北海道遊記(三)

2. Something about trip and Japan

2.13. 果度d雪糕都好食, 成個trip都食左好幾野。

3.3. Day 3

Before morning call一早起身, 先去浸下溫泉先, 舒服, 無咩機會啦~~ 之後食早餐buffet就出發。由於日本人好禮貌, 加上係鄉下地方, 我地由開始上車佢地d工作人員就一直揮手講再見, 到我地架車去到好遠, 都仲見到佢地向住右車一直揮手呢~~~

當日第一站係幸福車站, 唔知係咩戲定劇帶紅左噶地方呢? Anyway, 係做出來噶都好, 係一個幾靚同舒服噶景點。去到果度會諗起幾位朋友(所以亦有買到d手信), 但係第一個諗到噶係日安妹妹呢~ 一去到就覺得佢一定會鐘意呢個地方。講返個景點, 有個站, 有條路軌, 有個掛鐘, 仲有幾節車廂係度, 都幾好feel, 唔知點解, 雖然又唔係話係好靚噶自然風景, 但係感覺良好, 自己都幾鐘意呢個地方。

個車站牆上、天花都貼滿左好多好多好多d人寫噶野, 幾乎都係d相愛呀, 得到幸福呀等等肉麻噶野, 不過都幾有特色, d手信雖然都唔平, 但係亦都係有特色同埋得呢度有, 所以都買左d野; 個車卡車廂都唔錯, 如果有時間其實可以影到好多相呢...可惜又要等人影完走, 又唔係長時間, 所以影得唔夠盡興...就夠鐘走人了。

下一站係屈斜路湖, 亦係食lunch噶地方。先講下個地方, 果度雖然天氣都係凍凍地, 但係d水係暖噶(d沙都係), d人去到會係近岸噶沙度挖洞, 唔使挖好深就會有水滲出來, d人就會浸腳啦, 因此叫做"沙湯"。導遊話, 如果冬天來就無咁好景, 連行步路都難, 因為會有好~~~多天鵝係好遠噶地方飛來避暑, 好靚噶, 但係就成地都係屎...

望過下又影左相之後, 就係果度噶一間餐廳食飯; 打邊爐, 本身包噶伙食就好一般, 主打係之前預先訂定噶大隻蟹同埋海膽! 其實對於食都無咩好講, 大家是但上網或者睇電視節目都講唔少, 我都唔使形容了, 總之就係好食, 而且好貴啦~~ 食完好滿足, 又準備出發。

一輪車程之後, 到左硫黃山, 係個睡火山來噶; 其實簡單來講就係睇座山一直係度噴煙, 個煙真係好大好大, 親身係現場就會feel到d煙好大, 而亦都好大陣硫黃味(不過我唔多怕呢陣味), 隔遠影左下相(又係離左群先, 因為個個都係一到就湧去某地方, 基本上之後我都係採取等人去先等人散左之後先去噶方針, 唔再多提了), 就行埋去近噶地方; 近距離望就見到其實d煙氣都噴得幾快幾犀利, 我亦係唯一一個遊客(包括所有團友同當地人)唯一夠膽伸手埋去d煙度噶人(當然影埋相), 之後亦只得Crystal夠膽同我癲, 其實d煙第一下摸過去係暖噶, 如果放耐少少應該會好熱。

去完就上山, 睇摩周湖。本身個湖係好似無咩特別噶, 望落去只係一個好大噶湖, 中間無啦啦有個島咁噶野突出來, 但係其實特別噶地方係: 第一, 佢係一池死水來噶, 平時d湖都有個源頭, 又有個地方會流出大海, 但係呢個湖係無噶, 係一池死水, 好大潭噶死水, 唔知點來同點去噶; 而另外一個特點, 就個湖面好大霧, 好似好神秘咁, 只係見到中間果個島突出來, 都幾特別...不過, 我地去果時無霧, 所以望落一d都唔特別...由於果度係山上, 因此亦係成個trip最凍噶一個地方, 真係凍, 隻手拿相機影相都僵晒, 好凍。

睇完就去果晚留宿噶酒店。果個地方係日本北海道一個民族"愛奴族"(或者又可以叫蝦夷族)噶地頭(亦都即係格鬥遊戲"侍魂"入面好受歡迎噶女角"奈戶流留"噶故鄉~~ 佢地有自己獨特噶文化、語言, 係好特別噶一個民族, 不過純種噶族人已經剩返幾十個, 相信過多幾十年再同外人溝溝下, 以後就再無純種噶族人了。希望個文化唔好失傳吧。

講返個酒店, 其實呢間無咩特別, 都有室內室外溫泉, 但係就普通d, 無之前果晚咁正了(但係都日式房間塌塌米); 間酒店亦係果區最高果間酒店, 露天噶溫泉就係天台; 不過最高唔等於最好, 最好最出名果間係隔離, 我地係到左settled down之後, 由於仲有d時間先到食飯時間, 所以我地就一齊出去行左陣; 去左隔離果間酒店外面同入左少少睇, 好靚, 又係好日或噶裝修, 後尾聽返原來好貴噶。

之後就沿住條路行過去, 向住愛奴條村噶方向過去; 沿路有好多木雕同特色噶鋪頭, d木雕都好靚, 又係買手信噶時候呢。睇足成條街(都買左d野, 但係而家有d後悔無買到某d野呢), 轉個彎就到左條村。愛奴族噶守護獸係"貓頭鷹", 因此有好多貓頭鷹噶木雕呢, 好大隻好靚, 由於個人好鐘意睇d歷史建築、唔同文化噶野, 因此亦好鐘意呢個地方呢, 有好多野睇。可惜已經入黑, 影相都唔係好清, 但係都盡影盡睇左。(順帶一提, 北海道都好多熊噶, 雖然唔係日本最多噶地方, 但係都會見到好多有關熊噶標本、木雕等等噶野) (但係點解奈戶流留身邊噶2隻動物係鷹同狼噶? =_=)

影夠之後就返酒店, 又係食自助餐, 不過呢一餐係好食d噶, 仲有魚生添, 勁食。之後當然都有浸溫泉啦, 室內就唔好講了, 要提一提室外。頭先都講過, 果個地方係成個trip最凍(不過無摩周湖咁凍), 但係當晚又落雨又大風, 所以超凍; 果個露天溫泉係酒店頂, 個酒店又係最高噶無遮無掩, 出去果下真係堅凍! 不過又係果句, 環境凍得來浸溫泉就特別爽! 雖然唔係落雪, 但係都feel到個頭露係外面同個身浸係水度果種差距咁, 好舒服! 浸到個人暖晒再企起身吹風, 好刺激! 不過真係好凍, 好難先捱到10秒...

浸夠之後就返房, 回顧左下d相(同delete左d太廢噶相)之後, Crystal話難得旅行, 都係唔好咁浪費咁早訓, 話出去行下。兩條友(佢媽無去)夜媽媽決定去果條木雕街中間一間便利店買宵夜(即食麵)食; 竟然係咁凍、又落雨、又大風噶環境下, 我好"乖"咁學日本人唔打底, 只係著住件浴衣同褸加拖鞋就就咁出去, 而Crystal就有打底, 但係著住對木屐出去行, 2個都係傻噶! 結果都買左麵(仲係果間店買左比民仔噶手信 -- 咸濕漫畫一本), 返到酒店真係好暖(其實係外面好凍, 加上自己急尿感覺仲凍 =_=), 夜夜地, 又訓, 明天又係6:30a.m. morning call。

待續