，胸襟廣闊，係一個好好嘅朋友。不過個人無乜主見，隨波逐流，並唔係做大事嘅人。呢d都無問題，最大問題係其實佢比起楊過其實仲渣少少。楊過(後生)雖然都經常撩人，不過佢自己諗諗下都會覺得唔妥，識得收，只不過之後人地已經失控咁不能自拔，而佢自己亦由頭到尾都好明顯愛小龍女。但張無忌就唔係咯，四個都係撩，四個都鍾意，又攬又錫又個個都唔捨得，仲發夢四個一齊要晒 xDDD 雖然係(男)人之常情，不過佢做埋出來，又個個都有承諾，真係有d渣。
趙敏周芷若小昭蛛兒就唔多講了，多年來大把人討論過，大同小異。
另外光明左右使四大護教法王等等都係塑造好成功嘅人物，唔使多提了。
張三丰同武當七俠個人覺得營造得好好，好大師同大俠風範，各有性格特色，幾乎個個都鍾意。(比起全真七子實在正太多) 張三丰果種胸襟同對所謂嘅正邪睇法亦都係金庸小說前輩高手入面少有嘅。
滅絕其實用返佢嘅角度去睇返，佢係佢一直好忠於自己嘅想法同理念。雖然佢正邪之念太過唔識變通，但佢護已護派、除魔抗元、為左心中大義可以犧牲任何野，其實個人係好勁同型嘅。雖然佢令人覺得乞人憎，但真係一個寫得好成功嘅人物。不得不提，當年台灣馬景濤版入面，張冰玉做嘅滅絕，真係令人好深刻，而且有d陰影添。
作為敵方boss級人馬嘅玄冥二老同埋成崑，比起神鵰嘅金輪法王實在成功好多。金輪雖然講到好勁，但係做嘅野又唔夠大器，戰績又麻麻，性格其實都唔突出。玄冥二老起碼都有唔少描述，亦都真係嬴到唔少書中好手。成崑就更厲害，基本上書入面發生嘅好多事端其實都係佢攪出來，而佢武功都係好勁嘅。
渡字輩三僧其實我覺得一般。講到佢地得道高僧咁，但人地入左攻擊範圍又幾唔留情咁打人。講胸襟又會將之前人地做嘅野算帳。之後奇奇怪怪又渡化左獅王，唔知想點。
不得不提少少，王難姑呢d真係阻礙老公發展嘅垃圾女人，而胡青牛則九叔得過份，兩個人物都好麻麻。
短短地寫少少算了。
到頭這一身，難逃這一日。百歲光陰，七十者稀。急急流年，滔滔逝水。
完
