二零一零年個人大事回顧

又到年尾, 又係時候寫今年自己噶大事回顧(當然唔用書面語而係用白話啦)。多年前, 年年都話自己樣樣野都好穩定無咩波動, 我都無咩complaint, 覺得好滿足, 好心就唔好攪咁多野, 點知今年就成為左近年最大波動噶一年, 果然係沖太歲, 沖到呢...

唔多想睇返自己雜記, 儘量用自己噶記憶去回顧一下今年發生噶事同埋值得記念噶事吧(始終都有reference咁睇返少少)? 如果唔記得, 就即係唔緊要啦? 話時話, 今年個Blog噶貼文又創新低...主要係因為前半年產量驟減至接近零噶原因吧? 不過, 其實見到係逐年遞減...唉...

首先講講逐個月發生d咩事, 之後再講感想吧..

一月

1.1 原來諗返自己係經歷左情緒極度惡劣噶零九年年尾同一零年年頭, 而且情緒係極大波動; 一向覺得自己噶"心"好平穩, 但係呢一年完完全全係多年道行一朝喪, 既喪且亂; 好彩都只係自己噶時候同埋對某d事情噶時候先會, 一般人都係唔係好影響到噶。

1.2 有句真係o岩: 近朱者赤, 更墨者黑。所謂多年道行, 真係喪係接近左d唔應該接近噶人, 同埋受到身邊有d好友同埋好如親人噶好友(即使係、兼尤其係)好負面噶情緒影響, 自己諗野都負面左, 睇野都差左, 個人都差左, 好多野都差左。仲要最大鑊噶係, 覺得自己變唔返好...

1.3 繼好多年無去旅行, 然後零九年同死黨們去左台北之旅之後, 一零年年頭去左上海。其實係一個尚算開心噶旅行, 不過係而家呢個時候, 唔再想多提了。

1.4 係新年之前, 準備屋企重新油油事宜, 執過晒全屋噶野, 掉左好多野, 好大工程。

二月

2.1 唔想提噶二月, 唔好逼我諗啦, 就此跳過。

2.2 經歷人生第二次噶"一個月內減肥廿磅"噶成功例子, 瘦身有幾難? 呢樣應該係二、三月最值得一提噶事。之後聽到唔少朋友話: 呀瑛你瘦左好多喎, 點減肥架? 我一定會答(或者想答), 你地唔好學我, 咁減法係會死架。

三月

3.1 唔係唔想諗, 而係記得跟本成個三月就係渾渾噩噩渡過(或者應該話唔記得係點渡過), 無做過d咩特別野。

3.2 只係記得, 有好多好多好多朋友值得我去多謝, 由二月開始一直陪伴左我好耐(到而家), 係度唔再肉麻講係咩人、有幾多謝啦。

四月

4.1 好似人生中第一口煙係呢個月發生噶? 不為什麼, 亦都唔係想學壞, 就覺得只係想試下, 反正唔會再試噶; 味道? 試果支已經係好soft噶女仔煙, 但係吸左一啖(入肺架, 唔係用個口吸左吐返出來果種)之後, 即時狂咳。不過應該係最初也是最後一口吧。

4.2 幾位新同事, 包括好朋友Queenie, 就係係四月識噶啦。絕對值得一提。

五月

5.1 值得紀念噶Bad-end人BBQ事件。好長噶一件事, 唔係度詳細講了。不過其實真係有市場噶, 哈哈哈。

5.2 四日三場K達成!好似延續落去果個星期總計係六定七日五場添~~! I am K魔瑛! (K More Ying!)

5.3 真係諗唔到有咩特別野, 其實基本上幾個月都係唔知點捱過, 同埋返工好忙。好記得一直想去旅行但係公司忙到無得諗。

六月

6.1 好似真係半年只係得雜記, 咩都無打, 亦都記唔起做過d咩特別事, 應該係六月開始無咁忙, 同埋開始真係想去旅行了。但係我噶行動力(以前做攪手搵人噶行動力、勇氣、面皮等等)都已經大不如前。

6.2 六月真係唔記得有d咩特別野。

七月

7.1 世界杯。始終都係盛事, 都有睇下, 同人談論下, 基本上有d咩野可以distract到自己噶都會試下去做。

7.2 本來想七月頭旅行, 點知攪唔成, 到左暑假又貴, 因此個計劃就要起碼到暑假之後, 即係九月...

7.3 印象中都係七月開始心情叫係正式轉好少少? 起碼識得搵野去distract自己去諗第二d野。

7.4 開始報話劇、報學電單車。總之將自己噶schedule填滿佢。

八月

8.1 唔記得係七月定八月開始習慣一個人的電影。其實自己幾鐘意睇戲, 不過識咁多人竟然無咩friend係好鐘意睇戲噶, 有時有d戲想睇, 要搵d有興趣噶人睇, 搵到又要就時間, 最終都係睇唔到, 好遺憾入唔到戲院睇架。非常開心自己可以習慣到呢樣野。最緊要係自己慣左早起, 星期六日可以睇平噶早場, 好抵架!

8.2 所有野都係呢個月繼續: 心情, 識朋友, 睇戲, 上堂...等等, 仲開始多左打毛毛球添。等待九月。

九月

9.1 最值得紀念噶就係去左旅行: 繼多年前噶泰國之旅之後, 第一次去唔係中國人地方噶旅行。雖然, 講真, 其實自己係果時仲係好茫然, 唔係好知自己做咩。結晶姐姐搵我話叫我湊人數去旅行時, 我都無點考慮過就答應左。個心只係諗, 咦, 有人叫我去旅行喎, 會平d喎, 去啦。咦, 日本喎, 雖然未去過東京, 想去東京先, 但係北海道都好呀, 跟團都無所謂, 去啦。結果就矇查查咁報左, 矇查查咁去左。都算係一次愉快噶旅行...吧。

十月

10.1 開始正式學車, 真係坐上架車來學; 好記得三堂噶第一堂, 自己唔好彩揀左架唔得噶車, 加上自己無咩信心, 竟然完全渣唔到, 好大噶挫敗感...好彩之後第二堂好快pick up返, 不過始終對於自己有左疑慮...

10.2 換左手機...換左一向自己都話唔會用噶i-Phone, 又真係幾好用。主要目的仍然係"溝通", 為左可以同朋友方便地溝通, 當然仲有上網(尤其公司上唔到之後), 再加上好友換機, 多謝呢。咁多原因...定係因為純粹想將以前噶野, 有關無關都換晒去呢?

10.3 好值得一記噶 -- 草蜢演唱會!! 自己係fans, 無咩好講, 正。值得一記呀傑唱噶"盼望的緣份", 同當年聽到佢唱"愛比我重要"一樣震撼, 相當之令人起雞皮, 太好聽了。

10.4 睇左Grease, 超正~! 仲要半價飛~~!

十一月

11.1 全年對我來講最勁噶一件事: 一個人的旅行 -- 台灣! 感想都打晒係個遊記度, 唔多講對於個trip噶野了。不過對於行動力跌到接近零噶我來講, 攪得成呢個散心旅行真係好好彩, 亦都好犀利。真係好多謝各方好友噶幫助我先去得成, 自己其實除左錢唔係pay左好多effort。亦都好佩服自己話去就去, 一個人旅行唔係咁易克服到個心理障礙就可以去噶, 不過當時噶自己一d猶豫都無, 真係想試下, 結果亦都好好, 好開心; 同埋, 真係散到心噶。

11.2 發現到從前怕黑噶我而家已經不再怕孤單一人身處黑暗中呢。

十二月

12.1 旅行由十一月持續到十二月; 八日, 我好似除左細個返鄉下, 未試過咁長時間唔係香港呢。

12.2 認清左自己某d心情, 有試過去努力, 不過太care太著緊反而仲衰, 所以...都係唔諗好。還是別多想。愈刻意就更加唔得吧。

12.3 充實而快樂噶聖誕。今年聖誕雖然唔一定係最開心, 但係感覺良好。有好充實噶感覺, 想做噶野都係4晚3日內做到: 見朋友, Gathering, 睇戲, 執房...etc, 真係好唔錯噶聖誕。

12.4 懷著咩都無噶心情, 渡過2010, 進入2011。

**********

以時間來分類講完, 之後就係雜亂咁將覺得特別值得提噶野寫出來。首先係set下題目"XX之最"記下無聊野先。

二零一零年最值得提噶戲/Musical: Inception, 唐山大地震, 父後七日; Grease。
1. Inception -- 一開始我就唔多想睇, 因為唔知點解硬係對d比人煲得好勁噶野失左興趣; 不過睇完之後, 不得不讚好, 同埋個導演功力真係掂, 成套戲個concept同埋層次感都表達得好好, 張力都好夠, 絕無冷場, 今年睇咁多套戲, 絕對係one of the best。

2. 唐山大地震 -- 雖然有好多廣告位, 又有好多人話有媚國傾向, 不過我仍然覺得係正噶。最值得講係女主角, 對佢噶戲好深刻, 真係好掂。單係睇佢已經值得睇呢套戲了。

3. 父後七日 -- 我都估唔到自己會提呢套, 不過真係好buy果種好鄉土、樸素噶感覺, 仲有果種好自己鄉下噶感覺都好正。

4. Grease -- 今年睇得一套musical, 當然要提一提。正!

5. 滄海遺珠 -- 告白, 都係一套好唔錯值得睇噶戲, 尤其我覺得我先睇過本書, 知道晒劇情, 但係睇戲時都會覺得OK, 真係拍得唔錯。

二零一零年點播/點唱率最高歌曲: 纏綿遊戲、突然好想你(成功唱到人喊噶一首歌)、心動。Neway無左一堆想唱噶歌之後, 有d好想唱噶歌好耐都無唱了...(我們都是這樣失戀的)~~~

二零一零年Gunpla: 買得最多係三國傳; 好開心平買到MG強人同太空坦克; 買得好滿足又超鐘意噶係HGUC Gouf Custom!

二零一零年值得記噶事: 有幾樣野係好值得記噶, 學車、旅行, 同埋識到、熟返好多人。

學車 -- 對屋企來講算係好聽話乖巧同埋好識諗噶我來講, 係父母心目中我係(應該)唔會學電單車噶。不過, 其實之前已經一直有少少心想學。自己不嬲都唔係好鐘意4個轆, 所以無考慮過呢。

旅行 -- 對於我來講, 人生之中, 之前好多年都無咩"旅行"噶經歷, 唔係無, 不過真係少。同過好多人講過原因: 轉工、讀part time、就唔到朋友時間...etc, 總之就係少機會。自己唔係唔鐘意去, 係一直去唔到。今年終於有機會, 一去去幾次, 係幾開心噶。尤其係一個人去旅行, 真係好珍惜呢一次噶感覺, 好正。不過下一次應該/希望唔會係一個人吧。

朋友 -- 同我熟噶人都知我非常十分重視"同人噶關係", 重視朋友。今年下半年重新開放返少少自己, 識到好多朋友, 有好多都覺得好好; 或者我已經無以前咁識得同人溝通同相處, 但係仍然都可以識到好多好好噶朋友呢, 好開心。感覺自己同以前比, 係會比較無咁令人相處得舒服左呢...以前應該可以處理得好d吧? 今年諗返真係有好多之前識左但係變熟、或者新識又熟噶朋友呢: 魷魚、姑姑、QQ、關十四、Fondue、加輪同學、催時同學、叻姐等等, 加埋d本來就熟噶一堆好友(唔使再多多多講啦), 真係好開心呢...

家庭 -- 對於屋企, 感覺上對佢地呢幾年一直都無咩大噶改變; 最大噶改變係上年呀爺過身, 今年呀麻健康隨即一落千丈, 亦都影響左屋企一個好大噶決定, 不過都攪掂了。對呀爸呀媽都仍然係咁, 尤其係呀爸, 仍然都係果樣野。對家人最希望噶、覺得可以令全家都有大改變噶, 仍然係希望呀哥可以快d結婚, 開開心心, 同埋快d生個仔/女出來, 比呀爸呀媽玩下。

工作 -- 甚為穩定, 無咩好講, 亦不嬲唔鐘意多講工作。總之唔使OT, 份糧夠我食夠我供基金比完家用使完都仲有突, 就算了。

自己 -- 認唔清自己, 無左目標, 好似無缺少d咩野, 又唔知自己想要d咩野。自己一向噶目標, 又唔會達成到, 或者應該話, 無咁快達成到? 點都好。今年尤其覺得, 自己真係好易識/熟到朋友, 又好容易地令人同我講好多野, 同埋比人噶感覺好"姊妹"。係好事定壞事來呢? 人係會不斷成長, 不過自己係會想自己某部份(或者大部份)咁變返以前噶自己, 或者我真係過份美化左以前噶自己吧。今年對自己噶期望都係一如往年吧...

**********

一貫作風一口氣打出來, 唔多想翻睇錯字或者唔通順了。

展望來年: 之前好八卦咁, 忍唔住睇左下蘇民峰噶來年運程, 睇左第一句已經唔使再睇落去: 來年將會延續上年噶運程...Shit!! 夠了~~!

自己一向都唔迷信, 成日都話以後結婚會專登揀d大凶或者日值歲破果d日子來結。我就死唔信來年運程會延續上年, 寧願相信好友會一語成籤!哼哼!大家等住啦!!

仲有, 好有衝動想養喵, 應該係繼學車之後, 另一樣好想但係又覺得自己一直都唔會真係做噶事吧? 車仲未學完, 希望今年會順利考到個車牌返來。仲有繼續唱K, 砌模型, 識朋友, Gathering, 睇書, 旅行, 睇戲, 打波...做我鐘意做噶野。

希望今年可以開開心心, 健健康康, for所有我身邊噶人...

by Ying 01/01/2011

完