之前一直都有個感想, 不過最近更加強烈。
就係"有錢o既人, 想點都得。"
不單止之前提過o既"法律只係保障有錢人", 連佢地o既名聲、以後o既歷史、記載都一樣係。
睇得多歷史, 我自己有時都會幾信d"野史"。
講真, d史官都係收皇帝o既錢, 鐵飯碗, 點會寫得佢自己個老闆衰? 每一代o既領導人都唔會寫衰自己, 連毛澤東呢d人渣都會被歌功頌德, 洗左中國人腦洗左咁多年。只不過現代科技發達, 好多野都唔同左, 先至會有返好多醜野揭露返公開返出來姐。
講返正題。
有錢人, 諸如香港首富李先生咁, 佢地大把錢, 手指尾"了"少少錢出來捐下, 係大陸做下慈善, 大把人就會講到佢幾好幾好。多年之後, 呢d野一直留係度, 鬧佢、話佢果d人、果d事只會慢慢被淡忘。講真, 幾多有錢佬做埋做埋唔少非法野, 唔見得光o既勾當, 搵得咁多錢, 得幾多人會話佢衰? 話左都未必有好多人信。但係佢地比返些少錢, 就會有大把唱好、講好、寫好佢地o既野出現。"好人""好形象"真係好易做。
點解呢期又會特別有感而發呢? 主要係見到facebook有好多人like同share周星星係大陸o既訪問, 仲有古仔被雜誌o既訪問。佢地可以直認佢地自己有咩不是, 可以講以前點誤入岐途, 不過而家已經同以前唔同左啦, 以前只係佢後生, 唔識諗。再加一d都唔知真定假o既事跡, 再加一d"低調"o既慈善活動, 再加上靚仔, 一半以上o既人就會like佢, 從此佢個名聲就會好好(或者好好多)。就算有人話佢以前點點點, d like o既人都會話佢以前姐, 而家唔係就得啦。
即係話, 以前點衰都好, 而家改過自新就得。但係倒返轉, 一個窮人、唔靚仔o既人, 坐過監, 出返來話改過自新, 又會唔會有人接受呢? Well, 只不過係有錢, 同埋識得PR而已。
人可以改過自身, 我信, 絕對相信。不過機會總是留給有錢的人。窮撚? 慳d啦。
完
2013年3月26日 星期二
發財立品
於 1:13 上午
標籤: 個人感受/感想/人生觀
訂閱:
張貼留言 (Atom)
0 意見:
張貼留言