新加坡遊記

前言

今次個trip自己算係發起人, 起點噶諗法係"探我噶best friend呀馬", 本來只係得2個人(我同民民)噶trip慢慢加到4個人(加埋呀源同Kenneth)。事前都OK放心, 信得過呢4條仔夾埋應該問題唔大, 結果應該都還算OK吧。

3個同伴入面, 之前已經同過2nd best fnd(講到明都係咁講, 係2nd哈哈)民民去過旅行, 反而識左呀源(Best fnd in CityU)咁耐都未一齊去玩過, 再加上相識一年但係相逢恨晚噶kenneth, 呢隊4仔A team就集結完成。

遊記內容主打會講行程同埋comment下見到噶野, 食過噶野, 主要係敘事多, 因此反而想係前言、後語打感想呢。不過根據我一向諗到咩打D咩噶習慣, 相信到最後都係打到好似我一直度講緊野咁, 哈哈。

係個trip pay得最多effort噶一定係民仔啦, 事前功夫(book酒店, book機票, 事前買環球one day pass, 唱定4個人噶錢)全部都係佢一手包辦, 真係要係度大大咁鳴謝一下。自己只係問去過SG噶同事拿左行程同埋借左一堆旅遊書返來, 同埋同大家傾過下D行程, 其餘都無點出過力, 身為發起人實在都無咩慚愧, 反正一早就預左叫朋友們幫手了。(係呢一刻都仲未比返錢比民民添) :D

成個行程之中, 由於4個人都係吹水怪, 所以基本上係廢話百出, 笑料不盡。由於大家係不停咁爆肚, 因此不能盡錄啦。大家係4日之中不停咁話民民"精算"同埋"神", 引發左好多後績噶野都係講唔到的了。(仲有趁而家自己記得寫低噶"Jubman"、"出來啦!"、"出得來還, 預左要行"、"休息係為左行更多路, 行更多路係為左食更多噶野"...etcetc)

前言都係唔好講咁多, 留待後語吧! 以下係我地4日噶行程(同埋同行程有關、時間性排列噶感想)。

Day 1 (出發)

由於搭cheap cheap虎(貓?)航噶關係, 出發、回程機噶時間並唔係早機去、晚機返。11點幾機, 換來噶係唔需要太早起身出發。9點幾10點終於係機場集齊人馬, 係千燒百味食個豐富噶早餐(食完之後下一餐要起碼5點先係SG先食到了)之後就入閘過關登機出發。

一路無話, 係好狹窄又無飛機餐無水飲噶飛機渡過左4個鐘, 終於到達新加坡。由於SG好細, 4個人搭的士去酒店都好平。去到酒店, 見到門口有貓貓~~~ 好開心, 好靚噶喵喵來呢, 幫佢改左個名叫白虎(之後都有再見到佢, 唔多提了)。係我影相噶時候民民已經做好check in手續, 上房啦~~

Kenneth同佢2個無咁熟, 於是就同我同房。間酒店係平價D的, 所以無G/F富麗堂皇Lobby, 間房唔大, 朝早無早餐, 咁其實仲好呢(尤其我地想出去四圍食野)。不過最可惜係無wifi(係SG好多地方試來試去都係無, 所以4日無online)。settle down之後都差唔多5點, 即刻出去食野~~

原來住噶地方好近逸群雞飯, 於是就行過去, 順便感受下新加坡普通噶街道同風土民情(?)。只係10分鐘島路程就到lu。(幾日之後同係果邊做野噶best fnd傾先知原來果條街果幾間雞飯都OK的, 並唔係"逸群"特別好)不過當時未知就緊係去旅遊書介紹架啦。主打噶雞油飯好味道(尤其食完早餐之後都無食過野), 個魚鰾湯都OK, 4個人計返都係40蚊島一位, 好抵呢。(佢係唯一一間menu無價錢噶咯...之後去左第間, 仲大碟過佢。)

食完就趕緊往Safari出發。行去City Hall站(係一個可以轉幾條線噶中間站之一)都好近, 就搭好幾站車再轉線去"宏貿橋"站(SG朋友叫佢做熊貓橋), 落車轉巴士去。地鐵+巴士加加埋埋差唔多成粒鐘, 係SG算係遠噶地方了。係度講一講地鐵。SG地鐵有幾條線, 可以去到我地想去噶大部份地方, 而儲值飛每一程都平過單程好多, 我地初初去到唔知頭唔知路, 見儲值飛要收手續費無得refund所以無買到, 蠢左。單程飛好麻煩, 每一次用完之後, 要去返部機還返同refund返1蚊, D機又慢又要排隊, 好晒時間, 不過算啦, 經驗來噶。

終於到左目的地, 期待噶行程之一 -- Safari夜間動物園。自己不嬲都鐘意睇動物園, 所以好開心呢。園內有導覽車, 會行一個圈亦會有人解說, 都幾多人排隊, 等左幾架車之後就上車啦。行左一半島中間有一站可以落車, 我地就落車自己行另一個車經唔到噶圈。由於動物園都係果d野, 所以都唔係度多講啦~~ 亦都因為夜晚又暗噶關係, 好難影相, 所以都放左好少相上fb了。行完果圈再上車, 發覺呢架車噶導覽講解得生動好多, 有氣氛好多呢。完晒成條線之後我地就落車去睇動物show。睇完呢個幾有趣噶動物show之後就走了, 其實真係想有多d時間慢慢行晒成個動物園呢~~~(仲有, 成個動物園噶佈置同setting都好正好鐘意)

搭巴士去另一個地方, 行去"老巴剎" -- 一個半露天街市咁樣噶地方食宵夜。食左串燒、馬拉盞、C蛤、燒魔鬼魚同埋飲左好似幾正宗噶印度拉茶, D串燒噶醬好味, 燒魔鬼魚都好少機會食到, 滿足噶宵夜呢。之後決定慢慢行返去酒店(大約半個鐘路程啦)。

行下睇下新加玻四圍噶夜景, 路經一度好似係bar定disco噶地方, 有好多著得好sexy好索噶女仔係門口等入場(等人溝?), 可惜夜同埋相機無咩電, 無影底lu(無膽就真XD), 行過少少就係新加坡地標魚尾獅, 影左夜晚噶佢同埋海景, 相機就無電了, 都叫O岩O岩好啦。影晒相行返酒店都成點了。要提一下Kenneth噶方向感同認路能力都好犀利呢, 民民都已經係好OK, 但係Kenneth直頭係之前睇過下地圖之後, 就全程都唔使望唔使睇就照行, 仲要完全O岩晒方向呢~~

返到去沖完涼大家hea傾左陣偈就返自己房。SG電視有一台係電影台, 我地幾日都見到播唔少好戲呢, 晚晚都睇左D戲先訓, 哈哈。雖然第二日一早要去環球, 不過都hea到3點先訓。

Day 2 (環球Grand Opening)

一早起身, 我地hotel對面有個foodcourt, 都好多款野食, 我地就過左去食個早餐先。食完早餐就出發去環球啦。我地酒店好近地鐘站"Bras Basah"(中文應該係"百姓"咁解), 行5分鐘就到, 好方便, 真係又平又正。搭左唔使好多站就去到一條線噶總站, 再轉Sentosa Express搭個單軌鐵路, 得4站 Vivo city(即係地鐵轉車果站) -> 環球影城 -> 一站唔記得咩野(玩樂設施例如滑草果d就係度) -> 沙灘(入左去之後如果唔出返來係係任搭噶)。當然就係去環球影城啦。

我地呢日撞正環球Grand Opening, 好抵呢。一去到影下相, 就等睇Opening Ceremony, 睇完之後有D表演, 巡遊, 影左好多相同video, 到11點島就比人入去玩啦(之後聽返SG死黨話係新聞見到我地上左鏡呢!)。唔知係咪因為O岩O岩過左人地噶public hoilday定係因為早, 我地入去即時玩晒想玩果幾樣野都唔使排隊, 好開心! 係度唔多講環球入面有咩玩同有咩show睇啦, 上網同睇書加埋睇我D相都睇到, 所以慳返唔打了。總之就係好玩同埋D show都好睇啦~ (記一記: revenge of mummy(類似space mountain), Jurassic Park激流(濕晒身), Shrek 4D影院, Masagascar街頭歌舞表演)

有人唔玩機動遊戲, 所以一齊無玩。時間尚早, 未夠鐘睇shows, 於是就搭Sentosa Express入去沙灘度睇下。入到最後一站, 有free shuttle兜成個沙灘區。入左中間一個沙灘位睇下, D風景同個沙灘都幾靚呢。係果度噶foodcourt是但食D野, 估唔到旅遊區食野都唔貴呢。一般來講SG兌HKD 1對6, D野都唔係平, 但係我地食好多餐, 包括係旅遊區食野都係三十幾四十蚊呢。

去左沙灘唔係好多時間, 差唔多夠鐘就出返去環球影城, 睇shows。又係影左相唔多講, 總之係好睇(XD), 同埋不停地濕身啦。(記一記: Waterworld(水上+爆破+drama), Monster Rock(Live rock song + 跳舞表演), 電影特技場景(大風爆炸灑水又濕身))

睇晒D show之後, 我地想睇埋夜晚噶煙花(當日噶巡遊、延長到9點、同埋夜晚煙花都係opening果日先有), 但係仲有時間, 我地就搭車去Chinatown(出返Vivo City轉地鐵幾站, 好近下)行下。雖然之後都會再去Chinatown行同埋食, 但係反正有時間同埋果度多野食, 所以決定去一去。

去到Chinatown, 同SG其他地方個feel好唔同。Spot左之後會去買手信噶地方, 就行下同埋搵野食。搵到個好~~~~大噶foodcourt, 真係咩都有得食, 超大。大家係度食左d野(炒粿條, 蔗汁, 紅豆冰, 魚蛋粉, 窩貼), 之後, 再行下附近D街就又入返去Sentosa噶area。

本來想睇Song of the Sea, 不過因為無買定飛, 爆滿左所以睇唔到。離煙花仲有D時間, 於是入左去Sentosa另一邊噶沙灘(沙灘有2邊噶, 我地去左日頭無去果邊), 坐左陣同埋睇下夜景, 到差唔多就出返去環球了。(聽返SG死黨講Sentosa入面有全侍應著泳衣噶bar, 不過我地都無去了)

返返環球(第三次了, 我地叫做三顧環球XD), 霸個靚位準備睇女仔...呀唔係, 係睇煙花, 等噶時候我行開去睇左場70年代歌舞表演, O岩晒我呢D老鬼。之後睇煙花, 普普通通啦. 睇完煙花就散水啦。好多人一齊出返去Vivo City, 我地發揮HK人醒目精神, 搭掉頭車去沙灘果邊再原車出返來, 有得坐又快左, 賺晒。(記: Kenneth講最值錢噶"羨慕眼神", 同埋我做打手噶果一句"Beach!"之後放人XD)

出返來Vivo City, 去左foodcourt食野先。食左個唔記得叫咩甜噶餅、燒雞翼、同埋好好味噶叻沙~~ 食飽就返酒店, 試左7-11賣噶楊桃汁, 本來諗住可能好味, 點知得個甜字, 又唔酸, 好怪, 後尾Kenneth講起話似華梅水味, 大家先知點講陣味出來, 總之好難飲。是晚2點9曼聯對巴塞決戰, SG電視有得睇, 我同民民諗住睇。沖完涼大家又一齊hea下傾偈, 我就諗住訓下先, 叫民仔開波叫我, 結果係民仔無叫我, 佢自己一個睇左, 其餘人都訓左覺了。其實我都有D想睇呢~

當日由於預左濕身, 於是著左對Crocs行左全日, 對腳好痛呢~~

Day 3 (食+行+買)

第三日噶行程就hea好多, 無咩要趕住去噶。自己一早醒左, 出去行左一轉, 不過見到落大雨, 所以都無去遠。返返來大家都好似未起身咁, 於是再恰下。到差唔多中午大家先起晒身準備好。都叫臨時決定好要去咩地方, 於是去foodcourt食d野先。食完出發去左小印度果邊先(發現黃亞細就來夠鐘收鋪)。小印度又係另一番景像, 同SG其他地方或者Chinatown都唔同噶。係地鐵站行2個字島就去到黃亞細食肉骨茶(有少少趕係佢收工前, 同埋星期一唔開!)。原來SG肉骨茶都有2款噶: 一款係我地HK食開藥味重d, 另一款就係好似黃亞細咁好重胡椒味噶。雖然我個人喜歡前者, 不過後者都好食呢(同埋可以添飲一次)。(之後聽返死黨講果度噶豬腸都好味, 可惜無食到了~~) 提一提, 果間野係無冷氣的。

之後慢慢行返去小印度地鐵站, 行下經過下果度噶社區。個感覺完全係另一樣野, 同其他SG地方都唔同。之後搭返去SG噶中心d噶地方(City Hall, Raffle Places, Clarke Quay等等係類似HK中上環果d地方?), 行左好長噶路, 睇左日頭噶新加坡河、沿河邊噶鋪、日頭噶魚尾獅等等(食左榴槤雪糕夾麵包), 最終行埋去Chinatown(中途d野大家睇相算了)。

時間關係(又係趕佢收工前), 先去遠東廣場食亞坤Kayan多。個廣場都好唔錯, 不過可能因為星期日, 所以大部份店都關左門(+_+)。去到間店, 個多士好脆, Kayan醬甜甜地, 好鐘意食個蛋! (食過其他國家噶蛋, 係講緊是但一個其他地方噶蛋之後, 你會發覺HK噶雞蛋係無味, 完全唔好食的)

食完野買左少量手信就行下Chinatown(正式行啦)。行左好多橫街雜巷, 搵晒要搵噶店同買手信噶地方。又係唔多講啦(某人買左過千蚊噶手信, 好似拿住2隻乳豬咁, 威到盡)。5點幾, 大家拿住各種貨物返酒店, 同埋約我噶死黨Best Fnd呀馬出來食晚飯。

返到酒店放低野settle down之後, 就出返來, 搭地鐵去東岸果邊meet呀馬。終於都見到佢啦! (成個trip噶起源就係想探佢) 佢瘦左好多呢, 同埋見到佢真係超開心。係地鐵站行唔使2個字, 去食出名噶"無招牌海鮮"。呀馬食完之後都話平過佢去開其他地方噶海鮮呢(而且其他地方好多間都係HK噶珍寶、東海集團)。食左麥片蝦、胡椒蟹(x2)、Chili蟹(x1)、馬拉盞炒菜、飲左Lime water、薏米水, 總之都係好味, 大家自己睇相啦。最正係前後食左三隻都大隻噶蟹加埋D立雜野, 圍到來每位都係二百幾蚊, 好平呢~~

食飽飽呀馬帶我地行係附近噶紅燈區。去到時我地都奇怪架啦, 竟然成條街都係男人, 一個女人都無, 我地仲比人望添! 之後有警車經過, 先知咁O岩係掃場時間, 所以睇唔到D服務行業人士了~~~ 不過咁樣反而夠膽拿相機出來影幾張相呢。

之後呀馬同我地去夜晚噶Clarke Quay。果度有一個好大好靚噶酒吧區。個環境好舒服好靚, 好有feel, 仲有好多間bar有Live band添! 不過我地就只係行左個圈, 無坐底飲野了。影左D夜景同埋合照之後, 本來想去試下另一款藥味重D噶肉骨茶, 不過收工了, 食唔到, 之後就散水返酒店了。

是日諗住想涼爽D, 當日都係著Crocs出左去行, 但係到中途開始, 已經開始超痛, 之前果日噶痛未回復呢! 所以買完手信返酒店之後再出返去時換返波鞋, 舒服好多!

Day 4 (最後一hea)

最後一日, 無咩行程, cheap cheap貓航4點機, 2點幾都要到機場了。又唔多順路於是都無專登去榴槤街食榴槤了, 可惜。反正無咩做又無野要再買, 又要食飯(又係食完呢餐要夜晚返到HK先有得食), 於是決定encore海南雞飯(酒店行過去又近)。Check out之後放低行李係酒店, 行去海南雞街, 食左另一間(因為聽左呀馬講唔一定係要食逸群), 發現都係平, 而且仲大碟D添!

食完仲好早, 臨時決定不如再去Clarke Quay食果間肉骨茶啦, 點知去到見到星期一關門(發現除左星期日好多店唔開之外, SG另外有好多鋪星期一都係唔開的), 白行一趟。Encore左個榴槤雪糕夾麵包之後就返酒店拿行李, 再搭的士去機場了。

去到機場, 由於我地搭平機噶關係, 係去budget terminal, 個場都cheap好多。係機場問左竟然係某D Terminal入左閘先買到班蘭蛋糕? Anyway無深究到, 無買就算了。4點起飛, 8點島返到來, 返到屋企9點幾, 完結左成個旅程了~~~

後語

呢次旅行對我來講幾開心呢。可以同幾個熟噶朋友一齊旅行, 吹水up屎, 仲有傾下心事, 真係人生一大樂事。雖然係好多時候, 臨訓前、行緊路無傾偈時, 又會諗起好多以前噶、唔開心噶野, 好彩個行程都開心, 好多時都可以忘記到。

如果大家想對行程知得更多, 就要睇下我upload係facebook上面噶album啦。如果想再知多d, 就唯有親身來睇我係自己電腦(或者相機)噶full album, 仲拍左好多片添!

值得一提噶係, 新加坡真係好多短褲仔呢, 好多美腿好開心~~ 哇卡卡卡~~ 我地幾條友(其實主要係我同K先生)係度睇女仔仲指指點點。果邊唔係好似日本台灣香港咁, 唔興化濃妝, 一樣有好多靚女, 講真都係環境同埋廣告影響, HK等地先多人化妝姐, 係其他地方D人都唔係咁化一樣見到好多靚女啦。仲要人地日日曬太陽(仲有我覺得係有做運動), 勁fit勁好睇。成日躲係屋內化妝係咁食, 唔做運動又話要減肥果d HK女仔真係要反省下呢。

係呢度不得不提下, 要多謝下人呢。多謝各位團友縱容我噶任性(有無呢?) 好似大部份行程其實都好似係跟我意願咁, 都係我拿主意幾時去邊去邊, 唔好去邊去邊咁。另外我訓覺又唔早訓但係又早起, 同我同房噶kenneth應該成日覺得唔夠訓, 比我嘈住晒, 哈哈。仲有我沿路成日停低影相, 差D連紅燈區都想拿部相機出來影, 哈哈, 見到貓貓又係咁影, 去到夜晚自己相機無電仲拿埋民民舊後備電去用...etc, 總之睇來最麻煩都係我呢, 不能盡錄, 哇卡卡。

希望今次個trip大家都開心, 同埋期待下次再同好友們再去旅行啦~~~
(預告: 東京體察災情振興經濟之旅?!)

完