愛K

係人都知我鐘意唱K, 究竟有咩原因呢? 請先聽我講以下幾個故事。

**********

幾十年前, 爺爺係一個於當地出名唱歌好聽噶人, 當佢年輕噶時候, 人稱"靚聲王", 勁過張偉文, 果時佢並無諗住做歌星, 只係唱比自己噶朋友、同鄉聽, 後尾佢去左菲律賓, 都一樣令當地人聽到如沐春風咁, 美名遠播。

就係佢返來香港之後噶某一個年頭, 某組織舉行左一個歌唱大賽, 本來佢都無諗住參賽, 但係身邊噶親友甚至住係附近噶鄰居同鄉等人都鼓勵佢參加, 希望佢可以將佢噶歌聲發揚光大, 溫暖到多d人, 帶比多d人快樂, 感動到更多噶人, 而且得到冠軍噶獎金亦可以幫助到屋企噶經濟狀況, 於是佢毅然參加左呢個歌唱比賽。

由於佢把聲實在太靚, 加上佢多年係人前唱歌噶經驗, 由初賽到進入決賽佢都幾乎係高分過關, 而亦都得到台下觀眾噶欣賞, 堪稱"人氣王"; 到左決賽最後四強, 另外幾位都係唱得好好噶歌手, 唔容許一絲噶錯失, 但係竟然係最後一首歌, 係一粒高音位度...就係果一粒高音衰左! 全場都呆左! 但係比賽係殘酷噶, 並唔只係睇平時噶水準, 臨場發揮都好重要, 結果, 佢只係拿到第二名。排名、獎金並唔重要, 佢只係對自己失望, 認為自己處理得唔好, 而呢一次比賽噶失誤, 令佢遺恨終生, 耿耿於懷, 亦令佢意志消沉, 從此唔再唱歌...

呢件事從來都無人講過, 我地亦無人知情(知情者又無講); 本來我呀爸都係唱得之人, 不過爺爺似乎無意要佢繼承呢樣野, 而呀爸亦志不在此, 因此佢從來無參加過咩歌唱比賽; 但係爺爺成日都千叮萬囑我地, 做人做事一定要小心, 準備充足, 如果自己實力不足輸左, 都無問題, 可以再努力, 但係如果因為失手而敗, 果種後悔係好痛苦噶!

就係爺爺臨終噶時候, 佢握住我手, 講出左呢個係佢心中多年噶秘密同遺憾! 佢同我講, 好希望我地可以將唱歌呢樣野繼承落去, 令大家感動, 令更多人覺得舒服, 佢要我以後唱歌, 每一首都用心去唱, 每一首都唔馬虎, 每一首都要好似係決賽咁, 唱到最好! 所以而家噶我, 好鐘意唱K, 仲要係唱好K! 為左爺爺, 我一定要不負爺爺所望, 唱好每一首歌!

**********

係某年某月某日, 年輕噶我愛上左一個女孩 -- 我噶初戀情人; 果時我同佢都好年輕, 大家好o岩傾, 但係一直都無任何非份之想, 大家亦無諗去果邊, 只係每日傾下電話, 間唔時去下街, 相處得好快樂; 係某一日, 我地2個人去左唱K, 本來相安無事, 但係突然唱緊某一首合唱歌時, 大家四目交投, 就係果一剎那, 大家噶心靈都震動左一下; 歌, 繼續唱, 但係心, 已經唔係初初唱果陣時噶心, 大家都意識到, 對方係自己心中已經唔同左, 一直以來噶默契、快樂、所有野, 原來就係感情噶基礎。

係果一次K之後, 由於大家都無愛情噶經驗, 只係感受到少少、少少野, 但已經係佢地心中種下一顆小小噶幼苗。佢地繼續每日傾電話, 間唔時去下街, 繼續相處得好快樂; 終於有一日, 個男孩發覺自己真係愛上左果個女孩, 而有一次佢地又去左唱K。

一直唱, 大家都發揮得淋漓盡致, 好似演唱會咁, 無懈可擊, 突然男孩點左一首情歌, 佢呢首歌唱得特別有感情, 特別好聽, 唱完之後, 大家默默咁對望...正當男孩想講野噶時候, 女孩用手指按住左男孩噶咀, 然後講: 我就快要去美國啦...

大家相對無言, K歌噶音樂繼續響起, 但係只係寂寞咁一直播放, 偏偏無人去唱。埋單之後出到來, 暑假夏天噶一陣驟雨落起來, 男孩撐起把遮遮住身邊無帶遮噶女孩; 遮唔係好大把, 只係一把縮骨遮, 女孩挨近男孩, 挽住從未被女仔挽過噶臂彎; 就算男孩半邊身濕晒, 就算女孩個頭比遮督到, 大家都係一言不發, 默默咁向車站行過去...

"你唱歌好好聽, 好有感情, 你一定要好好地咁繼續唱歌, 我返來之後你一定要唱得更好比我聽呀! 你噶歌聲一定可以感動到更多人, 可以感動到一個真心明白你、了解你、愛你噶女仔噶, 祝你幸福..."

二個星期之後, 女孩遠飛美國, 從此二人就無再見面了...而我亦因此每次唱K都全力以赴, 努力再進一步, 為左可以感動到更多人而唱!

**********

係一個冬天噶晚上, 大肚噶媽媽如常係家中房間休息。突然間, 窗外一陣強光照入來, 只見一個好唔清楚噶人影係外面, 對佢講: 你而家身懷噶BB有一個使命, 好重要噶使命...

媽媽好驚, 偏偏咁o岩屋企無人, 都出左去, 而佢竟然連嗌都嗌唔出聲!果把聲音繼續同佢講野。

"你...你...你係咩來呀!"(佢心入面大聲呼叫)
"你唔使驚...你唔使怕...我係唔會害你噶...你冷靜咁聽我講...
而家係你肚入面噶BB身負一個好重大噶使命, 你一定要陪養佢, 平時比佢聽多d歌, 等佢浸淫係音樂入面, 佢大個左, 要唱好多好聽噶歌比身邊噶人聽, 要去感動好多人噶! 所以你一定要好好保護佢, 係佢成長過程入面去見更多野, 感受更多野, 接觸更多野, 等佢可以對唔同噶歌都有唔同噶感覺, 可以唱得更投入更有感情..."
"......"
"呢個使命就交比你啦! 再見!"
突然再一下強光閃起!

媽媽一覺醒來, 發現原來係南柯一夢, 不過, 本來關左噶窗竟然打開左, 半信半疑之間, 隔離屋收音機響起左一片悠揚噶音樂...

從此, 大肚噶媽媽就成日哼住歌, 而個BB(即是我)出左世後, 亦受家人影響成日聽歌, 到而家仲好鐘意唱歌添! 為左媽媽, 為左夢中果個唔知咩野噶啟示, 我一定要努力咁唱好每一首歌! 令聽到噶人都覺得溫暖, 覺得感動噶!

**********

連我自己都頂唔住, 其實諗到好多點子, 但係已經唔想再打落去, 相信大家都覺得夠了吧? 係咁先! XDD
p.s. 你地唔會真係相信是但一個係真噶嘛?

完