劇 -- 野鴨 (The Wild Duck)

星期四晚睇左套舞台劇, 圈圈老師有份做, 所以去捧場。
事前, 圈圈話會做差唔多3個鐘, 又話會好悶, 結果呢...

呢個劇係十九世紀o既文壇巨人 - 易卜生 o既大作之一, 係睇之前我無去專登搵資料, 係睇完之後先再睇的。
劇入面o既劇情, 對白同人物都有好多都帶象徵意義, 透過呢個劇帶出左好多人生/人性o既野, 但係(起碼我自己覺得)又唔會好深奧好文藝, 幾有意思。至於個故事方面(唔諗住係度講了, 有興趣上網search, 好易搵), 劇情都幾牽引到我, 而且個flow一路落去都合理。我上網睇返英文版(可能有幾個唔同version), 發覺今次睇呢個中文版o既翻譯, 正如導演所講都跟得好足(得覺得譯得唔錯了, 起碼有d深層o既o既意義係中文都感受到), 舞台/燈光/服飾/各樣安排都好唔錯呢~~

演出方面, 大部份o既演員都做得好唔錯呢(圈圈都OK呀), 不過果2個男主角我就覺得麻麻地, 原因唔係佢地做得唔好, 而係佢地o既戲份係最難做, 最多對白同埋最緊要o既, 再加上可能驚太長太冗o既關係, 佢地d對白去得好快, 有時d中間interaction位太少...好唔舒服, 撇開難唔難o既關係, 覺得2個男主角(尤其係希瑪艾道)做得無咩味道。

呢套戲帶俾我好深o既感受。第一, 佢入面講o既幾個唔同種類o既人o既諗法同人生觀, 都係我好明白o既(係明白, 而唔係認同), 而帶出來o既信息, 我都好明白。第二, 就係我身邊有幾個人, 同劇中人物好相似; 並唔係話佢地o既經歷或者人生觀似, 而係佢地o既"思考方式"同埋"執著"好相似, 我覺得如果佢地去睇, 一定有所得著, 或者可能有所改變, 雖然無咩可能...

總的來講, 我覺得係一個好o既演出來o既, 而且一d都唔覺得悶呢!

p.s.
1. 全場我諗我係唯一一個無笑過o既人, 不過有幾個位好多人都笑同拍手了; 我從來都唔會覺得一d可悲/無知o既野係好笑
2. 入場時發現之前另一個話劇老師Jason都有入場睇
3. 睇緊時都係有d人做滋擾性o既野, 好彩唔多...

完