香港典故

講開香港典故, 有好多可能大家都會知道來源, 例如調景嶺以前係叫做吊頸嶺, 後尾因為聽上去唔吉利, 所以取其諧音叫"調景嶺"; 太古城以前係船廠, 叫"大吉"噶, 後尾因為d人唔識字, 竟然寫錯d字, 就變成左而家噶"太古"; 有好多呢d香港噶典故, 唔止地名, 可能大家都聽唔少, 但係以下呢d大家就可能無聽過噶, 都係有段古係背後, 請大家聽我道來啦~~

**********

1. 赤柱 -- 清未時期, 香港都仲未係好似而家咁繁榮噶城市, 古時噶社會同而家都一樣, 有錢噶就大晒; 當時有一戶富裕人家, 個當家姓咩野已經無記載, 我就姑且叫佢做楊四萬啦。呢個楊四萬平時恃住自己有財有勢, 成日作威作福, 邊個佢睇唔順眼就會攪到人地雞毛鴨血, 不得安寧, 因此人人都唔敢得罪佢。有一次佢見到街上一個美女, 色心頓起, 想強拉佢來做四房, 個女仔誓死不從, 竟然跳海死左。個女仔親生爸爸得佢一粒女, 老婆一早死左, 孤苦伶仃, 最錫就係個女, 點知就咁死左, 當然就好唔忿氣走去報官啦, 但係d官點會幫d平民? 緊係幫有錢人啦, 有錢犯法不嬲都無罪o既。於是佢就自己走去楊家大宅去鬧事。佢唔去猶自可, 去左仲衰, 本來楊四萬攪唔到佢個女已經好唔老黎, 而家佢仲要找上門攪事, 佢即時叫d家丁捉左佢, 然後帶左佢去當時仲好偏僻噶"赤枉"(當時並唔係叫赤柱); 動用私刑。古時有炮烙, 佢竟然有樣學樣, 將條金屬枉燒紅左就將果個可憐噶爸爸推埋去, 好快佢就被折騰死左...紙始終包唔住火, 雖然地方偏僻, 但係件事始終傳左出來, 死左人官府都唔敢唔做野, 結果都拉左個楊四萬。而人們知道左件事之後, 由於楊四萬勢力猶在, 大家都係敢怒不敢言, 於是就將果個動用私刑噶地方叫做"赤柱"(燒紅左噶金屬柱咁解), 紀念呢段可歌可泣噶慘事。

2. 銅鑼灣 -- 點解呢個地方唔似銅鑼, 又要叫銅鑼灣呢? 話說香港以前係漁村就係人都知啦, 而當時香港有好多唔同噶"原住民"係度, 大家都熟悉噶好似"鄧家人", "鶴佬"等等; 而當中有好多都係以漁業維生; 漁民拜神, 好多時都係祈求無風無浪, 好似天后, 或者好似澳門噶媽閣咁, 都係一d人們拜來祈求出海平安噶神祇。係拜神噶儀式入面, 各處鄉村各處例, 而其中一個地方 -- 銅鑼灣, 而家有個避風塘果度, 當時都係漁民聚集噶地方, 係果度噶村民其中一個習俗, 就係每年雨季風季來臨之前(大約5-6月, 實際日期無從稽考了), 要以童男童女去祭祀神明。咁當然唔會好似西遊記咁拿去血祭啦, 但係就要將童男童女(代表仲係貞潔之身)沖乾淨晒個身體之後唔著衫(以最原始噶姿態)咁係祭壇度拜神, 以顯示大家對神明噶虔誠。於是當地被叫做"童裸灣", 後尾呢d咁噶祭祀活動慢慢式微同被取締, 為左遮掩呢d唔太光彩噶過去, 於是取其諧音叫"銅鑼灣"了。

3. 啄啄糖 -- 唔知大家有無食過啄啄糖呢? 而家香港已經好少地方有得賣了。如果大家有睇過電視或者書, 都會話啄啄糖取名噶原因係因為d人賣糖時整出噶聲音而命名, 其實呢d只係d人唔知就隨便理所當然咁講噶解釋, 事實上啄啄糖背後有一個愛情故事。話說以前有個小伙子(姑且又幫佢改個名叫呀右)賣糖為生, 佢平時好鐘意去鑽研一d新款噶糖, 因為一有新奇噶野, 小朋友都會好開心, 而佢亦都會覺得令到人開心係自己噶開心。佢有個青梅竹馬噶女仔朋友(叫呀花啦), 由細玩到大, 亦都好喜歡對方, 認定左對方為終生伴侶。有一次呀右研究到一種好特別噶糖(亦即係而家噶啄啄糖), 佢知道一定會好多人鐘意食, 好開心, 情不自禁就攬住左呀花就咀左落去, 大家都知啦, 當時社會比較保守, 唔好話咀啦連攬都好少有噶, 不過果一刻太開心太情不自禁先會咁o既。佢地為左紀念呢一次世紀錫錫, 就叫果隻糖做"啄啄糖"(好似雀仔啄野咁, 大家互相"啄"對方)。以前唔興自由戀愛, 婚嫁之事不嬲都係媒人介紹, 呀爸呀媽首肯就成事。呢d老掉牙噶故仔千篇一律, 大家都聽唔少。不過最後佢地係成功終成眷屬, 可喜可賀, 可喜可賀。

4. 鱷魚恤 -- 唔知大家知唔知鱷魚恤係點起家噶呢? 話說呢個香港噶傳統噶品牌, 當年創辦人(唔撻佢朵啦)係白手興家, 由一間山寨廠做起噶。要白手興家並唔係人人做到, 一定要智勇雙全同有無限噶毅力再加d運氣先可以做到。當年其實佢本來都無諗住會發達, 只係諗住同佢喜歡噶女仔一齊安安穩穩咁結婚生子過人世, 點知個女仔呀媽後尾竟然嫌佢窮, 將個女嫁左比個有錢人仲去埋外國。佢帶住無限噶悲傷發奮圖強, 唔可以衰比人睇! 因為個女仔個名叫"樂如"(音樂噶樂), 於是佢將個品牌改左做佢個名噶諧音 -- "鱷魚恤", 仲好成功添!

5. 麥當勞 -- 唔講大家唔知, 其實麥當勞噶發源地係香港。當時有一個目光好遠大噶餐廳老闆, 睇出左"快餐"市場噶潛力, 於是係香港某地開左一間好新式噶快餐店, 名叫"牡丹樓", 入面d食物都係唔使開鍋蒸炒煮, 只係用麵包夾唔同噶肉同埋炸下薯條加埋飲品就做到個餐, 方便又快捷又慳水慳力。後來有外國投資者見到呢個係一個可以發大來做噶投資, 於是就搵左佢去傾, 想發大來攪, 於是佢地就合作左來做。為左迎合外國市場, 緊係要改返個西名啦, 牡丹樓係佢心血所在, 佢唔想改名改得太唔同, 於是就叫做"麥當勞", 仲係外國開到成行成市。後尾佢老左無人繼承, 係香港噶"牡丹樓"無左, 反而"麥當勞"仲做到全世界都有, 仲回流返來香港添!

...
...
...
...
...

以上除左開段噶調景嶺同太古係堅野之外, 其他果d全屬吹水, 多謝大家觀賞。請密切留意第二集"香港典故"不定期刊登!!

p.s. 免責聲名: 對於果幾個比我老屈左噶地名同品牌名, 遊戲文章, 純屬虛構, 請大人有大量, 原諒則個。

完