hea講西遊

西遊記係我最早接觸、亦係我第一本睇左原著o既中國古代四大名著(其實原著來講我都只係睇左呢本同三國演義)。好鐘意作者噶想像力。而家資訊發達, 百花齊放, 太陽底下無新事, 好多idea、事物、"橋"對大部份人來講都唔係d咩新鮮事, 當係當年來講, 呢套fantasy神怪小說真係幾新穎, 因為佢將佛、道、仙、魔、精、怪等等o既野都包晒入去, 而且都幾精彩架! 當然, 已經有好多人評論、討論過呢本書, 我都無需要再講佢噶文學呀、歷史呀果d價值, 只係提下自己對於呢本書o既感覺姐。逐樣講下先:

一. 人物

一部好噶小說, 最緊要噶野之一就係人物噶塑造。鮮明噶人物絕對會令小說生色不少, 而且亦會好客易諗到故事噶發展。西遊記入面, 呢樣野真係做得好色。大家對於入面好多人物都應該印象深刻吧?先唔講敵角, 單單係四個主角已經有好大特色, 同埋最正噶係佢地都有優點有缺點, 好人性化同真實; 而佢地之間噶性格落差又產生好多火花出來。呢個正正係個故事最吸引噶地方。

主角:

唐僧 -- 其實睇得西遊記多, 唔多唔少都會覺得呢條友煩。係, 佢係得道高僧, 佢係正人君子, 佢係坐懷不亂, 佢係呢個故事入面"正純"噶化身, 但係有時真係幾頂佢唔住。首先, 佢除左係咩金禪子託世, 一出身已經係尊貴人物, 同埋負責擔正去取經(同埋同其他國家外交)之外, 其餘大部份時間都係一個trouble maker。

其實佢最大噶作用就係"被敵人捉、被自己人救"。咁我覺得個故事噶主題都係要佢受下九九八十一難, 問題唔大o既, 鬼叫佢唔識打又唔識法術, 係局住比人玩架啦。但係最大問題係佢好多時候大義凜然, 但係連對敵人都心軟, 有好多次奶野都係衰佢自己o既。

另外, 唔知係咩第一印象衰左噶關係, 佢對孫悟空噶信任程度極低(但係同樣地豬佬都係信唔過, 佢有時竟然會信豬唔信馬嬲); 有N次遇險都係因為唔信孫悟空而奶野。再伸延落去, 佢話係得道高僧, 心性應該控制得好好, 但係佢對住孫悟空時噶EQ係極低, 成日都嬲佢又唔信佢講, 得閒仲念佢唯一識噶法術緊箍咒, 好攪唔攪攪佢最野得果個徒弟, 真係抵死o既。最衰噶就係, 佢真係遇險噶時又狂叫悟空喎...

孫悟空 -- 首先, 我要好肯定咁同大家講一句, 佢係西遊記世界入面, 雖然係屬於好打果批, 但係點都唔係最好打果幾個, 或者應該話佢只可以做第一線好打, 但唔係最勁咯。

大家可能一諗孫悟空第一諗到噶野真係"好打"、"最打得", sorry咯, 佢係果四個主角入面就係, 係成個故事入面就一定唔係。大家會話, 嘩, 佢大鬧天宮, 無人有佢乎喎! 有呢個疑問好正常, 請聽我一一道來。

拿, 並無老屈。好唔好打, 當然包括埋戰鬥果時用計仔或者法寶啦, 佢自己用緊支棒都係法寶來。好, 就算唔計金角銀角呢d蛋散有7件法寶攪到佢焦頭爛額(果個咩瓶一叫佢個名就困左佢入去, 綑仙索一野就綁左佢), 齋講戰鬥能力, 其實係故事入面贏過佢或者攪到佢無晒乎噶比比皆是。我是但舉d例啦: 故事開始好似無奈有隻蜈蚣精, 次次打打下唔夠打就一野放條尾出來啄佢一野, 佢就即刻頂唔住, 之後佢要搵咩日出星君(之後話佢係隻雞來o既 =_=), 咯咯叫左幾聲先贏到佢; 牛魔王超勁, 孫悟空都無打贏佢, 仲叫左三眼二郎神、梅山六兄弟, 仲有一大票唔知咩神仙來, 都攪佢唔掂, 最後都係出返佛祖陣營先擺平到件事。之後六耳彌猴, 直頭同佢所有數值一樣, 邊個都贏唔到邊個, 又係出佛祖先得。仲有後期去到唔記得咩國, 有三兄弟獅、象、鷹, 佢地三個唐僧徒弟各自 1 on 1 都唔夠人打, 得孫悟空打唔過逃走到咋。最後係搵左三個佛祖陣營噶人來先攪掂。

其實故事入面N次麻煩都係要搵人來攪掂, 佢謀略同武力都唔係好夠人來噶; 好彩, 出外靠人照, 雖然佢無咩朋友, 但係憑住唐僧噶面子, 仲有佢武力威逼, 都好多人幫拖, 先至可以順利取經咋。

豬八戒 -- 呢個真係無咩好講啦, 性格極度鮮明: 咸濕, 懶, 卸膊, 搬弄是非噶小人...等等, 相信唔使我多講大家都好熟悉。不過講真, 個故事亦都係因為有佢係度而變得更加有趣, 有唔少事情其實佢先係X-facotr。

沙僧 -- 功能性人物; 總要有人負責晒其他雜務、陪跑、串場等等噶任務, 而佢就正正係呢個角色。呢種唔多出聲噶角色, 係故事入面都係有必要噶, 好多時有好多事件就係爭呢對手而做唔出d咩來, 佢噶用處就係呢對手同埋呢把口, 對於加強以上三個主角噶行為來講好有幫助架。

馬 -- 佢就辛苦咯, 平時都無咩幾可有戲交, 不過, 係某2個故事入面, 佢係有用架! 佢化身返做人型去救唐僧, 同埋潛入敵陣呢!

神、佛陣營:

佛祖果邊就幾乎係最勁同贏晒, 無咩好講。
天庭果邊, 就大部份都係廢廢地噶人, 連孫悟空一條友都攪唔掂, 算吧啦...玉皇大帝就擺明係一個懦弱o既廢人, 只係得勢果時就突然發到惡, 其餘果d太白金星呀、各方土地呀果d都只係蛋散, 亦可見到係迂腐同埋陳舊階級體制下充滿冗員同埋毫無生氣噶機構。

不得不提噶係觀世音菩薩, 佢係出得最多同埋最緊要噶加血人物, 次次都係redemption靠晒佢。

原本想講下多d, 不過都係講下敵角算了。

敵方陣營:

講少少自己印象深刻d噶。

牛魔王一家: 我覺得牛魔王真係勁喎, 起碼同老孫同級數, 叫係攪左好耐先攪得掂佢! 雖然有一個老婆一個外遇, 不過當時噶男人三妻四妾, 佢又叻, 有個狐狸精實屬正常。另外, 其實佢都唔係果d要食唐僧肉同埋想阻住晒噶妖怪, 佢只係想報仇咋! 雖說佢個仔紅孩兒(又係另一個攪到老孫頂唔住噶敵角)係曳, 但係係佢噶角度, 教仔係佢自己噶事, 而家比人攪到妻離子散, 佢有咩理由唔興? 所以我覺得佢情有可原!

白骨精: 我都唔明點解佢可以咁出名, 西遊記經典噶故事入面, 佢硬係比人提得算多, 人人都講得出"三打白骨精"。呢隻妖怪噶謀略值真係好低, 明明唔夠人打, 硬係要變身來呃唐僧, 最後雖然呃到幾野, 但咪又係比人一棒打得死, 真係低能。不過呢個三打白骨精噶故事正正體現出唐師父寧願信外人都唔信自己徒弟。

金角、銀角: 其實佢地充其量只係中級妖怪, 不過由於佢地多法寶, d泓寶又勁, 所以都值得一提o既; 話時話, 我真係up唔返佢果七種法寶出來...

鹿力、羊力、虎力: 呢三隻野真係好笑, 低級妖怪, 不過佢地同主角們係大家面前鬥法果度真係幾有趣~~

獅、象、鷹(唔記得叫咩名): 呢三隻後期妖怪, 出身係佛祖噶座騎, 雖然無咁出名, 但係絕對係最勁果幾個敵人~~ 不過之後被人屈機收返去, 不過都好過要死啦...

二. 劇情

其實劇情主線都幾簡單, 就係講幾條友向西行去取經。不過係中間遇到好多兇險。出現得最多噶就係想食左唐僧噶妖怪, 個個都話食左就長生不老, 呢樣野真係証明左, "廣告"係幾咁有用, 吹2吹就個個都當真!

出現得第二多噶, 係某d國家比妖魔攪到民不聊生, 或者係個國師、宰相、當權者就係妖怪。呢d情況到最後d妖怪都無咩好結果o既, 只可以怪佢地唔好彩。不過又見到另一樣野, 就係由於次次唐僧都要拿個通關文碟, 但係鑊鑊都比人扣起左或者唔係簽, 所以次次都逼到主角們要出手。其實有幾次, d妖怪就咁由得佢地過去咪無事咯...

第三多噶, 都係想食左唐僧, 不過係d女性妖怪想食左佢; 都唔知貪佢d咩。食左佢就話長生不老姐, 攪左佢會有好處? 係o既話, 第一時間姦左佢先啦!

仲有一d無厘頭噶攔路妖, 不提也罷。


三. 謀略、計、法術

一次過講啦。其實故事入面謀略位, 通常都係d妖怪呃一呃呀唐僧, 跟住就捉走佢, 或者趁佢地唔留意就捉走佢; 唐僧睇怕都係慣左比人捉, 唔捉唔過癮果種。不過次次d妖怪捉到唐僧, 都諗住攪一大輪先食佢, 所以次次到最後都係失敗左, 仲要比人打瓜埋, 真係晒氣。

而孫悟空次次做得最多係做2樣野: 一係就縮細潛入去, 一係就變做小妖潛入去。有時自己攪唔掂都會四圍打探下(主要都係叫當地山神、土地出來收風), 然後就班救兵, so simple。講真d救兵都唔係比面唐僧, 只係比面佛祖姐, 如果唔係邊有咁順攤? 一係就係佢地自己本身噶難攤子, 自己d座駕、寵物走出來作惡, 自己出來收返。

天庭果班救兵通常都係無咩計謀, 3宦係聽返老孫支笛, 叫佢地做咩就做咩; 最堅係佛祖果邊, 次次都係絕對壓倒性噶力量, 贏晒。通常故事去到果段, 大家就知又攪得掂。

本來想講多d法術, 不過打左好多, 都差唔多係時候停啦~~ 就咁。

完

二月二十七日 -- 雜記

21/2(一) -- 收工咁o岩同事Penny要過SSP, 於是同佢一齊過去黃金陪佢整Wii(一陣就攪掂), 之後去睇福利(買左HK龜霸), 再去周記油渣麵食飯(不過無食油渣麵), 之後行左下玩具街, 再去綠林食甜品; 同佢散左之後就行去保安道體育館打毛毛球, 9-11。

1. 夜半沒有來電的電話...

2. 晚上清理了電腦旁的東東...慢慢把之前的都清除吧。

22/2(二) -- 全日頭痛+眼痛; 晚上同幾個同事(日安, 叻, 呀Yo, Yee)在家食飯, 之後去聰嫂食甜品散。

3. 多謝2個好友, 話係佢地打比我噶。

23/2(三) -- 最近係公司都好hea下...好彩陰d陰d都有site出; 攪左銀行噶野, 太好了, 唔使星期六早上專登去寶琳; 收工後去MK: In's Point -> 采豐行(去開, 一次過買左4支野) -> 兆萬 -> 信和(買左三國傳漫畫特別篇, 麻麻地) -> 綠野仙蹤(盤點減價至28號) -> 買鞋帶(太長 =_=) -> 28M遇到好耐無見噶BD同事Mandy Ma -> 去到土瓜灣時間差唔多, 買左盒叉雞飯上工聯會食 -> 最後一堂話劇班

4. 最近噶NBA值得留意噶新聞, 唔係o岩o岩過左去噶All-Star Weekend, 而係就來到今季trad deadline之前, 仲有咩大單交易。

24/2(四) -- 收工過MK, 經過先買返鞋帶, 之後係旺電Join埋Barry同呀Mak砌機; 本來好順利又好快, 買晒d野叫佢砌, 7點幾買完, 8點半拿機, 點知食飯果時打來話我塊底板唔得, 一係比錢換; 好彩因為果間係大間噶, 不嬲都ok又唔貴, 結果佢再打來話幫我拿去整, 唔使我拿單唔使錢, 但係要人地整完比返佢再砌機; 總之就係d野攪完, 而家等佢砌完部機叫我。下次拿機先拿上呀Mak家裝晒d software。

5. 早左返屋企, 在家又喪剪左d頭髮; 都係舒服就算了, 而家我又何必咁小心剪呢? 其實有d想知後面剪成咩樣, 哈哈。

25/2(五) -- 收工去長沙灣同大張同佢d舊同事師奶食飯(咁o岩同同事Vincent同路), 本來話打邊爐, 不過最後去食日本野, 好耐無去過噶小金井, 好彩佢本來話叫果個人唔來呢; 之後搭Van去土瓜灣練車, 去到太早, 去左紅磡奇趣一轉再返來練車; 好耐無練過, 有d生疏噶感覺呢, 呢個呀sir幾好, 果2條路線行過2次就算(其實自己以後自己行下練下就OK), 之後就叫我練斜路8字, 狂練之下本來唔掂都變左勉強打到核突8字呢~~完左之後搭Van到寶琳再轉MTR返企。

5. 點解總係...好飄忽咁? 唉...; 不過, 我係唔會變的。

26/2(六) -- 無野做, 在家hea。下午丫女同佢男朋友入開來TKO, 落左附近同佢地食tea吹水, 之後再返企hea。晚上呀源入來TKO, 大家交換漫畫, 之後出去食野+行下TKO。

6. 感覺自己好熱氣...好耐無試過呢種感覺。

27/2(日) -- 早上打波, 竟然打第一場波時拗柴, 真係好多年都無試過了。由於拗柴關係, 雖然唔太嚴重之後都打到波, 但係都好似陰住陰住痛, 打波都就住就住, 無咩癮。12點幾Tracy搵我食飯, 就順便走先去KT食飯。同佢食完飯行左下, 竟然買到新羽毛球拍, 有個識o既人幫我睇真係好呢, 不過真係估唔到係呢個位破財。返屋企沖涼休息之後, 夜晚約左呀源同Samantha唱K; 雖然之前威威同呀娟唔出來唱K+諗住唱唔成, 但係三日照成行, OK呢; Samantha唱歌都唔錯, 把聲入咪幾好聽; 唱到11點島就散。

7. 睇左呀源借比我噶漫畫 -- Psyren, 都幾得意。

來緊:

28/2(一) -- 飲食團之黑布街法國菜
1/3(二) -- 開始上堂學德文
可能有一日同喪強同威威食飯?

12/3(六) -- 話劇同學K?
13/3(日) -- Amanda結婚, 要去飲
14/3(一) -- 毛毛球@石硤尾公園體育館
21/3(一) -- 毛毛球@界限街

完