狗年好開始

狗年即將來臨
返鄉下過年, 好耐冇試過了, 應該會好熱鬧
其實都係有少少朦查查咁, 個個都叫我返就返

放返個好假返來, 希望有工見, 見完有得做
咁就真係好開始了

想轉變環境, 仲有咩可以轉變呢?
最有可能都係"工"而已...
衣? 食? 住? 行? 家? 女? 學業?
冇咩好改到了

所以, 希望都放晒係工度了

完

轉工

一路以來, 都有好多理由唔轉工

幾年之前, 份糧唔差, 穩定, 放工時間準時, 時間可以讀書, 做野唔算辛苦, 外面o既工唔好做又低人工, 等拿埋份gratuity...etc
而家已經唔同晒了, 減左2次人工, 外面人工高返d, 留係度落去冇前途, 冇得長做, 轉唔到長工, 悶, d工作愈來愈煩愈來愈廢...etc
所以呢排好想轉工, 好冇心機繼續留係度, 睇住愈來愈多同事都走, 自己都經常性提住要走

睇來係時候轉下環境了, 希望前呀頭介紹果份請啦~

完

投訴

明顯地, 係呢個世界上唔開心o既人係多過開心o既
因此, 唔開心o既野係會容易傳染過開心o既野

香港尤其係一個唔開心o既城市
人人唔開心, 老闆狂玩狗野, 大量打工仔被刻薄長期唔開心
做d野唔多唔少都影響到身邊o既人, 家人, 朋友...etc
呢d人又係打工仔...一路咁散開去
公眾人物, 明星, 傳媒...等等亦都不停渲染唔好o既野
因為夠慘, 夠爛, 所以容易印象深刻
睇新聞, 好野唔見得有幾多人讚, 衰野就煲到盡
流行曲亦一樣, 十首歌有八首都係失戀唔開心分手想死冇好收場

係個咁o既大氣候入面, 只會使呢個情況惡性循環落去
點解要咁悲呢? 點解唔可以以好果方面去面對呢?
係咪有少少野都要投訴呢?
希望我自己係我身邊o既人入面, 係屬於俾到"光"人地o既人, 俾到"開心"人地o既人

話時話, 點解我又要係度投訴呢個世界呢?

完

莫名其妙

平時總會有唔同o既心情, 開心, 唔開心, down, 有/冇mood
呢排好奇怪: 我完全唔知自己有咩mood/開唔開心/做咩野

究竟係咩原因呢?
因為就來返鄉下? 因為好想好想轉工? 因為生活愈來愈無聊?
唔知, 唔理

仲有3日就放假了

話時話, 朋友考完試了, 唔知佢去左旅行未呢?

完

戲評 -- 一蚊雞保鑣

今天下午很空閒, 得閒冇事做半睇半聽咁睇左TVB下午播ｏ既"一蚊雞保鑣"
記得數年前都有見到戲ｏ既宣傳, 不過應該票房都唔會好好

戲中男女主角係黃子華同郭羨妮
故事係講咩唔係度講啦, 都OK有意思同有時都幾好笑ｏ既
不過個人觀感, 並唔係太"電影", 基本上d場景, 對白, 動作各方面都似係適合做"舞台劇"多過似"電影"
如果走入戲院睇可能會有人媽媽聲出返來
反而如果係電視劇或者舞台劇會唔錯呢~

入面隨左２位主角以外ｏ既角色, 除左Benz雄苑仔同羅蘭姐(出得唔多)之外
另外幾位出得幾多ｏ既配角都係唔識ｏ既
不過大家(包括主角)都做得幾好

總的來講, 係電視睇下都幾好啦

另, 戲中插曲郭羨妮主唱ｏ既"盲目支持"幾好聽, 幾有感情, 亦好ｏ岩個scene
試下搵唔搵到mp3先

完

杏仁豆腐花

同我熟o既朋友好多應該都知道, 亦曾經俾我帶過去大埔道"百吉蔗汁"食"杏仁豆腐花"

雖然係叫"豆腐花", 但係其實食落一ｄ都唔似一般ｏ既豆腐花, 有ｄ　Jelly同大菜糕混合ｏ既感覺
呢種"豆腐花"暫時除左呢度唔知邊度有得食了
自從讀City果時呀Mak第一次帶我去食之後都好喜歡食, 尤其係係夏天好熱ｏ既時候, 行到來身水身汗, 坐低一陣食個豆腐花, 成個人即時涼晒! 正！

昨晚與朋友食飯, 食完飯又去食"杏仁豆腐花", 老闆同我講做埋今年唔做了（仔女都唔會做)!!
即係仲有一個星期就唔做! 當堂個人呆一呆
吓?! 唔係呀嘛, 即係以後都冇得食?
本來成日都幾開心, 臨尾聽到個消息即時down左一down...

回程返屋企時都諗左好多野, 一來可惜"百吉蔗汁"唔做了(其實係好事來, 老闆退休光榮結業享清福), 二來諗到, 好多野一過左去就返唔到轉頭, 親人朋友身體時間...etc...etc...
真係要好好珍惜身邊ｏ既一切呀!!
來緊呢個星期, 一定要再去食"杏仁豆腐花"!!

完