[育兒]
對於‘“時間”有觀念之後，細個嘅時候係覺得“一年”好長嘅。到咗大個出來做嘢，可能經常重複又重複咁過日子，就覺得“一年”好快過。
阿B下年高班了，同好多其他同學仔同朋友一樣，要面對升小。相信好多父母都曾經/會為咗小朋友嘅升學煩惱，其實係BB出世時，已經諗過好多好多有關成長、育兒嘅事。學業當然係重要嘅一環，但引申落去，究竟成長、經歷、人生，點樣先係叫“好”？叫“啱”？叫“成功”？
每個父母所謂嘅“教育”，其實都係按照各自心中嘅“正確”，但係每個人嘅人生都唔同，先唔講父母自己嘅人生可能都唔係叫“成功”，但就算成功而將個方法同觀念放置係小朋友身上，又係咪叫“啱”呢？
而家嘅世界同社會轉變得好快，唔好講一代，就算10年之差，人嘅諗法同態度都可以差好遠。而家大家適應緊嘅“平常”，對下一代來講已經係老seafood，過時了。
坊間好多好多育兒、教育資訊。其實邊可能咁統一可以一概而論點樣去教？人人性格唔同，資質唔同，資源唔同，需要唔同，目標唔同，際遇唔同。打機而家都無一條formula爆機啦，何況人生？
講到尾，最緊要係教識佢思考，識得分是非，識得點樣係身處嘅環境之下生存。無論置身係咩地方，其實都係有無限嘅框框同限制，其實都係係世界之中，好少部份上位者所設下嘅遊戲規則中生存，連自己所謂嘅“夢想”、“期望”、“自由”其實都係人哋嘅控制同洗腦嘅影響。係幾乎無可能顛覆規則嘅情況之下，點樣活出自己嘅人生同活得開心先係大原則。
每個人嘅目標都唔同，育兒嘅目標亦唔同。無得比較，亦無謂比較。反而有時諗緊，係咪有需要去教到佢太清醒或者太強？
例如啦。(只係例如，並唔係真係做)
教曉佢識踩單車游水甚至係唔怕小強，呢d實用性嘅嘢當然係好。咁教佢唔怕睇恐怖嘢(例如血腥嘢核突嘢)呢？唔怕睇鬼片呢？
如果小朋友從細就唔怕，就少咗害怕或者驚控嘅來源。但可能就少咗“同朋友去睇鬼片覺得驚”嘅樂趣？
又或者，父母覺得當時嘅社會現況、潮流“唔啱”或者“唔好”，咁應該點教個小朋友？個小朋友唔順應個社會，真係會開心d？但順應嘅話，就父母會睇唔順眼？
呢d只係是旦up嘅例子。重點係究竟要佢識嘅嘢，要嘅嘢，怕嘅嘢，要到咩程度？當然其實講到尾，好多嘢都會係自由發展或者控制唔到，但對於果d所謂好緊張嘅父母，又有無諗到呢個程度？
無論係教育小朋友定係大人，都係唔同嘅“期望管理”。“期望”都直接影響到開心嘅程度。如何拿捏“期望值”，先係人生嘅一大難題。
另外真係想講，經常見到有d網上圖片或片段，d小朋友好曳，然後網友就話生仔要考牌，或話d父母唔識教。真心覺得，就算有教，就算有用心，都唔代表教得到，或者小朋友長期會好乖好乖。一陣d小朋友好乖又話洗佢腦，一陣唔乖又話教唔到就唔好生。育兒真係一件唔簡單嘅事，不過人生就係有好多不穩定因素同變數先有趣。至於講到話教唔到唔好生，或者人類根本係毒瘤唔應該係世上果d，唔該自己去死咗先。
每次講開呢d課題，心中就有千言萬語想講，不過真係唔講太多了。作為爸爸，真心覺得健康同開心就夠。雖然呢兩樣簡單嘅嘢並唔係真係咁容易。
