最佳位置?

在你的一生中, 有沒有一個異性朋友曾經是在你身邊的圈子之中, 佔有著一個特別位置的人呢?
或許你曾經有想過、沒想過、或者從來沒有考慮過、更加可能是不敢想過會跟他/她(之後都簡稱"他"吧)在一起的一個人。

可能你跟他在一起吃飯時、一起看戲時、或者無論什麼時候, 甚至是send sms、msn、facebook、whatsapp、pingchat...等等, 也覺得很快樂、很舒服。你有事或者他有事的時候, 會想起對方、支持對方、需要對方。他可能比你的另一半更了解你, 更懂得讓你快樂, 讓你心靈上得到安慰, 讓你在失意的時候舒服一點, 開心的時間更暢快一點。

你會覺得, 這樣的一個人、一段關係, 並不想有任何的改變, 因為這樣就已經是最舒服、最恰當的一個距離。你會害怕, 當關係改變之後, 期望會變得不同, 看到的會變得不同, 對對方的耐性、關懷、需要也變得不同, 破壞了最舒服的那種"和諧"。

可能, 彼此也有著另一半, 而你們不論在事實上甚至精神上也沒有出軌過。即使吵架時他會安慰你, 鼓勵你去?對方, 替你們加油, 幫你想辦法恢復關係。你們仍然忠於彼此的另一半, 只是安安份份的佔有著那個既近且遠的位置上, 一直一直繼續著你們那特別的相處方式。

或者有些人會覺得, 這跟"觀音兵"有分別嗎? 其實有著根本性的不同吧? 不論是兩人的關係、情感, 或者是事實上, 也完全是兩碼子事, 完全沒有曖昧的成份、思想、行為, 就只是守望、相助。或許, 不太感性的人沒有這種感覺吧?

這個佔有著特別位置的人, 可能會因為大家各有各忙, 或者因為各有另一半, 或者因為結婚還是其他什麼的原因, 最後疏遠了, 慢慢的沒有再聯絡了。不過他永遠在你心目中也是美好的, 最好的, 甚至好到縱壞了你, 讓你常常覺得你的另一半也沒有他的好。

因此, 你一直留住了這個位置。

這真的是一個最佳位置嗎?

完

p.s. 獻給身邊有著最佳位置的大家, 還有曾經破壞了那位置的他和自己。

成日任食, 罪大惡極

上星期食左好幾次任食。
屋企樓下牛涮鍋, 8度餐廳buffet, APM牛陣, 來緊Gordon請兄弟姊妹食飯去帝京buffet, 仲有肥強farewell又唔知會唔會真係食放題。

Oops~
任食呢樣野, 好明顯係係物質過度豐富噶社會下出現噶產物。
反正有錢, 人就比多d, 可以有好多款野食, 大食噶又可以食好多野, 係咁食貴野就會抵d, 各種原因令人係咁食。

一早有報導指出, buffet噶出現其實係浪費緊食物, 因為每次都要準備定好多款, 每款不停供應, 所以每次"宴會"結束後, 就會剩餘大量食物, 而呢D食物噶結果只係-- 掉左佢。

就算唔睇第三世界國家, 只係係物質豐富噶社會入面, 一樣都有窮人, 一樣都有食唔飽噶人。雖然一早知道呢個世界噶資源從來都唔係適當咁分配(適當, 唔需要平均), 甚至係弱肉強食, 無能力噶自然會受淘汰, 但係有必要咁浪費嗎?

事實上, 呢個世界上使得起錢噶人, 浪費得起, 要去做呢樣野, 無可厚非, 歷史上甚至有人權力大到可以為左D無聊野而令好多人死添。因此我覺得, 人想點係佢地噶自由, 由得佢。

不過在於個人方面, 任食都唔係一件好事。無錯, 係可以食到好多野, 甚至好多好野, 同埋buffet最valuable噶係可以係一餐之中食到唔同種類噶野。不過大多人去到食任食, 無論係因為D野太好食、太多好食噶野、定係因為要食多d先抵都好, 大部份人都係欲罷不能, 唔識節制。唔使我多講大家都知對健康係唔好噶。肥唔係一個問題, 唔需要個個都瘦到支竹咁, 個問題係"唔健康"。至於食咁多或者肥對健康有咩影響, 唔使我係度多講了。

誠然, 講咁多野之後, 我唔否認我都會去食任食, 甚至有時都會幾鐘意添, 不過其實呢樣真係唔係一件好事來。真係想食好野, 咪選擇一樣點來食咯。多吃壞肚皮, 何必呢?

It's our Bad Karma only~

窗框

一個人的性格、價值觀, 都是受著自己從少到大的所見所聞影響。就像一個人永遠被困於房間內, 看到的就只是房間內的事物, 還有透過窗框看到窗外的景物。要增長見識, 就只有不斷求學、旅行、閱讀、交談...等等, 知道得更多更深入。

礙於資源、時間所限, 人的眼界總會被那窗框限制住。因此一直以來看到的、感受到的, 就會覺得是對/錯, 根深蒂固之後, 就很難改變, 除非遇到很大的外力, 從外破牆而入, 徹底的改變一個人的看法。

總有些人會比別人優越一點。有些人聰明些, 有些人感受性強一些, 有些人有錢些, 這些各方面的優勢總能讓這些人接觸多一點, 從而去到另一層次的思想層面。而較低層面的人, 是永遠也不會明白較高層面的思想領域和模式的(感覺就像大家看著幼稚園的小朋友一樣, 不同的層次), 因此有很多人會對所謂"蠢"的人沒有耐性, 而那些"蠢"人也永遠無法理解別人的思想。再進一步, 有一些稀世的天才, 沒有人明白, 就成了"天才白痴"。

不過, 即使自己能夠伸出窗外, 看到多一點的人, 也不一定是比所有人厲害。誰又知道窗外的只不過是一幢大廈之內的事? 或者只是一個區域之內的事? 說不定有人能出了大廈、出了區域, 衝出世界, 甚至衝出宇宙?

到最後, 人也只是活於自己的窗框之中, 不論多大, 也只是自己的窗框。因此, 我從來也不會否定別人的人生觀、價值觀。就算大家覺得自己好像比別人看的多、看的闊、看的深(又是那看著幼稚園的小朋友不同的層次的感覺), 也應該要懷著心態, 知道自己之外有比自己看得更多更透徹的人。

其實這也就只是簡單的"人上有人, 天外有天"的道理。不過, 人總是剛愎自用的, 有幾多人可以虛懷若谷呢?

完

p.s. 朋友叻給的題目

三國外傳 -- 關先生劈友記

關先生千里劈友記

好久沒有寫過三國瞎扯外傳, 適逢最近"宇宙最強"所演的電影"關雲長"上映, 我也來湊個熱鬧寫一下三國的外傳吧。

**********

上回寫過(大家請看敝人以前寫的"趙雲百萬軍中藏阿斗")曹操與趙雲在百萬軍中姦淫了劉備的兩位夫人, 其實曹操一早就處心積累, 想攪劉備的老婆了。可憐的劉備本就沒什麼野心, 只想安安穩穩的過安樂日子, 怎知就因為娶了兩個漂亮的老婆, 就經常要受戰爭的洗禮, 當真紅顏禍水也。

話說終於曹操好不容易的打得劉備落荒而逃, 終於也讓他捉住了甘、麋二夫人, 連帶劉備旗下猛將關羽也給擄了過來。怎料關羽乃死腦筋, 腦中除了肌肉之外就是"忠義"兩字, 他一早看穿曹操是個淫賊, 作為劉備的二弟, 他怎可讓兩位嫂子讓曹賊污辱? 因此他答應效力曹操的條件, 其中一個就是不可動兩位夫人。

爭天下之事當然重要, 曹操雖然是個淫賊, 但畢竟是個亂世奸雄, 知道凡事皆應以大局為重, 最後不得不為了得到這一員大將, 而答應了他的條件。想不到關羽竟然夜夜守於兩位房夫人門前, 使曹操沒有機會去竊玉偷香, 了自己的心願。死了那麼多人, 打了場場勝仗, 期待萬分, 但卻給關羽這戇忠男破壞了好事, 唯有夜夜望門興嘆。

前事不多談。終於, 關先生得知大哥在河北表紹那裡, 決定連夜帶著兩位嫂嫂離開。由於他忠厚老實, 決不願帶著曹操送他的東西離開, 於是他掛印封金, 連曹先生送給他的新袍子也留了下來, 種下了那五關六將的禍根。

不一日來到東嶺關...等等, 由於故事由此開始會有對話, 為了增加親切感, 本人將Nicam故事至廣東白話, 將其本來的京腔轉變為白話表達是也。

來到東嶺關, 關羽一馬當先衝埋去個關口度, 諗住直行直過。點知守將孔秀即時攔住佢路。
"身分証, passport。"
關羽當堂啞左, 心諗, "敝, 無帶添!"
於是就答, "無喎。我係關羽關雲長, 官拜漢壽亭侯, 快D放我過去!"
"身分証passport丫唔該。"
關羽心諗, "唉呀, 頭先懶型將D野留晒係姓曹條友度, 早知就帶埋來, 而家就唔使咁煩啦!"
"喂, 我假假地都高級過你, 你快D放人好喎!"
"身分証passport丫唔該。"
"哎呀! 我挑你個XX祖宗十八代, 你連我關羽都唔識, 你點出來撈架!"
"身分証passport丫唔該! 你連身份証都無, 我點叉知你係乜水呀! 就算你係我上司, 就可以唔使証件都過得關呀? 下?! 我照足程序做野架, 我係唔放你吹呀? 我啤~~~~"
"我頂你個肺丫咁串? 我最X憎你呢D爛鬼公務員噶死人官腔! 正X街!"
"身分証passport丫唔..."

"噗!"
關羽好嬲, 係呢一刻佢爆啦, 佢拿起佢把大關刀, 一野就斬左孔秀噶頭落來。
"敝! 衝動出事, 快D撇先得!"
於是關羽就帶住兩個嫂嫂連夜閃人, 好不容易去到名城 -- 洛陽。

洛陽早幾年先俾董卓燒過來, 不過都總算係大城, 當地太守韓福都唔係流噶。佢一早收到風關羽會路經呢度, 自忖自己未必夠佢揪, 力敵不過就緊係智取啦, 於是佢係關羽來到果時百般留難, 同佢講, "你行左咁耐都累架啦, 不如你今晚係度抖下先, 天日先比你過關好無? 你都知啦, 你又無身份証又無passport, 我好難交代噶嘛...嘻嘻嘻...拿, 今晚我搵幾條女來陪你, 等你好好梳乎下, 天朝再慢慢趕路都唔遲呀~"

關羽一聽, 又好似有D道理, 又好似有D著數, 就一口答應。佢滿心歡喜, 就準備去沖個靚涼, 點知副將孟坦帶佢行果陣, 韓福偷偷地一箭射埋去! 關羽身手敏捷, 閃身一避, 總算避過左致命傷, 但係都中左肩頭。雖然好痛, 但係生死關頭, 絕對唔可以退縮! 佢一口咬住支箭頭, 一拔拔出來, 呢下其實係懶型, 佢知打交最緊要係個"勢", 先來一野嚇一嚇人, 贏個勢先! 果然隔離個孟坦睇到眼坦坦, 就係呢一下呆滯左就比關羽斬開左兩半。

韓福見自己偷襲都射唔死關羽, 知道大鑊, 即時就想走佬, 可惜走唔夠兩步, 就比關羽追到上來。關羽昂藏七尺, 步大力雄, 韓福又點夠佢來呢? 都係比關羽一刀劈開左兩半拜拜。
關羽知道此地不宜久留, 唯有帶住兩位嫂嫂, 仲有箭傷, 逃離左洛陽。

來到沂水關, 守關卞喜當然都收到消息啦, 佢見之前果三條友打又打唔過, 暗算又唔成功, 點算好呢? 雙拳難敵四手, 一於圍佢! 我唔信成班人圍佢佢都贏到! 於是佢係鎮國寺埋伏左六個刀斧手, 唉, 本來都想埋多幾個, 但係而家噶中級領導階層都好難撈, 平時做野油水又唔多, 慳住慳住先請到六個, 算啦, 照去。

話說關羽來到沂水關時, 卞喜就假裝好意, 要請佢為佢洗塵。點知果幾個平價刀斧手唔得醒目, 躲係牆角竟然突左d衫角同埋武器出來。關羽雖然係粗人一個, 但係之前比人線過, 都蠢唔晒架! 見到自己比人圍, 緊係先下手為強啦! 佢知卞喜警戒心都高, 如果一擊唔得手就實比人圍硬, 於是掄起佢把大關刀, 一衝衝埋去牆角後一斬斬左兩件。

呢下先聲奪人果然有用! 另外幾個人猝不及防, 又嚇親。關羽承機三兩下手勢就料理多兩件, 仲有兩件嚇到屁滾尿流, 緊係走夾唔抖啦。卞喜眼見不妙, 心諗早知唔好慳果少少錢, 請多幾個質素好d噶人來啦! 但係後悔都無用, 佢連走都走唔設, 就比關羽一刀斬死。

一路無話, 就到了滎陽關。呢度噶守將王植係韓福噶親家，不過佢不嬲同親家不和, 關羽斬死左韓福, 佢仲開心, 反正自己都唔夠關羽打, 不如做個好人放佢走仲好啦。佢接左關羽入城, 搵人幫關羽醫左箭傷, 安排晒房間比佢。不經意之下見到關羽兩個嫂嫂, 嘩! 當堂腳都軟, 攪乜呢兩條女咁索噶! 唔怪得老頂曹操點都要捉佢地返去啦! 曹操攪唔成, 而家佢地送羊入虎口, 仲唔係我噶運氣? 哇卡卡卡卡..."

佢即時著手安排人手, 設埋伏, 裝陷阱, 佢汲取左之前果幾條傻佬噶經驗, 今次準備充足, 重重噶陷阱加上充足噶人手, 一定可以制服到兩位夫人....呀唔係, 係制服到關羽, 志在必得! 可惜呀可惜, 千算萬算, 算不盡一點疏失, 日防日防, 防不住那一個 -- 家賊! 王植有條O靚叫胡班, 知道左王植噶企圖, 睇唔過眼, 偷偷地通知左關羽, 關羽知道之後緊係大怒啦, 不過佢唔會蠢到同自己條命仔過唔去, 三十六計, 走為上著!

憑住胡班引路, 佢避過晒d危險, 順利出關。王植知道事情敗露, 覺得好唔抵, 明明到手噶肥肉竟然飛出左佢五指山! 男人有時諗野真係用下面唔經大腦, 當佢諗起果兩位夫人噶豐姿, 佢就咩都唔理, 決定帶埋人馬去追! 一眾人馬唔使幾耐就追左上來。只嘆一聲英雄難過美人關, 狗熊都係難過美人關, 佢追到忘形竟然一馬當先就衝左過去, 都無諗過自己幾多斤兩。關羽本來都一肚氣出唔到, 而家王植自己埋來佢仲唔將D怒氣發係佢身上? 無錯, 發晒係佢身上, 佢揮刀連斬, 王植就俾佢劈開左幾份, 玩完。其餘噶兵丁見到呀頭瓜左, 緊係一哄而散啦, 於是關羽又過一關。

終於都來到最後一關。太守劉延知關羽到左, 親自去接佢。
"關先生, 你一路過關斬將, 其實我都唔應該放你走架啦, 不過我知我唔夠你打, 我唯有照普通程序來做啦。而家你無身份証無passport, 我照幫你登記左先, 第日有咩事再通知你啦。"
劉延抄底晒關羽噶生辰八字, 所有資料, 摸一奏關羽隻手, 諗, "呀...好大隻大手, 好堅壯噶大手...如果可以係我身上..."
關羽感覺到唔對路, 竟然係一個攪基太守, 救命呀! 佢即時就話, "咁多謝晒, 走啦!"
關羽一行人總算照做左過關手續。

臨走果時關羽問, "前面有條河, 老哥可唔可以借條船比我過河呢?"
劉延心有千絲萬縷噶念頭, 但係又點可以講出來呢? 佢因愛成恨, 得唔到, 唯有放手, 但係又唔忍心殺佢。
"我做晒好人比你過關啦, 你仲諸多要求? 仲要我借埋船比你? 你唔好要我貼埋大床比你娶老婆呀笨?"
關羽知道自己理虧, 難得過到關, 就算食左一面屁都算數, 去到河邊先算。

來到河邊, 已經係就快要去到佢劉大哥附近了。只見一個將領坐左係一條船上。
"關羽, 我係度等你好耐啦。"
"你係咩人, 你係咪要借條船比我?"
"關羽, 條船借比你, 不過租金係你條命! 喝!"

果位將領秦琪手執三尖八角槍, 來勢洶洶, 槍勁捲起沙塵, 直撲關羽! 關羽旋轉大刀, 刮起刀風, 迎向秦琪!
啪啪啪啪啪啪鏗鏗鏗鏗鏗鏗鏗鏗啪啪鏗鏗鏗鏗鏗啪啪啪啪啪啪鏗鏗鏗啪啪鏗鏗鏗鏗啪啪啪啪啪鏗鏗鏗鏗鏗!!!
鏘!!!!!!

雖然只係交手得好短時間, 但係兩人已經過左無數招, 甫合, 即分。
秦琪跪底。
"好厲害...噶功夫...我諗住自己已經練到爐火純青噶武藝...可以匹敵當年噶呂布...可以出來幫曹大人打江山...點知..."
"小子, 你噶武功都好唔錯, 不過同當年噶人中呂布仲有差距, 你返去再練十年啦。"
"哈哈哈...我已經到左極限, 唔可以再進步架啦...既然係咁, 我留係呢個時代都無用..." "啪!"
秦琪被劈開一半。
"妖! 諸多聲氣, 阻住晒, 要死就快d死啦!"
關羽於是就同兩位嫂子上左船, 成功投奔大哥了。

後記
話說關羽終於去到袁紹根據地搵劉備, 佢去到關口。
守城士兵問, "身分証, passport。"
關羽當堂啞左, 心諗, "敝, 無帶添!"
於是就答, "無喎。我係關羽關雲長, 我係來搵劉大哥劉備噶, 快D放我過去!"
"身分証passport丫唔該。"
"喂喂喂! 你又來呢套? 我係關羽呀, 你連我關羽都唔認得, 你點出來撈架!"
"身分証passport丫唔該! 你連身份証都無, 我點叉知你係乜水呀! 個個都認親認戚, 咁我咪唔使做? 下?! 我照足程序做野架, 我係唔放你吹呀? 我啤~~~~"
"我頂~~~~~~~~~~~~~~~~~~~~~~~~~~!!"

完

五月八日-- 雜記

3/5(二) -- 收工後上堂(德文d數字果然難XD, 不過我上完堂就已經記得了, 其實我真係應該讀文科 =_=); 上完堂後好累(應該話本來全日都好累), 所以快食飯(君滬, 都OK喎, 尤其個酸辣湯)之後返企。

4/5(三) -- 同熟噶同事們(日安, 盧撈, Mandy, Amanda, Carol, 呀Yo, Yee, Charles, 呀衛, 呀珊同佢老公呀健)不定期gathering, 去Cafe 8 degree食buffet慶祝呀珊生日, 個buffet都幾好味呢~~

1. 當日對大家最shocking噶news係呀Yee今年結婚, 平時收收埋埋, 大家連佢拍拖都唔知~~ 原來拍左7年拖啦~~~

2. 走果時見到金剛(大隻+成套老西)同洪天明(高), 幾型呢~~

5/5(四) -- 收工同同事們(呀叻, Yee, Penny, 盧撈, 植, 齋, 呀黃)係君傲灣歡樂羽毛球, 好開心: 好近~~ 入到TKO食左Burger King先, 之後集齊人(大家係唔同地方食)上去打波; 成班人一齊玩好開心呢~~ 如果之後有得keep住打就好了~~

3. 今日輪到催時同學陣亡了...

6/5(五) -- 今日Barry佢地同呀Mak慶生, 不過約左魷魚在先; 同佢係新世紀老富昌食飯, 個名成間茶餐廳咁, 原來係西餐 XD 不過d野都幾好食喎, 尤其係個豬肋骨, 十分OK~~ 食完之後諗住去采豐行入貨, 點知去到8點35分, 人地原來8點半收工, 頂~ 之後同魷魚散左就返返去新世紀潮風join返Barry佢地, 佢地9點都未開始食 XDDD 之後就同佢地吹水(我無食野), 到咁上下就散了。順帶一提, 果間潮風d野真係唔多得, 但係好平, 估唔到新世紀有呢D地方 XDD

7/5(六) -- 臨時約左催時睇早場"關雲長"; 之後返企抖同hea, 訓左下; 晏少少Sam入左來TKO搵我7點幾走; 夜晚無同催時食飯; 上網見到貓姐,8點半臨時搵左佢出來MK, 9點幾係朗豪坊食左d野, 終於拿返係台灣果時借比佢噶4GB card了~~~!!食完野就返企了。

4. 聽催時同學講左好多佢d野(仲有有關T先生噶野), 真係有d嚇人。

5. 關先生劈友記: 又一顛覆三國"演義"之作; 近年愈來愈多作品以另外噶角度寫三國, 更加多人平反曹先生XD; 不過全套戲文戲同打戲好似2邊都唔拖唔水, 節奏亦有少少慢, 文戲想表達好多野但係又唔夠喉(尤其唔熟歷史背景噶人會唔識), 打戲又唔係真係十分多到打到飛起, 所以有少少兩邊不討好, 條"愛情線"更加係騎呢同薄弱; 姜文仍然好交到戲, 宇宙最強都係負責打果part, 唯一最要交戲個位係全套戲最好笑噶位, 真係忍唔住笑; 另外, 戲入面好多個男子漢都好型仔。

6. 本來係睇之前都係諗左個三國噶玩野故仔, 又係用同一段過五關斬六將, 而家唔多想寫了~~

7. 星期日噶凌晨發左個騎呢夢, 係夢入面又係走來走去又搭車又盛好累; 最後去左間"啟田小學", 係夢中竟係係大陸同HK邊境, 奇奇怪怪 @@"; 不過起身真係覺得累 =_=

8/5(日) -- 呀Mak生日快樂!! 早上去維園打波, 超耐無打, 好唔掂, D波射極唔入, 連籃底都炒粉, layup都唔入, 好彩最後好返d~~~ 同佢地食完飯後同民仔+擇茄三個人慢慢行去北角, 行左炮台山模型鋪同埋北角奇趣, 之後去左阿鴻小吃買左鹵水鵝返屋企加"食送"; 臨時約左Temp014係TKL食tea, 之後過埋坑口食聰嫂, damn fat! XD 再次感受到可以隨時約熟噶街坊出來食野吹水噶感覺, 太好了~ 晚上返企食飯, 個鹵水鵝堅好味~~ 晚上對手臂開始有d痛(紅晒)同有少少起泡, 睇來係曬傷左了。

8. 有連續三、四天的假期真好~~~

9. 夜晚係屋企煲Eason同蜢蜢噶concert, 好鬼正~~

10. 天才的課題(櫻木花道?): 1. 來緊真係要減少自己噶食野同埋少D去街(肥左啦), 仲有2. 要少d同朋友(女仔?)食飯(避忌d+多d返屋企食飯); 為自己定下目標, 學某人咁, 俾個叻自己先~~~ :D

來緊:

12/5(四) -- 4仔旅行團pre-trip gathering
16/5(一) -- Gordon兄弟姊妹感謝宴 @ MK帝京
17/5(二) -- 上堂
18/5(三) -- farewell呀強食飯
19/5(四) -- gathering w/ TKO buddies @ 點好味
23/5(一) -- 毛毛球

完