1. 一早都話, 發生左呢件事, 心底o既天秤就會崩潰; 就算自己無野, 身邊o既朋友(不論了唔了解我o既)都會有好唔同o既意見, 猜想同反應; 如果我之前選擇扮無野, 繼續咁落去, 唔出聲, 可能唔會有咁多事發生, 可能無呢排咁o既心情, 可能大家都覺得無野; 我要相安無事唔俾大家小o既我一早就唔會做咁多野, 我亦預期左發生呢件事會有咁o既結果; 不過我呃唔到自己o既感覺, 問題一日唔解決都無好日子過, 解決唔到問題就唯有解決第二d野; 因此, 呢樣並唔係一朝一夕突然發生o既野來的; 我很煩, 但我很冷靜。
2. 親人、死黨、朋友、同事、唔熟o既人等都為呢件事好多唔同方面o既野有好多意見, 不論係msn電話blog度等等, 都有好多唔同意見, 我真係好多謝大家。不論意見係正方反方支持我插我小我都好, 我都知大家都係真心的, 都係當我朋友的, 所以我完全唔會介意, 而且亦都好多謝大家。就算有d人知得唔清楚, 有d人睇錯左意會錯左, 有d人唔支持我都好, 我都唔會對大家有負面o既諗法, 而以後我亦會繼續好似以前咁對大家, 大家對我點我就控制唔到咁多了。
3. 本來今日無羽毛球打, 要去Spenser屋企玩貓貓, 不過由於Spenser突然有野情況不妙, 而且個樣又好累, 因此雖然佢話無所謂, 但係我都話唔去了, 下次先; 希望佢無事啦。
4. 好耐無試過short week+無野做, 一定一定要全日hea下抖下! 要開工!!
5. 對她, 我希望(妄想)以後可以好像朋友一樣; 不過如果那樣只會帶來大家的幻想/不便/拖泥帶水的感覺, 那就不如不要...
6. 匿名人: 我驚我估錯, 可唔可以俾平時叫你個名o既字頭, 或者少少少少hints得我知o既, 等我confirm你係邊個呢?
7. 星期六抖, 星期日就緊係打波啦! 好耐無打籃球! 游水其實真係有興趣, 但係呢期真係爭少少...而且大家愈講, 我就會對果樣野有愈大o既負面感覺...
8. 好累, 身心俱疲...如果我係一個徹底o既衰人就好了...
9. 個人自由左, 反而開始覺得可以返屋企多左, 唔使成日去街; 等於成日禁住細路仔打機, 就反而成日想打; 但係成日俾佢打, 佢又反而未必成日打...而且唔使成日搵朋友"叉電", 回復精神力。
10. 其實經過左咁多野, 真係突然唔係好想搵朋友, 唔係好想見人; 雖然不嬲都知, 我了解o既人多過人了解我o既...不過我o既角色而家實在太亂了, 我要冷靜下。現在o既我好似咩都無晒咁...
11. 我強調, 自己從來都無話我完全無錯...
12. 好想有一個人可以救贖我...
**********
來緊:
23/7(一) -- 同S食飯講清楚?
26/7(四) -- 同馬生日安睇Transformer
27/7(五) -- MayChan一個月一度o既三文魚刺身! 必食! 可能去貓企一齊食。
完
2007年7月21日 星期六
七月二十日 -- 雜記
2007年7月20日 星期五
七月十九日 -- 雜記
1. 今天公司辦事處有個主任無啦啦入來發癲, 不過我覺得我自己lunch time, 仲要lunch果段時間係無人工的, 我要做咩唔關你事; 我地係唔係客都唔想講, 我只係知道我地幫佢食左唔少一路留落來o既屎; 既然係咁, 有d咩以後都撐行佢咯。
2. 收工同同事唱K! 連續幾日返屋企又早訓, 今日緊係想cher行d啦~~ 同PizzaSpenserIris凱琪唱K, 之前同過大家唱, 係未同過Iris唱; Iris唱K好不錯呢, 明顯係唱慣o既人啦~~仲要同我一樣係舊歌人, 哇卡卡; 最犀利係佢會唱"你最珍貴", 實在太厲害, 太滿足了。另外, 原來格蘭中心仍然係無限時間, 果然係主場呀。再另外, 由於Joyce七日內生日, 減左個人頭費, 抵呢。
3. 10點幾凱琪住TuenMun要走先, 因此大家都有去意, 叫埋單到真係走都只係10點9, 有d俾預期早; 之後除左Joyce(凱琪)之外4個人一齊搭MTR走人, 11點幾返到企, 早。明明前幾日都早訓, 不過走時有d頭赤。
4. 昨晚早訓, 今朝一早醒, 好早返到公司, 上去幾個人都話得的"合記"買沙爹牛肉麵做早餐; 麵+飽+凍飲, 好耐無食過咁大份早餐; 個麵OK啦, 又唔係真係話好好食; 由於早上太飽, lunch只係食左3粒牛肉丸就飽了。
5. 明天去Spenser屋企玩佢2隻新o既貓貓, 好野~ 星期六short week, 可以玩得盡興d, 不過人地屋企, 始終都無得夜o既。
6. 係社會上, 男性一方責任一向較大, 從來都不是平等的; 不過有好多野, 都係應該男性孭o既, 咁咪孭咯。
7. 我拖泥帶水嗎? 由真正發生果日到而家過左好耐了嗎? 咁大件事真係可以係短短幾個星期就下定決心嗎? 係咪要涼薄d, 一有問題發生就好快解決就叫好? 唔可以考慮一下? 唔可以感受一下自己o既心意? 我咁樣叫逃避嗎? 我一早知好多人諗左好多難聽o既說話啦, 咁又點呢?
8. 我不需要伴侶嗎? 我都覺得我自己不似一個適合拍拖o既人, 所以我先更加會係度諗究竟自己想點。建立同付出係雙方的, 拍拖亦當然一定係想結婚, 但係係問題發生o既時候, 究竟係邊個諗住修補先呢? 係邊個作出好多努力而不得解決其問題呢?
9. 自己絕對唔係一個兒戲o既人, 從來都諗得好長遠, 短視o既究竟係邊個? 我係完全單方面有問題我係逃避我係固執我係無維繫我係衰人的話就唔係係咁, 事情就好簡單了。
10. 自己係好坦白o既人, 我自己o既野從來都係9成9俾得人知o既野, 但係當一d牽涉到唔係只係自己o既野時, 當然唔會隨便話人知(自己唔介意, 唔代表人地唔介意)。係全部家人朋友等等咩事都以為無發生過野時, 究竟發生過d咩野, 大家係唔會知的, 有好多問題亦唔係突然發生; 因此好多人可能覺得好突然(某匿名亦提到:一下子就話唔得), 或者有好多想像o既野, 或者猜度、估計o既野; 係blog度唔想講一d一面之詞o既野, 大家知道d唔知道d我都無所謂, 亦都唔想解釋咁多, 反正我都唔介意背負d咩野, 總之大家要點諗, 舒服o既就好; 已經不想再同任何人交代, 有太多野不足為外人道了; 其實時間唔係過左好耐, 我一向亦唔想拖, 而既然大家都覺得我拖又或者覺得點o既, 咁我就唔再拖咯。
完
2007年7月18日 星期三
七月十八日 -- 雜記
1. 連續第3日收工返企! 天日同同事唱K, yeah! 未同過Iris唱K, 佢都係舊歌人, 應該會好玩呢~ 而且佢仲話一定要唱"你最珍貴", 仲以為會成絕唱, 正呀~~
2. 今晚想開工, 希望打完野會砌野! (我估未必得...星期六或日要開工!)
3. 砌埋剩返果2隻水中三寶先定Spenser俾我果隻紅渣先呢?
4. 匿名人可以俾d hints係邊位嗎?
5. 上返屋企個磅, 雖然個數唔準, 但係重左定輕左應該都o岩o既; 結果係輕左! yeah~~
6. 不嬲對腳都係弱點, 成日都痛, 一行得多就痛(但係以前都係成日行, 仲行好遠路都行); 呢排成日行樓, 又無lift, 居然唔痛! 對腳好似強左咁, 雖然都累, 但係行極都唔太痛, 太好了。
7. 好眼訓...都係去訓...
暫完
2007年7月17日 星期二
七月十七日 -- 雜記
1. 第二日收工返企, 天日都會係; 本來約左民出下來食飯或者來我企打機, 不過佢天日返新工, 又無咩特別野攪, 所以都係唔出來了, 而且自己都有少少唔想出來見人; 另, 民仔返新工加油。
2. 好少發夢o既我, 前晚居然發夢, 仲要係綺夢, 而且對方係S...不過夢中好乖, 未做d咩野...
3. 次次日頭諗到好多野要打, 夜晚返到企就咩都唔記得晒
4. 電視遙控無電可以換, 個control仲係手; 遙控車壞左仲可以去執返; 風箏斷左就已經係好遠o既地方...
5. 最近見到好多ChoroQ車仔都幾特別同平, 去買返d先。
6. 真係諗唔起有咩要打, 係咁多
7. 果日去呀進屋企, copy左堆mp3, 有雨音熏, 有麥兜, 最正係林子祥精選, 好多歌都好正。
最愛是誰 詞：潘源良 唱：林子祥
在世間尋覓愛侶
尋獲了但求共聚
然而共處半生都過去
我偏偏又後悔
別了他原為了你
留住了愛亦留住了罪
誰料伴你的心今已碎
卻有他在夢裡
為何離別了 卻願再相隨
為何能共對 又平淡似水
問如何下去 為何猜不對
何謂愛 其實最愛只有誰
任每天如霧過去
沉默裡任寒風吹
誰人是我一生中最愛
答案可是絕對
為何離別了 卻願再相隨
為何能共對 又平淡似水
問如何下去 為何猜不對
何謂愛
誰讓我找到愛的證據
2007年7月16日 星期一
七月十六日 -- 雜記
1. 收工返企, 好耐無返企食飯咁...
次次都係, 一早返企早沖完涼, 就好早累同想訓...應該會好早訓, 打完就訓。
2. 唔記得講, 上星期Mario Kart打到三星了。
3. 劉關張好似愈來愈吸引。另外呀進同佢細佬好識幫d模型扭蛋擺pose, 好掂, 學唔來...
4. 我都話溝通困難啦...幾好都無用...愈好愈辛苦...
5. 好熱, 好熱, 好熱...好累...呢排好似成日收貨, 吸左好多塵, 所以喉嚨成日有dd咳; d VO, EOT同Cert單好似得我最熟, 速度差好多倍, 所以到最後好似9成都係我攪咁 @@, 好彩d每星期的政務(refer/email/scan...etc)o既野team leader攪晒, 只要唔使再跟其他人d手尾已經好好了。
6. 其實馬生唱歌幾好聽, 唱Leon的歌時仲有d似添; Connie把聲好溫柔。
7. 上星期拿返張信用卡後, 今日拿埋張新o既ATM卡, 仲將Visa的密碼改返做記得的。終於唔使靠向父母拿錢度日, 仲一次過出返糧+還錢+找埋卡數...etc, 好野~~! 要去好好地使返次錢獎下自己先!
8. 白田有人跳樓...再次感受到原來人好化學, 亦都原來係咁接近死亡。
9. 本來早返屋企諗住打返好多野, 不過點知hea hea下都係無打...
完
2007年7月15日 星期日
七月十五日 -- 雜記/遊記
好耐無試過郊遊, 呢d一定要成班人星期六/日去o既活動, 好少可去到, 而且仲要係咁熱o既夏天。
話說今日約左八婆, 呀B, 呀進同Esther出去玩。約左12點係元朗差館等, 不過我遲左少少出KT, 後尾轉左12.30; 要Esther等有d唔好意思添; 同Esther一齊搭268C去到元朗, 未見其他人(到果時12.15島), 去隔離街見到o既一間玩具店睇野, d模型貴貴地, 不過見到新一套高達BB戰士扭蛋又出左! 緊係要扭下啦! 一扭就扭到最想要果隻! 強人! 太好了~~ 又係時候要d朋友扭野比我了(好鐘意睇下d朋友會扭到咩比我 :P)。之後去左元朗廣場等齊人, 係M記等時大家拿左NDS出來打, 當然係打遍天下無敵手啦, 呵呵; 人齊之後就開始旅程; 搭巴士入流浮山, 入到去2點, 先食野; 由於唔知邊間好, 是但入左間類似酒家o既野, 真係有d奶野, d野食普通, 又唔平, 服務仲麻麻地...算吧啦。
食完野, 搭Van仔入去一個好偏僻o既地方, 睇傳單原來有個好大o既場地, 有好多小動物俾人領養; 不過原來要預約o既, 我地咁遠水路去到都唔俾入...慘。又熱又行咁, 流超多汗, 入唔到果度, 就順便行出去海邊睇下啦, 見到沙灘外o既地方好似係泥沼來o既, 見到有人係度挖蠔~ 仲近距離見到好多蟹仔同彈途魚添! 第一次見到真o既彈途魚呀~ 望左一輪行返出去搭Van, 去下一個地點, 又係山卡拉地方, 叫雲浮仙觀; 未去之前都唔知咩來o既, 原來係一個俾人放先人靈位o既地方...其實都無咩好睇...地方幾大, 同行行下好熱; 原本諗住行過一片草地過去快d, 點知見到條蛇! 大家都唔敢再行草地, 唯有兜路行石屎車路過; 到左行左一圈之後就走, 中途有個小型湖, 有個庭係中間, 見到有人餵魚, 行埋去睇, 嘩! 有好多好多鯉魚! 好大條, 過百條係水面搶野食! 其實個場面幾得人驚, d魚係度搶野食, 個口又大, 雖然無咩事發生, 但係個感覺似係一大堆食人倉衝埋去搶野食咁; 另外亦有一d龜係入面, 有人用野食嘗試釣d龜上來(試下玩下姐), 同我以前係BD用盲公繩釣一樣呢 :D 睇完一輪魚同龜之後就走, 搭返車出流浮山; 出左來之後, 行下條大街, 個感覺好似大澳, 又係街2邊好多有關海產o既野賣: 蝦乾呀、蝦醬呀...etc etc, 我又買左樽蝦醬 :P, 行到尾又到海邊, 又係一堆泥沼, 又見到好多小蟹同彈途魚, 睇左陣就返車站搭車出返元朗了。
出返元朗未去呀進屋企前, 去左百鳥塔(臨時去的), 有好多雀仔, 好近距離, 又無隔住的, ; 行到最上層就無雀, 不過個view就就可以睇到好遠; 不過我地到果時都差唔多收工, 好快睇完企完吹左陣風就走了。話時話, 今日睇唔到貓貓狗狗, 反而d野生動物彈途魚呀蛇呀雀呀又見好多。之後終於上左呀進屋企。由於家庭關係, 佢2兄弟搬出來住。雖然租屋住要使好多錢, 不過上到去見到全間屋都係自己用o既, 個感覺好正呢~~ 自己住好寫意呢~~ 係佢屋企見到前排出o既BB戰士模型: 劉備關羽張飛, 出果時都覺得麻麻, 又偷膠又有排上色, 見到實物又覺得OK, 想買喎, 一隻$30蚊加埋都係一舊水島, 有d想要呢。睇左陣, 我帶左件衫換左(流左好多好多汗又曬又熱, 仲辛苦過返工), 之後大家就叫左Pizza食; 打下UNO, 吹下水, 都OK呢。食完本來有人話去唱K, 不過由於唔早, 又係元朗咁遠, 好彩攪唔成。8點幾, 有人提議出去合益睇模型(5算, 好平呀), 於是打的去, 點知去到真係收左工, 晒氣...之後到B仔涼粉食糖水, 之後就去車站搭車, 散了。10點幾就返到屋企, 早呢。
**********
失去信心
由好早之前, 已經知道同埋預左好多野, 亦知道耐左會有好多問題發生, 諗住既然知道就可以防範, 可以做好d; 點知都係無用, 明明講過, 明明大家都知, 但係都無用...
而家對"2個人在一起"o既關係真係好無信心, 覺得自己算係做得好d o既, 有努力o既, 都係咁; 就以後就算再一齊, 或者遇到另一個, 都係會咁...所以好驚, 好無信心...暫時唔想再諗呢樣野了。
**********
大義凜然
自己講左好多野, 做左好多o岩o既野, 無做好多錯o既野, 好似自己好大義凜然咁, 但係其實覺得自己都係一個衰人; 但係又唔夠衰, 如果自己徹底地係一個衰人可能仲好...
自己唔開心, 除左發生左咁多不愉快o既野之外, 其中之一都係對自己o既感覺, 太差了; 我唔介意人地諗咩, 即使覺得我仆街都係一樣, 都係果句; 只要自己快樂又唔影響別人, 點做都可以, 唔會理人眼光; 不過, 今次會影響到人, 而即使唔影響, 自己都唔多快樂...
**********
即使有幾理智都好, 人都係會被感情所影響, 不過呢樣亦都係人o既可愛、可怕、可憐之處。
完
七月十四日 -- 雜記
10/7(二) -- 收工返企
11/7(三) -- 睇死硬4.0; 自己大懵唔記得買飛前打電話, 衰左; 臨時拉夫叫人來頂, 有d唔好意思; 講返套戲, 由於一早expect左係一套點o既戲, 所以覺得非常好睇, 同前幾集一樣, 都係由頭刺激到落尾, 唔會晒好多時間係d講野度, 加上一大堆o既槍戰, 肉搏, 車追車, 車追人, 直昇機戰機等等, 總之就係好刺激無悶場; 主角身經百戰, 遇到危險o既時候都超淡定, 由於有前幾集o既關係, 加上主角個樣, 佢每次用d方法K.O.對手時, 幾誇張都好, 都覺得好型同好有說服力, 太正了。
12/7(四) -- 同Carol日安馬生唱K, 而家可能係暑假, 所以限時...; 唱完K被逼供, 講左好多野出來, 大家亦有俾意見我; 有多d拍拖經驗o既人o既意見果然係唔同d...起碼唔會好似睇小說同電視咁, 諗野咁ideal...係呢度多謝大家o既意見同支持...果日散左之後送左Carol返企, 又繼續傾左好多野。
13/7(五) -- 由於Spenser又需要調week關係, 星期六會long week; 夜晚亦無去呀儀的farewell, 去左打羽毛球; 好累, 平時打唔到都好有活力, 不過呢次就差d...不過過左呢個星期會試下儘量再早d訓; 打完波食飯散; 黑色星期五, 好邪, 發生好多野咁
14/7(六) -- long week, 收工落左落SSP, 唉, 愈來愈煩; d朋友好多野講, 又唔明, 只係令我愈來愈煩, 唔使個半月, 我應該就來頂唔住了。同日, 同同事Puzzle傾左好多野, 佢亦分享左佢自己o既經歷, 好多謝佢, 佢係一個好值得交o既朋友來呢。
15/7(日) -- 同Lands同事去流浮山+去呀進新居入伙, 就來出門口。
**********
1. 有d野, 過左去真係過左去...如果無事發生過, 可能都好好地, 發生過就係發生過, 返唔到轉頭; 自己唔係一個會記住唔開心o既野o既人, 所以一d怨恨都無, 不過而家o既感覺, 好似親人, 好似好朋友, 但係...
2. 愈來愈多朋友知道d野, 亦都有好多好多唔同o既意見; 旁觀者清, 其實當局者又何嘗唔知大家講o既野; 不過真係好睇到大家o既性格, 而且經歷唔同俾o既意見都唔同, 多謝大家。
3. 唔想再拖, 好煩好煩好煩好煩好煩好煩好煩, 完左之後我要"炳"埋自己一段時間。
4. 放心, 唔會影響我工作, 一定唔會。
5. 我好乖架啦...我儘量都唔會做錯野...而且其實我都無打算拖好耐解決, 我已經不停煩同諗點樣架啦...
6. 自由o既時間, 真係好自由, 不過都係一個星期姐, 之後會早d返企, 早d抖。
6. 當一切o既野完左, 我要嘗試下改變自己, 要下定決心做多d運動, 砌返模型, 有機會追下電視劇集。
暫完
