令我流淚的歌

由細到大, 大家應該都聽過唔少好歌, 其中有一類係賺人熱淚的歌。係呢度只係講一d剩係聽到就令我自己眼濕濕o既歌(唔係講好令人感動果種, 因為計埋會好多), 而唔包括因為睇埋電影、電視、卡通片等等o既歌, 因為呢d有加成作用, 而且要計埋又係會有好多, 所以就唔講了。以下係由細到大, 我有印象同埋仲記得, 而又自己聽時會眼濕鼻酸o既歌(當然一定會有好多唔記得左): (排名不分先後)

(另外, 我個人係幾眼淺的, 自己唔開心時又唔點會喊, 見到d感動野或者睇到d令人感動o既野時, 就好易喊)
(再另, 其實係眼濕鼻酸, 個title話流淚只係好睇d罷了)

***** *****

遙遠的她 -- 呢一首第一次有印象聽, 係細個時去表姊物料供應署o既攤位遊戲日時, 聽到個廣播播緊的。好記得當時o既情境。我係度唔知排緊隊玩定係做緊咩, 聽到呢首歌, 覺得好好聽!! 而且好感人, 會令我眼濕濕! 首歌又好聽人又唱得好(張學友), 正!
"遙遠的她, 不可以再歸家; 我在夢裡卻, 始終只有她...遙遠的她, 可知我心中的說話, 熱情若無變, 那管他滄桑變化..."

空凳 -- 另一首感情真摰o既歌。講親情得來又極具說服力, 而且又帶得出"子欲養而親不在"果種感覺, 次次聽親都會鼻酸! (最衰我自己又不嬲有自己未真係感受過但係又會有代入感o既感覺) 大家一定要好好珍惜眼前人同好好對待自己至親o既人呀~~ Danny Summer又唱得好激昂, 佢當年憑呢首歌拿獎絕對係值得的~~~!
"曾懶說半句我愛他! 懶說半句我愛他! 過去我說, 我最是要緊; 今天發覺最愛他! 呼叫永遠也愛他! 聽我叫喊, 只得一張空凳!"

絕戀 -- 愛情, 唔係一定要生離死別先至係慘。而家好多歌都係慘o既情歌, 而且都有好多死別o既歌, 但係我都唔覺得有幾慘。當然d人唱得唔好係一個原因, 但係主要問題係d歌詞度, 好多時都係一味話慘又唔捨得咁。我自己好多時都比較唔鐘意d懶係慘o既情歌(有睇開我blog或者熟我o既人都知), 但係呢首係例外。呢首係一首講死別o既歌, 但係歌手唱時唔會做到自己好慘咁, 只係有一種無奈o既感覺, 孤單咁係舊地等待不會回來o既愛人...全首歌哄係用結他和, 加上蔡齡齡o既精彩演出, 感動到我!
"假使愛長存心裡, 假使我共你相距, 就是天邊海角亦會等下去..."

手錶 -- 呢首歌大家可能唔太識; 係李克勤係寶麗金時代o既歌, 勉強入到佢係寶麗金出o既精選碟o既其中一首歌。Melody唔算好好聽, 但係d歌詞同編曲(尤其係歌詞), 係講母親o既, 同空凳一樣, 又係一樣物件令人想起至親o既鼓勵, 而且唱到後段亦暗示了"沒法再見她"; 加上當時o既李克勤仲係唱得幾有感情的, 唔似而家咁, 所以呢首歌有時係會令我聽聽下唔忍心聽落去, 好孤寂o既感覺! 建議大家可以聽下。
"沒法再見她, 各有各遠飄, 與我到處去, 只得此手錶; 沒法再見她, 各有各遠飄, 永遠到永遠, 她的愛難忘掉..."

我不是一個人住 -- 已淡出o既靚女歌手蘇慧倫o既歌。有必介紹下, 呢首歌有2個version: 普通話同廣東話版。普通話版係"我一個人住", 而"我不是一個人住 "係廣東話版。"我一個人住"o既內容係講個主角同男友/老公一齊住, 但係常被冷落, 令她覺得好似一個人住般; 而"我不是一個人住"就相反, 主角所愛並唔係同佢一齊, 但係女主角仍然心中愛著對方, 對方仍然係心中存在, "不感覺我獨住, 像住在一起", 歌手唱時仲要係帶點喜悅, 好似同心愛o既人一起時o既腔調來唱; 但係呢種感覺配上歌詞, 呢種傻勁, 反而令我更覺感動! 我最容易就係被呢d單純、正面但係可能現實係唔開心o既情況而受到感動! 蘇慧倫好得呢! 反而對普通話版無咩特別感覺。可惜, 我手頭上得普通話版..."我不是一個人住"唔見左...

Mr. Moon -- 呢首大家唔會識的了。係鼓機o既歌。同"我不是一個人住"情況相似, 女主角同愛人分隔兩地, 但係歌手並唔會唱得慘, 又係一種積極同純真o既諗法: "No matter where you may be, my love will travel to you, coz i leave my message to the man, on the moon! please, tell my story to my love, Mr. Moon, I love him so! please, show my tear drops to my love, Mr. Moon, I love him so!" 首歌亦都好聽呢!

MR -- 楊千嬅好幾年前o既一首歌。第一次知首歌唔係聽到首歌, 而係係朋友ICQ info見到, 覺得段詞好正; 過左好耐先有機會聽成首歌。不嬲唔算聽好多楊千嬅o既歌, 但係好鐘意呢首! 歌詞中對愛人o既依戀同鼓勵感動到我, 雖然係一首幾開心o既歌, 但係感動處我自己會聽到鼻一酸的(正傻仔-.-), 總之就係鐘意。
"已經夠喜歡你, 什麼也別要改, 從來無人嫌你這樣, 你這樣才像你"

她來聽我的演唱會 -- 一個好完整故事, 一個女人的唏噓。亦都因為有故事, 想像空間亦大。首歌前大半段都無咩野, 係最後一段最正! 果種對現實o既無奈同埋對已經過去時間o既遺憾, 張學友輕描淡寫咁唱左出來, 好有feel, 係05活出生命演唱會, 一支結他+一個人唱攪掂, 正!
"她來聽我的演唱會, 在四十歲後聽歌的女人很美; 小孩在問她為什麼流淚, 身邊的男人早已靜靜入睡; 她靜靜聽著...我們的演唱會..."

十個救火的少年 -- 完全同愛情無關, 達明一派o既經典歌之一(又未係最經典); 細個無咩感覺, 係大個d明白首歌講咩先至有感觸; 人性醜惡, 係短短一首歌表露無為; 雖然用左輕鬆o既手法表達, 但係諗深一層3個勇敢o既人就此葬身火海, 慘! 唔抵!
"在這夜這猛火像燎原, 大眾議論到這三位少年, 就似在怨 用處沒有一點; 在這夜這猛火像燎原, 大眾議論到這三位少年, 亂說亂說 愈說祇有愈遠..."

暫時諗唔到了, 而且已經4點, 一定要訓, 係咁多先啦!

大家又有d咩類似o既歌呢? 多d出聲講下啦~~

完