2023回顧

照例回顧一下今年。

1。上年年尾中招，1號出關。阿B經歷過高燒暈低之後，今年年尾又來一嘢叫白車。嚇死人。

2。上年年尾一直延續到年頭嘅Go Healthy活動，應該有令自己健康d同埋輕咗磅。不過去到下半年竟然痛風...不過果排可能真係太辛苦。

3。9月上羽毛球班第一堂就扭親腳，之後就一直纏繞到而家爭dd爭dd。人老咗真係好多嘢差咗。

4。難得join班學新技能，縱然人多練習時間少，但感覺羽毛球level少少哋都有加到經驗值。其實一直都幾鍾意打。

5。阿B今年第一次過關離港，去咗澳門。亦都第一次北上深圳。

6。今年比前幾年睇多咗戲。絕對要提嘅係Slam Dunk，另外飯戲攻心都好like。

7。一直都好少睇劇(不論TVB定Viu定外國劇)。不過今年Netflix嘅幽遊白書真人版，不論大家評價如何，身為幽白鐵粉嘅我，都係睇晒。另外，覺得靈戲逼人幾啱我胃口。

8。動畫一向都係無點睇，今年出咗套高達水星之魔女叫有追。反而翻睇返d漫畫例如鋼鍊etc好正。一堆自己欣賞嘅漫畫動畫化都令人欣慰(但我無睇)。

9。睇咗一堆書。除咗散文仲有d有關心靈修煉嘅，一直覺得自己修為比起以前退步好多。另外，今年翻睇金庸武俠小說新修版完成。

10。阿B無特別咩大嘢講，睇住佢大，越來越曳，希望以後可以聽話返少少唔好激死佢老豆老母，同埋希望佢健健康康。不過2023年最後一日掌握單車技能都幾高興。有少少佢以前B果時睇住佢識轉身識企識行果種感覺。

[圖文不符+文題不符]

究竟咩叫真係覺得自己年紀大咗？

當自己打波後比人wear損嘅地方三幾個禮拜後條瘌仍然未退；

當自己未夠12點已經開始覺得眼瞓然後絕少捱過1點先摺更加唔好講N年無通過頂；

當自己d朋友都開始進入咗其他階段或者甚至進入咗幾次唔同階段(然後自己都一樣)；

當自己發現自己嘅老友們都現出唔後生嘅狀態然後自己都開始出白頭髮；

當自己突然發現，家中長老真係老咗好多，好似一轉眼同一向認知嘅佢哋唔同嘅時候；

然後。

發現有d嘢真係唔同咗。

知道永遠唔會返到轉頭。

只可以希望盡量keep住而家嘅狀態。

好好珍惜現在嘅所有人、事、物。

祝大家新年進步，身體健康。

2024加油。

完