其實我想...

其實我想...

人一生總有好多夢想、愿望、目標想達成。不過隨住年紀長大、環境改變、人為因素各樣野o既影響, 呢d夢想、愿望、目標都會有改變, 或者有所增減。

突然想回顧一下由古至今自己o既呢d夢想、愿望、目標。(不過無可能記得返晒啦~~)

細個果時, 所謂o既目標都比較簡單。
最記得o既有2樣: 買十蚊叉燒唔切, 成舊拿住來食(1. 以前十蚊叉燒都幾大舊, 好夠食。2. 以前d叉燒真係好味d); 另外一樣就係可以將好多支益力多倒埋一齊一次過飲(唔係連飲幾支, 個感覺有d唔同的)。
第一樣到而家都無實現過。由於而家食量唔大, 加上都唔覺邊度有叉燒係好好味, 所以無咩意欲去達成呢樣野。至於益力多, 都叫試過, 不過其實益力多好甜好滯, 實行起來並唔係想像中咁正咁開心o既, 哈哈。

讀書時期對於"我的志願"o既憧憬, 其實又真係無諗過做醫生(核突)律師(不知所謂)警察消防員(危險)。竟然真係有諗過係一間辦公室工作o既情境。覺得同同事、上司甚至客人互動好有趣(睇得電視多? 覺得同同事可以好開心好好玩, 所以到左而家做野咁耐同好多同事做左好友)。近幾份工都有返office又有得出下site, 算係係工作範圍上都唔錯呢~

另一樣一路到而家o既愿望就係有一個住得好近屋企o既好友。成日希望可以有個咁o既朋友, 隨時call一野就可以落樓下吹下水, 飲下野, 食下野, 個感覺好街坊好正好開心呢~~ 可惜到左而家都唔係好exactly有呢樣野呢~

從細開始同家人、朋友總會講起對以後"對象"o既要求。不過又真係從細開始就對個appearance無特別要求, 細個已經諗要搵個o岩傾同鍾意o既人係埋一齊, 哇哈哈。不過"睇"的話, 亦係由好耐之前開始鍾意睇"腿"(呢樣野係以前d blog都講過無數次了 XD) 家庭生活方面, 都算係幾傳統o既希望o既, 都係一般家庭咁啦。

人大左, 不得不向現實低頭, 有好多希望亦會實際左。最基本當然係希望自己、家人(尤其)、朋友都健健康康啦, 身體健康真係好緊要。想大家都開心幸福, 不過呢個係人都想, 超廢話。

比較短期之內, 有咩愿望同目標呢? List出來諗諗先。

1. 真係好想考埋個電單車牌; 雖然已經過左好耐, 而且實在太多人反對+無時間, 難度等級大概係C吧
2. 之前試過一次一人旅行, 好正。好想好想再試多次, 去個簡單、輕鬆o既地方。不過好多制肘, 難度等級大概係B
3. 想將自己長久以來諗o既好長好長o既故仔寫出來; 無文筆, 無時間, 最重要係無心機; 好彩自己一直諗d主要o既大綱人物特別野...etc都有記低(只係呢d都幾萬字了oops), 難度等級有B吧
4. 砌晒手頭上d模型; 實在有太多了...難度係A...

之前仲諗左好多野可以寫, 不過篇野長度都差唔多了, 係咁。

完