睡前故事

唔知大家細個或者而家對自己小朋友有無聽/講睡前故事嘅習慣呢?

又係網上d研究話, 小朋友由細個培養聽睡前故事嘅習慣, 對以後長大有幫助喎~~網上太多太多資訊, 全部都講到似層層, 其實已經分唔到真假, 不過同小朋友講睡前故事, 起碼可以增加到親子時間, 點都應該係好事來嘅。

不過, 今次唔係想講呢樣嘢。(次次都係文不太對題 xDDD)

話說應該唔係好多人知, 我成日都諗好多故仔, 無論係攪下笑、抒情、恐怖、咸故、打鬥…等等, 經常係腦海中出現好多唔同情節。而係多年之前開始, 諗左一個好龐大嘅長篇故仔(呢個係中學時期開始), 之後keep住有寫低自己嘅idea, 尤其係人物性格、特徵、武功, 各組織架構, 發生咩大事小事, 人物同人物之間互動...等等, 只係寫低呢d資料性嘅野已經有幾萬字, 超級滿足到自己對古代、武俠同打鬥嘅中二病。

不過, 今次都唔係想講呢樣嘢。

又再話說, 其實我個人本質應該係屬於黑暗系。就算平時表現出來幾咁正面撚、on 99、真心膠+假膠, 咩都好, 真正內裡嘅我其實可以好負面好痴線。

原因有好多, 除左因為受人影響, 睇嘢會向唔好果方面諗之外, 由細到大鍾意睇書+上網+同人傾計吸收資訊, 見到呢個世界負面嘅嘢變態嘅嘢好多好多(當然都有好多正面), 各樣見聞+經驗再影響埋本來性格, 令到好多時睇嘢都可以諗到好負面嘅可能性。(好彩, 自己會自動逼自己諗埋正面, 盡量兩方平衡, 起碼令自己理智上知道所有嘢都會有正反兩面兩個可能性。)

不過, 其實都唔止係想講呢樣嘢。

終於算係講到正題。綜合以上, 再加上自己嘅身體+精神, 會發生咩事呢?
1. 由細到大我都唔係訓得好, 同埋唔係容易訓著嘅人(近年好咗d);
2. 由細到大我個腦係好難放空, 係會自動一直諗嘢一直諗嘢一直轉一直轉果d人來;
3. 日頭自己一個人時, 或者唔係訓係度時, 可以做其他嘢分散注意力, 但係訓覺時間只會訓係度, 做唔到第d嘢, 所以係未訓著前個腦就會一直諗嘢;
4. 係夜晚嘅時候, 會特別負面。

咁結果係會點呢? 就係個人會不斷地諗d唔好嘅野, 負面嘅野, 痴線嘢嘅, 變態嘅嘢。唔係去諗人地唔好, 而係諗自己或者呢個世界, 舉d例: 細個可能知識未夠多, 就會因為身體出少少問題而擔心自己會死、讀書/前途無限擔心、其中一樣諗得最多嘅係死亡 – 自己、親人、朋友, 極度害怕失去、完全想像唔到會點, 總之就係諗到一切可能, 然後自己嚇自己(日頭唔會咁架喎), 最後就係諗到自己痴晒線, 好恐怖。

咁同睡前故事有咩關係呢? 自己屋企一向都無呢個習慣。但係係自己懂多少少事以來, 開始夜晚會陷入無限恐怖嘅時候, 就學識左諗故仔。尤其係以前自己失眠得最犀利嘅時候, 開始feel到自己亂諗野嘅時候, 就逼自己轉台, 諗故仔。由之前諗好多細故仔, 慢慢到多年前開始諗果個好長篇嘅故仔。

雖然有時都無用, 會陷入左恐怖嘅無限亂諗野輪迴, 但呢個睡前故事的確救左我唔少次。雖然好無聊, 但係除咗可以令自己唔好係夜晚自己痴線到驚之外, 仲可以自己滿足自己果個故仔添。(近年叫係訓得好d，所以detail故事中盤都未到。不過大綱一早完成)。

完

p.s. 最近都好攰好眼訓, 呢篇嘢一路諗一路打, 可能有d亂, 唔理了。