特別鳴謝

自己打野o既多少, 好睇果排得唔得閒。呢排比較得閒, 所以打多左好多無聊野。由於自己o既腦比起以前運轉速度慢左(本來已經慢, 仲要更慢...), 又成日空白一片, 因此經常會問下朋友, 有咩題目好寫。通常鐘意d比較open end的題目, 因為唔會限死左內容同題材, 是但舉一個簡單例子:鳥, 可以寫有關雀o既野, 可以寫一個故事, 可以寫鳥背後有d咩九唔搭八o既意思, 可以寫鳥同第2d野有咩關係, 甚至可以寫唔係雀仔o既"鳥"o既野, 總之咩都up得一餐; 不過都好多謝有好多朋友不時比題目我, 雖然有時寫唔到或者無寫到, 但係都好多謝; 係呢度要特別多謝一位朋友, 一口氣俾左一堆題目我, 都係好多野可以講, 而且好有啟發性o既題目; 由於有好多, 有d我又未必會寫, 但係又想講少少, 於是決定係呢度一次過講下自己o既睇法。

自己對"政經"(政治及經濟)野有d冷感, 不過我以前都寫過少少, 自己雖然唔喜歡呢d野, 但係都會留意, 都會知, 都會識dd, 不致於好似而家好多年青人咁連基本要知o既野都唔知o既...(自己算係好過無果種); 個人認為, 即使係幾咁無興趣都好, 時事o既野都係要知o既, 因為實在同自己o既生活息息相關, 係"常識"o既一種。如果唔識少少有關政治經濟又連新聞都唔多睇, 就真係有點兒那個...

不過呢, 知知地還知知地, 有關"政經"o既野, 我都唔多會寫o既。曾經同死黨都有傾過呢d野, 亦都有少少地寫過係blog度有關呢d野o既意見, 覺得而家o既政治及經濟都唔係自己喜歡o既, 唔多健康, 而且好小圈子, 全世界都係咁話, 話係自由民主果d其實都係假o既, 從政者或者當權o既body(或者任何國家)有99%都係只為自己利益來做野, 跟本無人係真係為左另外o既、弱勢o既人, 所以我覺得無咩好講; 經濟都係, 不論係商業、股票、任何有關活動, 到最後都係d"大"o既玩晒, 其他都係係個海入面載浮載沉, 儘量撈到幾多就撈幾多, 撈唔到果d就沉船。

自己睇得比較化d; 因為呢d控制唔到, 大家都係隨波逐流; 因此我寫o既野都係d微觀d有關"人"o既野, 而比較少寫宏觀有關世界、或者好大o既野呢。以前都講過, 自己思想都幾似老子o既道家思想果一派, 祟向自然呢。

以下係回應唔同題目o既感想:

1) 拯救世界/世人的行為: 世界唔需要拯救, 地球一直在轉動, 人類亦一直如常活動, 所有野都有兩面甚至好多唔同方面互相制衡, 先至有一個比較平衡o既世界; 當資訊愈來愈發達, 對人思想o既影響愈來愈大, 大家就可以見到究竟人係會容易偏向"善"定"惡", 可能到最後某一日, 其中一邊o既平衡崩潰, 咁就會世界大亂了; 至於誰對誰錯, 誰是誰非, 無人講得到, 更加講唔到甚麼為之"拯救"。呢個世界, 就只是由得佢繼續發展落去...

2) 語言污染(swear): 語言o既作用係用來溝通; 不管"語言污染"formally係咩意思都好, 在我而言, 欺騙、傷害人o既說話就係"語言污染"。反而有時一班直率o既人, 為左某一d野而意向一致地爆粗, 我都唔會覺得係語言污染呢。有時, "爆粗"的確係一種直接而坦率地抒發情感o既方法, 如果在場人士無人介意聽, 其實有人講左都無咩問題呢, 總之, 就唔好係唔適當o既場合同唔適當o既人面前講就好了。

3) 奧巴馬的施政對世界的影響: 牽涉太多野, 又唔係樣樣都熟, 所以好難講, 放棄談論。不過雖然唔鐘意美國, 但係佢對世界o既影響力大, 所以如果可以好返少少, 對大家都有d好處。

4) 有關聖誕節的事: 呢個係近d聖誕o既時候, 我一定會有野寫的, 所以唔係度講住。有關聖誕o既睇法同感覺以前都寫過, 今年可能又會有新o既睇法同感受? 另外, 都可能會有有關聖誕o既故事寫下吧?

5) 頭髮的煩惱: 對我來講, 就係髮線上移吧? 即使幾唔理儀容如我, 都有一點點介意呢。好彩, 暫時其實都係少少, 不太嚴重, 睇唔出。

6) 戲院與家庭影院之別: 無家庭影院o既經驗...不過相信幾好畫面同音響都好, 都好難同入戲院睇比較吧...(除非超級有錢)。自己雖然唔係戲迷, 亦唔睇得多戲, 但係都幾支持入戲院睇自己喜歡的戲, 即使係大家口中o既"碟戲"都好, 只要喜歡都會入戲院睇。

7) 政府為何變得弱世(應該係"勢")政府: 呢個有好多意見, 不過又係唔多想講。總之而家果個不知所謂。

音樂類:

8) 原音及用電的音樂(eg.木結他 vs 電子結他): 雖然木結他都可以彈得好快好勁, 電結他都可以好慢好溫柔, 但係相信木結他最佳表現都係抒情、民歌果種感覺, 而電結他就比較可以使人激烈高亢吧? 有一樣好肯定可以講, 鼓, 一定係打真鼓好過電子鼓好多!

9) 音樂趨勢: 全世界o既音樂趨勢, 都係多元化地又可以並存吧? 不過始終都係pop會係多d啦(話明係流行); HK果個, 就唔好提了...識得多左台灣同內地人, 佢地都唔多聽HK歌手d歌了。算吧啦。

10) 盜版問題: 好自然o既, 有邊個唔想唔使錢就有得睇有得聽? 不過又真係令到行業萎縮, 同埋資源不足之下質素愈來愈低, 跟住就惡性循環...好矛盾。

11) 現代音樂與古典音樂: 對現代音樂都唔係了解好多, 古典音樂更加可以話係一竅不通, 所以唔敢評論d咩野; 只可以話, 係唔同時代o既產物; 感覺上, 古典音樂的碓比較可以淘冶性情d, 而現代音樂就會比較直接地抒發情感。

12) 怎樣以聽歌去消磨時間: 呢樣係強項, 不過對我來講都無咩"怎樣": 聽就得了。好似自己之前咁講, 每一個component都聽下, 更加會消磨到好多時間呢。

13) 音樂效用: 對我來講第一一定係抒發情感吧。當然仲可以消磨時間, 淘冶性情, 仲有可以用來同人溝通...等等, 不過對我來講, 即使無晒其他原因, 有得聽已經好夠了。

完

WANDS - 明日もし君が壊れても(即使你明天失敗) -- 又係一首WANDS的歌, 又係一首比較高亢又好抒發心情o既歌, 又係一首自己好鐘意好鐘意o既歌。呢首係我獻比全部朋友o既歌來o既。如果大家睇我post又唔睇埋d歌o既介紹, 就會知少左d野呢。

WANDS - 明日もし君が壊れても
http://www.youtube.com/watch?v=vtgrX-7JXZM

明日もし君が壊れても
WANDS

作詞：坂井 泉水
作曲：大野 愛果

Call my name 誰かが呼ぶ声
暗闇の深い悲しみ
白い素肌の君が
僕のそこに光をさす
黒か白か分からないまま
こんな愛は時代遅れなのか
僕らは一日中
朝が訪れるのを待つだけ

明日もし君が壊（こわ）れても
ここから逃げ出さない
疲れた体を癒(いや)す
君の微笑みよ

Lonely heart もて余す心
ポッカリ穴が空いたようだ
自分を抑えきれず何かに
イライラしてた
｢あの恋を忘れられない｣と
出逢ったころ話してたね
本心を隠（かく）した表情
まだ僕には救いがありそう?

明日もし君が壊れても
さまよい続けるだろう
愛して初めて知った
失う怖さを

明日もし君が壊れても
何も見えなくなっても
安らかな時の中で
僕らは歩き出す
君のまぼろしよ

完

世界が終わるまでは・・・(直到世界的盡頭...)

一個很老土的題目:如果還有一天就是世界未日, 大家會做什麼呢?

首先, 我要假設這個世上只有我知道, 而並不是全世界都知道, 因為這樣只會大混亂, 人類陷入瘋狂, 到時可能還未捱到第二天已經死了一半人以上了, 不會去假設這一個情況的存在。因此, 我會假設了只有我知道, 然後我會以我的角度去猜想自己會怎樣吧?

就當作在這最後一天, 這個地球會如常轉動, 人們如常生活, 那我會做些什麼呢?即使是如何不浪漫也好, 除了家人, 我會先選擇找朋友。由於我不會讓消息走漏, 也不想有人擔心、甚至發瘋, 因此我不會跟身邊的任何人說這件事, 不會讓他們知道。我會很想跟我喜歡的朋友們一起渡過這最後一天的其中的時光, 因此我會用盡所有"朋友牌", 甚至自己付錢給他們叫他們請假, 一起去渡過一段大家共聚的時光。

當然, 一定會有一段時間與家人渡過的。當然, 也是用盡一切方法使大家都回來, 一起吃個豐富的一餐, 談談天, 跟他們每一個說:我愛你。

隨了與別人一起渡過的時間, 我想我也會有一點時間是自己去過的。反正最後一天了, 當然要做多一點東西, 享受、嘗試多一點東西啦。由於犯法會影響我要過的時間, 因此我也不會犯法的。不過, 花錢就一定在所難免了, 絕對會去花很多錢, 去嘗試擁有、享受不同的東西呢~玩的, 吃的, 什麼也好, 也會買一些東西給身邊的人, 即使只是使大家快樂多一天也好。

過了一段時間後(即是最後一天過了一段時間, 還有不足半天的時間), 我會跟我身邊最好、最喜歡、最愛的朋友們說這件事, 讓他們有一點時間去做自己喜歡的事, 見喜歡的人; 我不會跟親人說的, 因為不想他們會有任何一刻擔心, 而且, 他們見過了我, 跟我一起過過, 應該夠了吧? 嘻。

最後的時光, 我會跟知道了這件事, 而仍然願意跟我一起渡過最後時間的所有人一起, 靜靜地, 等待著那一刻, 見證著那歷史性、毀滅性的一刻...

Black Out

完

p.s. 說著說著, 似乎我說的並不是還有一天世界未日, 而像是我的生命還有最後一天而已呢。

歌:

WANDS - 世界が終わるまでは・・・(直到世界的盡頭)
http://www.youtube.com/watch?v=5xe2lazspLA&feature=related

呢首係其中一首, 鐘意左好多好多年o既ALL TIME FAVOURITE之一, 十幾年來, 周時聽都唔會覺得厭, 唔知點解, 總之就係好鐘意, 好好聽, 都係好o岩我feel的一首歌呢。個MV由於年代問題, 有點娘, 大家聽首歌就好。

完

十一月十六日 -- 雜記

1. 10/11(一) -- 收工返企

2. 11/11(二) -- 好耐無買模型, 收工交收左隻都幾鐘意的呢~ 好似又有返少少興趣想砌下~ 收工同好耐無見的話劇同學們食飯~雖然唔太多人(Albert, Albert嫂, Addison, Crystal, 民), 但係都好開心呢; 去左佐敦街邊的類似大排檔, d野食普通都唔錯啦, 價錢亦係偏貴, 不過勝在地點就晒大家收工來同返屋企; 食完再去松記係佐敦o既分店, 之後9點幾散。

3. 12/11(三) -- 收工本來同MartinConnieCarol4個人去唱K, 不過Martin唔舒服, cancel, 3個人照食飯。去觀塘一間聽聞薄有名氣o既雲南野。都地點都幾僻, 要行上少少, 細細間, 但係d野都幾好食, 好似幾地道風味喎~~

4. 13/11(四) -- 居然唔記得左, 今日係Cystal生日! 祝佢生日平安健康, 仔仔生生性性; 當日上午Crystal打來話一齊食晏, 先記得呢; 希望佢可以放底心中o既野, 可以開開心心啦...唉; 收工返企。

5. 14/11(五) -- 好耐無打羽毛球, 好累呢~~打完之後Spenser來join我同Catherine食飯, 食完仲去埋好耐無去o既綠林添, 之後返企。

6. 15/11(六) -- 好悠閒o既一日呢; 朋友有一潭BBQ, 唔多想去, 所以唔join; 係屋企hea到2點, 3點約左花姐姐出來食tea, 係好耐無去過o既"夏雪"坐左2個幾鐘, 傾偈傾得開心; 之後散左我就慢慢行去奧海城, 之前果晚約左MayChan貓貓睇戲; 好耐無去過奧海城, 好懷念段路呢~ 好耐無見過MayChan果班同志朋友呢, 一行8人6點一齊睇爆粗Band友, 都幾好笑, 係expect之中幾好睇, 又未到有好大驚喜果種。睇完差唔多8點, 去左大角咀一間應該唔多出名o既"晶輝"食小菜; d野幾好食, 而最正係籠仔蒸蝦、蒸鱔飯, 好好味~~~食完傾下偈之後10點, 佢地仲去唱K, 我同貓貓都唔join, 就走先了, 11點島返到企。

7. 16/11(日) -- 早上打籃球, 好累, 星期五o既疲累都未恢復; 打完食埋飯返企沖埋涼3點幾, 好累, 之前果晚唔夠訓, 於是下午訓左陣呢。

8. 聽到一個朋友講, 生日應該同媽媽慶祝至o岩, 因為果日係佢最辛苦的日子, 都好有道理呢~

9. 呢排好似過左好多時間, 發生左好多野; 人生好似有拉長左o既感覺呢, 哈哈。

10. 12月會好忙, 要約人趁機約了。

11. 繼續有大量case follow?

12. 人都容易受人影響, 經常見到負面o既野, 所以要堅強, 比返d正面o既野人; 好同壞o既野都係會傳染o既, 大部份人都係直接傳染, 但係有d人就會將壞o既轉化為正面, 有d人就相反; 希望自己儘量做到前者啦。

13. 前排頭髮開始稀疏?!

14. 愈識諗o既人, 愈冷靜o既人, 有問題時其實最難幫到...最難consult...因為好難再高佢地一個level來consult佢地...

15. 與你數日以來的纏綿, 肌膚之間徹底的相交, 你那殘餘的氣味在床上枕頭上刺激著我的鼻子裡甚至全身的每一個細胞...就是你...冬青膏...你陣薄荷味攪到我間房幾日d味都唔散, 好彩我唔憎陣味姐。嘻嘻。

來緊:
18/11(二) -- 帶Wendy步入快樂人生第一步: 帶佢識多d朋友; 同Sam民S等人去禾輋食飯, 其實係自己都想去呢哈哈哈。
19/11(三) -- 同事Vincent要走, 一行8人唱K farewell; 我應該...唔會點唱歌了吧...唱少少。
等Spenser約實大家同Puzzle見面食個飯。

推介歌:
It's gonna rain -- 係一首好鐘意好鐘意好鐘意o既歌; 如果自己唔係情緒唔穩定、心情無起伏、或者有特別原因o既時候, 係一般狀態下o既我來講, 呢首歌果種感覺應該係最似我自己o既歌(唔知係唔係呢?)。好鐘意果果種好輕鬆, 好舒服, 好隨意o既感覺(蘇打綠好多歌都係呢d, 所以會好鐘意), 呢首都算係一首幾代表我o既歌? (而且又係同"雨"有關呢); 除此之外, 個鼓雖然唔係勁打果d, 但係都好有feel, 勁free而且又另有難度呢。另外, 當年我為左呢一首歌, 就買左隻碟呢, 哈哈。

It's gonna rain -- Bonnie Pink -- MV Version, 一個九唔搭八o既MV, 大家聽首歌就好了。
http://www.youtube.com/watch?v=q6spiOrXfkI

It's gonna rain -- 首歌歌訶o既意思; 其實我從來都唔係好concern呢一首歌o既歌詞,因為只係聽就已經好有feel, 好夠了。
http://www.animelyrics.com/anime/kenshin/rkrain.htm

完

叮噹

有睇我blog o既人, 個年代相信都係叫叮噹, 唔係叫多啦A夢, 所以, 都係叫返叮噹親切d。

相比起好多卡通漫畫, "叮噹"應該係一個共同喜愛o既存在。就算係其他幾受歡迎o既卡通漫畫或者角色諸如龍貓, 一樣會有人唔多鐘意, 但係叮噹似乎係我暫時o既認知當中, 就算無點睇過, 應該都無咩人係唔鐘意o既。

自己幾好彩, 有個極鐘意叮噹o既死黨, 因此可以痴來睇晒所有叮噹o既漫畫。自己都係從細就鐘意叮噹, 當然亦都會幻想過類似o既野啦~係呢度唔係想講叮噹o既故事, 因為要講實在有太多野可以講了, 剩係講d大長篇都可以寫篇論文出來; 係呢度其實係想開開心心講下叮噹其中最重要o既一環 -- 道具。

要講叮噹, 不能不提道具。我諗大家係細個o既時候, 唔多唔少都幻想過如果有咩咩咩道具就好啦, 有咩咩咩就好方便啦咁。所以呢, 都係度發下神經, 講下d深刻又想提或者想要有o既玩具。有d道具唔係好exactly記得叫咩名, 就會大約咁叫返。

**********

竹蜻蜓 -- 呢個真係其中一個最常出現o既道具。會好想要, 不過要佢來唔係諗住當係交通工具, 而係當作去遊玩o既工具。大家應該見過唔少次竹蜻蜓有問題或者壞壞地o既情況, 所以搵佢來當交通工具實在有d牙煙; 其實有佢最開心係可以係空中散下步, heahea地遊盪下, 最o岩鐘意自由自在o既水皮座呢。

隨意門 -- 好簡單一句: 最可靠o既交通工具; 如果真係諗住去咩地方, 用呢個就夠啦, 夠務實。當然, 仲有好多奇怪o既用途, 例如係人沖涼o既時候入去呀、想偷情o既時候可以神不知鬼不覺又唔使晒時間去交通度呀、甚至可以入屋偷野呀等等。

空氣鎗 -- 呢個比起空氣砲實用好多。空氣砲有個實體係度, 會比人見到, 個威力又太勁, 所以係現實唔多o岩使; 反而空氣鎗滴一滴野係手指度, 用手指指住人"砰"一聲就可以打暈人, 又無咩大危險性, 又神不知鬼不覺, 好開心; 最好就係用來係街度或者係車度見到d好乞人憎o既人, "砰"一聲打鬼暈佢, 開心死; 當然都可以"砰"一聲打鬼暈好乞人憎o既老細或者客仔啦, 嘿嘿。

桃太郎果子 -- 呢個又係好開心o既野; 比動物食左, 就會變成朋友, 好聽話; 最好就係見到d好鐘意o既貓貓狗狗獅子老虎咁o既野, 比佢地食左, 就聽聽話話, 連去廁所都識得走去隔離, 簡直就係養動物o既最佳選擇, 可惜就係有時效, 要keep住餵咯...當然, 另外一個用途就係比老細食左, 然後...嘿嘿嘿, 或者係俾靚女食左, 然後...嘿嘿嘿嘿嘿...

時光機 -- 又係另一樣極常出現, 而且又極多人會諗到o既野。呢樣野應該又係好多人細個會好有幻想o既道具。不過呢, 而家自己大個左同細個有d唔同; 而家o既我唔會想去未來, 正如我唔多會睇相同占卜一樣, 我並唔係唔信呢d野, 而係我覺得如果知道左未來就唔好玩了, 所以一d都唔想知道以後係點; 反而如果有得回到過去的話就會好有趣, 剩係去睇d歷史人物個樣都有排睇啦~~哈哈~~用途呢, 相信有左呢樣野, d歷史學家就唔多使做了, 同埋可以探秘埋人類甚至宇宙o既起源; 而去未來o既用途, 緊係可以用來發達啦, 剩係六合彩同股市已經夠賺了。

餐廳桌布 -- 嘩, 有呢個就開心死; 放係度想食咩飲咩就會出來喎, 勁開心啦, 總之日日有好野食, 仲唔方會厭添, 勁開心, 仲要唔使錢; 用途隨左用來食飯之外, 當然可以用來賺錢啦, 開間餐廳, 連廚房都唔使, 躲埋係入面變d客想要o既野出來, 連煮o既時間都唔使, 哈哈哈。

放大/縮小燈 -- 呢個其實又唔係好必要o既, 不過好方便就真; 想帶d咩野, 帶好多野都好, 縮細左就攪掂, 去旅行都可以兩手空空, 哈哈, 甚至坐車搭飛機都可以一個人偷偷地帶好多人添, 慳唔少錢, 去shopping亦可以輕輕鬆鬆; 用途方面呢, 除左頭先果d之外, 用來去偷野、偷運人蛇、偷窺甚至偷襲都好方便, hehehe, 當然, 仲有縮細左乞人憎o既老細之後嘿嘿嘿嘿嘿啦。放大功能就可以放大d金呀銀呀, 用來賺錢, 或者將d食物放大, 比好多人食都得姐。

穿透圈圈 -- 呢個用來穿過d野o既圈圈, 其實如果有隨意門的話都唔使用, 不過呢, 有時行行下, 有左都好方便, 用來臨時逃走同躲埋就最o岩用, 如果無隨意門, 都係一樣好方便o既犯罪工具。

走入書中的鞋 -- 呢個就真係夢幻d, 係無咩實質用途, 但係會好開心o既道具; 可以走入書中, 體現書中o既世界, 有實質o既感覺; 會有大把書等住我再去回味呢~~~ 剩係漫畫都已經數都數唔完, 仲有大把小說添!仲有, 仲有好多靚女主角...仲有仲有仲有好多要不得o既書...hehehehehe...

**********

其實呢, 要講真係講極講唔要, 不過時間差不多, 講住咁多算了。難得又會寫下呢d開心o既題目呢; 大家如果有咩道具係好想講, 或者對以上道具有咩幻想同諗法o既, 一定要係度留下言呀~~~

完

唔post歌詞啦~ 我諗好多人都好熟啦~ 哈哈哈, 當然係廣東話版架啦~~

叮噹主題曲 -- 令人懷念, 多咩啦A夢呀~~~叮噹咪好咯~~
http://hk.youtube.com/watch?v=l7P0byZ6MEs&feature=related

畫叮噹 -- 先播廣東話版再日文版, 一link兩食, 爽。
http://hk.youtube.com/watch?v=ToQDQs3sAVA

完