本來諗住唔開過新噶一篇來講了, 不過都係算啦, 好耐無寫過雜記以外噶野, 就寫少少。
(事先聲明以下嚴重劇透)
先來個總結, 覺得最正、最交到戲、最多戲亦都係最重要噶人物係王學圻做噶李玉堂, 好正呢; 對於套戲, 個人覺得前半部噶文戲好睇d, 講下革命, 講下d人噶內心(尤其係李玉堂), 後半幾乎都係動作戲, 覺得一般普通啦, overall來講都唔錯噶, 值得睇。
劇情
劇情好簡單, 就係講我地噶國父孫中山來HK同其他革命人仕傾野, 清廷就派左一堆殺手來追殺佢, 係HK噶革命人仕就搵左d人保護佢, 因此其實套戲噶英文名"The Bodyguards and Assasins"好貼題呢。前半劇情講商人李玉堂由本來只肯捐錢而唔肯直接參與到後來好積極去搵人保護孫中山噶變化, 仲穿插左果幾個義士噶背景、幫佢噶理由同埋李玉堂個仔噶事。後半開始就講佢個仔抽左簽做孫中山替身, 成班人其實保護個替身掩人耳目, 一直沿路比人伏擊、點抵擋、點死等等, 而孫中山就老早係度開緊會傾野, 佢地只要捱到夠鐘就攪掂; 最後當然係死左好多人, 孫中山無事走佬收場啦。
人物
個人認為, 由於人比較多, 時間又唔充足, 幾位義士落墨係有限時間來講算係咁, 但係死果時就都唔係十分深刻咯; 最突出噶人物都係李玉堂呢。
王學圻 -- 頭先已經講左幾次, 做得好好呢, 係貫穿全套戲, 帶住個劇情噶人物; 後半出得少d。最後倖存但係應該係最慘噶一個, 四十幾歲得一粒仔但係個仔死埋...
梁家輝 -- 為革命奔走同埋一直勸李玉堂幫手噶陳少白; 以佢來講, 唔難做吧, 都做得幾有說服力。最尾應該無死吧。
胡軍 -- 仍然都係好兇惡好有型(好似肥左...), 超好打; 不過臨尾發癲果度有d無謂...最後d手下死晒, 明知車入面果個唔係孫中山, 但係好似都為左要完成使命咁, 照殺入面果個人...當然都係逃唔過死噶命運, 思想守舊愚忠, 有d無謂噶一個人物...
甄子丹 -- 都有d內心戲噶角色, 但係主要都係打為主, 不過佢個角色唔係最好打果個呢, 佢對付噶係胡軍噶頭o靚, 即係第二好打吧; 因為以前噶老婆、而家係李玉堂噶妾侍范冰冰出口而幫手, 最後死得有d無謂, 但係佢個角色都估係應該會死噶。(點解佢最尾撞完隻馬隻馬會唔見左?)
謝霆鋒 -- 做拉車噶車伕呀四, 唔識打噶, 由於不嬲都好尊敬佢老闆李玉堂同埋同少爺好friend而肯為佢地做事。捱到最後階段都未有事, 但係最尾想拖延時間, 都係死左, 我覺得最唔應該要死, 死得最無謂噶人物。
李宇春 -- 一出場d人就笑, 係佢個不男不女形象噶問題姐, 其實都唔係做得好差; 對付返自己噶殺父仇人, 好壯烈咁死左, 本來估佢唔使死, 不過都算死得合理。
巴特爾 -- 無錯, 就係打籃球果個巴特爾, 咁大隻做識打噶完全有說服力; 比成班扮成普通人噶殺手拮左好多野都唔死, 臨尾仲要拉倒成個棚先死, 都幾慘烈; 最令人印象深刻當然係飛身入樽打爆人個頭果下啦~~
黎明 -- 以前係有錢仔為愛變左乞丐噶劉公子, 應該係最打得果個, 感覺上起碼有三份一以上噶人係佢攪掂, 亦都係留守最後一關噶人(一開口就話, 最難嚷留比佢, 型到爆); 同最後一班人打, 殺左好多個, 雙拳敵四手, 但係都殺晒, 一夫當關. 好勁; 身受致命重傷, 最尾當然唔夠一d事都無噶胡軍打, 死纏左一陣死埋; 最好笑, 係臨死見到幻覺果一眼: 原來當你愛上父親噶果位妾侍, 係李嘉欣...果下真係忍唔住笑出來; 而李嘉欣雖然得一個鏡頭, 但係都ok呢, 做到個效果。
任達華 -- 只係客串做李宇春老豆, 但係都幾印象深刻呢。力戰而死, ok呢。
王柏杰 -- 做少爺噶佢, 其實都做得好唔錯, 好有果種書生型革命青年feel; 去到最後, d人死晒, 諗住佢應該都唔使死啦掛, 點知胡軍都係發癲照殺, 又係死得好無謂噶一個...仲有, 老早有槍唔開, 攪到死咁多人...
范冰冰, 張學友 -- 配角同咖哩啡; 范冰冰一如以往交到要交噶戲, 學友就一出場就死左, 果下都幾震撼。
睇到呢度, 大家發覺其實出場人物有九成係死噶...其實我覺得有d係唔使死的...都幾無謂呢。一直唔出樣噶孫中山, 到最後先有樣睇, 最尾一幕影住佢流左d馬尿就完。
**********
附上陳德森好坎坷咁完成呢套戲噶經歷噶訪問。值得一睇呢, 睇下原本佢想點。
完
