唔知有幾多人有心機睇晒呢又? 尤其係後半段, 我真係覺得不吐不快呀~~
**********
成日都覺得, 世界係真係會愈來愈差o既。點解呢? 因為只要有一個人玩爛, 就會引致某d人照做, 到開始多人做o既時候, 就會變成"好似"不得不做咁, 好得人驚。睇下香港, 好多好多好多現象都係咁。以下舉一d唔使點諗, 一諗就諗到o既例子。
就由BB、小朋友開始講呀。以前我地細個時, 邊有而家d小朋友咁多野? 細個咩都玩一餐, 又唔使學呢樣學果樣, 可能同一年紀比較, 無而家d小朋友識咁多野, 但係同時都無咁大壓力。而家呢? 由BB開始已經話要點教點教, 又成日去咩班咩班學野(幼稚園/小學interview時如果真係無識咁多野, 係真係會比人差架喎), 攪到個個家長就算唔係怪獸家長都逼住要比d小朋友去咩學前班呀, 學d咩呀咁; 早排見好多朋友或識o既人, 個小朋友明明仲係BB咁, 已經話去咩班學野(歲幾就話學畫畫陶藝手工?!); 痴線架, 咁細個學得到d咩呀, 咪又係比錢人賺~ 最慘係好多家長都係人有我有, 或者係個BB識少樣野, 搵幼稚園或小學都蝕底咁, 真係好辛苦呀; 我覺得咁o既童年真係好慘呀! 何況比咁多錢, 入到間好少少少少o既地方, 真係同以後o既發展唔係好~~~~大關係咯。比我寧願比佢有個舒服開心o既童年, 只要教識佢"諗野", 識分是非就已經好夠啦~~
到大少少讀書都係一樣; 咩補習班呀、興趣班呀, 一個星期七日唔係返學就係學野, weekend果2日有時一日走幾場添。係咪痴線架, 講真, 一個人識咁多野讀書又叻, 都唔代表大個會成功、唔行差踏錯、會有錢或者會理你咯。我覺得真係好變態好反感。
到再大少少, 拍拖啦。都係果句, 呢個世界上o既standard只會愈來愈爛(唔係高, 只係爛)。其實人又點會唔容易被洗腦? 電影劇、電影、書...等等都渲染左人o既思想, 令好多人覺得拍拖就係"應該"點點點, 好多野變左例行公事, 無論有理無理都變左"老奉", 男o既成日都係"如果你愛我點解唔同我做愛?", 男人好色咸濕想攪野變左係理所當然(但係同時又會比人話賤格), 而女人就會係"如果你愛我你會想我開心/關心我/擔心我, 所以你要比錢/送我返屋企/尊重我/M到奉旨比我黑面...etc, 總之就係雙方都一副歪理。其實兩個人相處o既野, 有咩野係"一定"o既呢? 根本樣樣野都應該係睇情況case by case。有無錢、應唔應該使果d錢、有無時間、應唔應該用果d時間、有無精神體力、應唔應該用果d精神體力, 點樣先係efficient而大家都開心呢? 無人諗, 個個都只係諗"自己", 其實愛對方, 唔係應該"想大家都開心"咩?
婚禮都係不知所謂。講真, 結婚係兩個人o既事, 婚禮喜宴都係一d儀式, 同埋一個聚會, 大家開開心心就好; 我個人來講其實唔係好介意人地個婚禮喜宴攪成點, 因為佢地自己開心就好。有d人對自己o既婚禮喜宴好有心機, 當然會好正好appreciate(有個好友真係好有心機, 攪到每個細節都好正), 但係有d人可能無咁豐富, 我都唔覺得有咩問題。細個果時去飲, 都係簡簡單單開席前講幾句就上菜, 食到咁上下敬酒, 之後就埋尾散水。而家多過以前好~~~~多野; 擺酒每個位都有小禮物啦、要請婚禮司儀啦、影結婚相啦、成長片段啦...etc, 其實有固然係好, 有時間有心機有錢整係會開心d, 但係我最唔鍾意o既感覺就係"老奉一定要有"。想要咪有, 唔想要咪唔好咯~ 有時見到有d人, 真係為左有而有, 又唔係整得好(最明顯o既例子係小禮物), 我覺得好無謂, 不如慳返d時間心機好過啦~ 何必人有我有?
其實最想講同埋可以講得最多o既係而家個樓市、社會、經濟。雖然自己有睇開同埋有自己o既見解, 但係我唔係呢行o既人, 唔識講, 同埋亦都唔識得d terms同埋點去解釋一d現象。所以唯有長話短說。
早係我出來做野唔係好耐, 我已經覺得"樓市、社會、經濟"係愈來愈唔健康的。不論係政治經濟甚至係文化同人o既質素都係愈來愈"難頂"。都係因為有人玩爛, 所以愈來愈"利字當頭"。但係咁樣只會令所有野愈來愈差。
我記得當年領匯上市, 有個呀婆(sorry我真係唔記得咩名)反對, 攪左好耐; 好多人都鬧佢, 阻住晒阻人發達阻人買股票(我可以大聲話我無), 而家呢? 唔使講都知領匯係咩一回事啦, 係咁加租, 整死晒d鋪頭仔, 開來開去都係見慣果d鋪頭, 個個商場都係見到果d鋪頭咯, 仲要都係貴野咯。
仲有, 當年邊個話超市平、方便、乾淨衛生, 於是就連買送都去超市? 好多士多執左, 好多小鋪執左, d大公司財力雄厚, 整死晒d小鋪之後, 剩返佢地果時, 點加都得啦。唔知大家知唔知價錢, 但係你地知唔知其實而家超市d野係好貴o既? 呢個真係地產霸權o既一角。而家d野愈來愈貴, 人工就算加都加唔設, 其實個cost去左邊? 好多都係"租"咯。租係咁加, 小本經營做唔到, 死晒, 剩返晒d大集團。大集團加價, 消費者無得選擇之下局住買貴野, 哈哈, 其實都係自己抵死咋!大家又知唔知, 其實而家好多飲食集團、超市商鋪等等, 其實來來去去都係果幾間大集團o既分支? 賺來賺去都係果d人咋!
點解d地產佬又夠膽係咁加租樓價係咁升呢? 因為多左好多大陸人。大陸果堆有錢佬大把錢, 佢地使d錢好多都係黑錢來o既, 除左因為佢地洗得起, 仲因為佢地要將d錢轉為"正當o既錢"。咪落來HK使錢咯。你以為大陸d人好有錢咩? 其實七、八成財富都係係一、二成人手上咋(個百份比唔係好記得, 大約啦), 同香港一樣, 貧富懸殊咋。當年話放寬內地人來港, 好多人都話"好", 仲話可以促進香港經濟(我又可以大聲話我無), 而家咩情況? 係呀, 好多資金落左來香港, 但係d錢全部都係比地產商同大集團賺晒之嘛! 抬高晒所有野o既價錢, 但係本地人比唔起, 生活愈來愈辛苦咯! 咁叫好? 唔好話我有bias, 而家香港入面人o既質素都低左好多咯, 唔使我多講, 只係講公德心大家都明啦!
我又記得, 有個好友講過, 自由經濟社會就係咁, 弱肉強食; 其實我而家想問下佢係咪仲係咁諗? 大集團同有錢人只會諗自己點賺多d, 無d社會責任, 壓榨得就壓榨, 賺到盡(即係玩爛), 愈有錢就愈容易壟斷成個市場, 你真係覺得咁樣係應該? 生存唔到o既人就唔好係度生存? 如果係咁o既話, 只不過係用"錢"來"蝦人", 而唔係用"暴力"來蝦人咋! 無法律就孔武有力有o既人贏, 有法律就係有錢o既人贏, 法律仲唔係只保護有錢o既人??
要講仲有好多野想講, 不過我諗都係差唔多係度停好了。講真, 所有野, 只會愈來愈"爛", 睇下幾時爆而已。有時呢個世界的確係要reset下的。
完
p.s. 其實以上o既野, 我好多野都唔知點講又唔識講, 係大約係心中o既諗法, 不過只係升斗小民o既膚淺見解; 堅係想大家留comment講下對唔同野o既睇法或者講下咩野o岩同唔o岩, 不喜照插可也!
再p.s. 而家真係生活艱難, 眼見有好多人都好浪費, 真係好心痛。可以安定生活o既人真係要珍惜呀。
