北海道遊記(二)

2. Something about trip and Japan

2.9. 幾日天氣都時晴時陰, 不過好好彩係要影相時都出太陽。
2.10. 日本d蛋堅好食, 每日都食到超晒標 =_=, 但係真係好食; d奶亦都係好飲噶...
2.11. 導遊係第二日車上已經問定我地訂唔訂d貴野食, 雖然實比佢從中掠一筆, 但係無理由唔食噶...所以最終都係訂左...之後每一日如果有食我都會提一提。
2.12. 記: 好鐘意日本噶叫法: 奧巴馬大統領。

3.2. Day 2

一早起身, 望出去見到天氣好似ok; 係城市都可以見到一望無際噶畫面, d屋都好矮, 係HK都唔多機會見呢。
幾日噶早餐都係自助形式, 無咩好講。第一站係我好喜歡噶動物園! 得個半鐘! 無可能夠時間行啦...比我自己來一定玩到大半日...最終唯有選擇睇晒d重點先: 企鵝、海豹同北極熊。狂影左好多相同埋拍movie, d企鵝真係超得意, 肥嘟嘟咁又游水游得好快, 最攪笑係有隻野想食條魚又食來食去都食唔到, 最後比第二隻擔走左, 哈哈, 可惜只係拍左佢擔唔到噶片, 但係比人搶走果度無影到...

動物園主打都係狂行同狂睇動物, 放棄左睇show同排隊, 狂四圍行盡睇動物同影相, 記低少少野啦: 馬騮同台灣噶一樣, 都係做果d野, 抓住岸邊wear野食; 猩猩好攪笑, 係度扮鬼扮馬; 熊都尚算肥, 但係d貓科動物都幾瘦...大約係咁啦。完左動物園, 由於今次係去道東, 所以基本上都係一路向東(諗起周董噶歌"一路向北"), 又到食飯時間。又係好普通噶自助餐。值得一提噶係佢果度噶白湯同堆粟米湯都好香, 好味。

由於日本天氣反常, 加上而家呢個季節去, 所以無粟米(都有食過, 雖唔係最新鮮, 但都好甜好食), 無紅葉。繼續向東, 到富良野花田睇花。本來天都陰噶, 好彩地落車開始放晴, 天公做美。由於自己一直都想自己旅行下, 所以今次雖然同朋友而且跟團去, 但係都有某d時間係可以一個人噶: 就例如花田。

花田係個trip主打影相噶地方之一, 但係又唔想點影到人, 當機立斷(當機唔係hang機)就離群相反方向行, 勁開心, 可以狂影又無人呢~~ 一直同D人相反方向行所以基本上由頭到尾都唔使就位, 個結果就係, 由於係動物園同花田都影左好多相, 影到無電, 哈哈。記下d野: 有一片向日葵田d向日葵都背住左個太陽, 同埋有一朵特別大朵噶向日葵(王?); 無去小樽, 無去登別, 無紅葉睇, 都唔緊要, 呢個花田一樣都係幾靚呢。好喜歡果種一大片田跟感覺, 所以都影左旁邊人地塊田地。好enjoy呢一段幾乎係自己一個噶時間。

幾乎每一個旅遊點都有買手信噶地方, 不過導遊一早講左唔使買住, 好聽話地一直唔點買, 結果都係o岩噶呢。如果唔係咩特別野, 都係留返之後買係平dd。不過, 唔買還唔買, 影相唔使錢就梗係狂影啦。成個trip都係度影d地方限定噶HEA熊同HelloKitty呢(之後果d手信店就唔再提了)。

花田完左, 相機無咩電, 好彩當日行程都差唔多完。感覺上似攝時間咁, 去左芝士工房, 無咩好講, 係咁咦影d相就走(不過係果度買左支奶飲好好味, d芝士反而普通)。完左個芝士工房就出發去當晚, 或者可以話係個trip噶主打留宿地點 -- 十勝溫泉噶酒店。

去到酒店時間尚早, 好聽話咁跟導遊講噶一樣, 返房settled down之後, 即去浸下溫泉先! 不過...先講講個酒店同溫泉先啦。個酒店係日式噶房間, 訓覺會係塌塌米, 有生以來第一次呢。間房都好大間(尤其日本酒店房出名係細噶), 個環境同裝修都幾靚(不論係房間定係酒店大堂等等都係日式噶), 唔錯; 酒店中有室內同室外露天溫泉, 係分男女噶, 但係就一定要一絲不掛(日本噶溫泉都係咁噶啦, 所以d旅遊節目見d嘉賓有著泳衣或者圍毛巾都係做比人睇噶姐)。講下個溫泉, 話說(當然係聽導遊講噶啦)十勝溫泉噶泉水係世界得2個地方有呢款溫泉水, 而且係堅靚噶泉水, 水色係好似無花果浸水咁, 同埋浸左D水feel到係滑孱孱噶。

講返settled down之後; 由於同房叔叔唔浸住, 於是自己換左浴衣就即去溫泉! 去到之後就要除晒d衫入場, 初初都好唔慣, 不過當你見到個個都係咁又直行直過時, 如果你眼望望、遮遮掩掩、表現得異樣都只會更惹人注意, 所以大大方方咁就無事, 無人會理你, 好快就慣左了。入去最多只可以帶條好細噶手巾仔(用來放係頭頂多); 首先係沖涼先, 大家都係沖乾淨晒先去浸噶; 終於沖完涼, 來到戲肉啦(講到好似AV咁)~~ 其實自己不嬲怕熱, 不論係桑拿定溫泉都唔多好噶, 但係呢度真係OK喎~~(可惜無機會影底個環境了)

室內溫泉實在無咩特別, 好似個澡堂咁, 無咩feel, 緊係去露天果個啦~~ 一出門口, 嘩~ 好凍~ 日頭果時都只係十幾度, 夜晚再凍d仲要無著衫, 出去果下都幾係野; 即刻走去個泉度浸落去, 好舒服~~ d水唔太熱噶, 浸落去真係feel到d水係滑噶~~ 個頭露係水外面就feel到d空氣凍凍地, 但係個身就好暖, 感覺好正。室內溫泉個感覺好焗, 浸一陣就wingwing地, 但係露天噶就完全唔會咯, 浸耐d都ok呢~~個環境都唔錯, 花草樹木, 泉旁邊係d石, d團友仲話如果放支清酒同小食係度就好啦, 哈哈, 真係噶話都好嘆呢~~

浸夠浸罷出返來(如果唔想浪費的話, 就唔好再沖水啦, 就咁抹乾身就ok), 時間o岩o岩好食飯! 係一個好日式噶地方食日式定食, 十分精緻亦都好食, 算係包噶伙食入面比較好同有特色噶一餐啦, 好彩食飯果間野係假噶塌塌米, 唔使真係跪住來食呢~~

由於去到果度已經係道東鄉下荒山野嶺噶地方, 所以酒店外面係咩都無噶; 食完飯又無咩好做, 返房休息左一下, 又去浸過哈哈哈, 臨訓浸一浸真係舒服呢, 應該可以好訓dd吧...準備迎接第二日噶morning call 6:30a.m.

p.s. 事後先知原來露天溫泉男同女只係一板之隔, 仲要你兜一兜路就可以行到過去 =_=, d女團友竟然話如果係日本仔就無咩所謂, 佢地班衰野竟然寧願益d日本仔都唔益下自己友~~~

待續