四月六日 之 晚飯@Daisy

星期四一早, 心血來潮搵呀貓姐, 佢居然得閒一齊食晚飯, 於是就去食佢講左好耐o既"Daisy"
話說之前貓姐都講過呢間野, 一開頭聽到係"旺角女人街"已經覺得"唔係呀嘛"
之後聽到係食甜品為主, 人頭百幾蚊, 就覺得好似麻麻地, 不過貓姐鮮有介紹野, 緊係要去試試啦

該餐廳環境都OK, 叫係坐得幾舒服, 服務都幾好, 坐底無耐就叫野食了
有特價套餐($60-$70), 呢個唔係咁吸引, 唔叫
有幾款set dinner, 百零蚊, 不過如果散叫main course+$30可以轉做餐, 價錢都係同set差唔多, 所以都唔叫set dinner
我點左貓姐之前食過o既"香草汁三文魚天使面", 而貓姐叫"蒜蓉鴨胸意粉", 佢仲另外叫左2隻生蠔

生蠔來左先, 我就唔多好, 無食, 不過當我見到貓食完果個滿足樣, 就知道好新鮮, 好好食(貓姐之前來賣晒食唔到, 可見呢度o既蠔應該OK)

之後餐湯到, 並唔係平時d頹o既求其餐湯, 幾好飲, 不過可能我中意淡d, 稍微覺得濃左d
餐包係蒜蓉包, 本身都中意食蒜蓉包, 仲有一d奶油o既醬可以加, d奶油奶味唔濃, 但係好香! 連唔食得奶o既貓都食得兼覺得好食~~

主菜來到, 呢個係unexpected咁好! 原本"香草汁三文魚天使面"香草汁諗住無咩野特別又得少少咁淋上d面度, 點知呢碟應該係將d面同汁一齊撈, 全部面都"yam"晒汁, 而且d香草味香而不濃, 好食! 至於三文魚, 份量普通, 原本又係諗住都係佐料來o既姐, 一食落口, 細細舊o既煙三文魚o既味, 可以令到成個口都感覺到! 同d淡淡地o既面一齊食, o岩o岩好! 正!
至於呀貓果碟, 我試左少少d意粉, 食落可以同時食到芝士"和"蒜蓉味, 唔會一種蓋過另一種味, 鴨胸就OK啦!

甜品另叫, 我叫左個拿破崙餅, 貓叫左個蘋果批
細個食左M記蘋果批, 對呢樣野一向麻麻地, 但係呢度o既唔同, 外面係脆脆地o既皮, 加埋入面o既有少少肉桂味蘋果粒同提子乾, 連皮一齊食好食, 只係食過M記o既人一定對"蘋果批"呢樣野改觀
最後要講講我個拿破崙餅, 頭先o既蘋果批就覺得幾好, 個拿破崙餅就係好好! 面同低都係一層酥酥地脆脆地o既餅, 中間夾住幾種生果, 少少cream再加d朱古力, 大件夾好味!

最尾餐飲, 一向只會叫凍飲o既我, 由於呢一餐實在好味, 令我覺得叫熱飲先似返一set, 於是叫熱奶茶, 呢個就中規中矩啦, 埋單每人百三蚊島, 我覺得係抵的!

唯一遺憾, 係呢一餐係貓姐爭左我好耐o既, 應該屈佢請我食至o岩, 唁記得添, 哇卡卡卡卡 :D

完