十一月二十五日 -- 雜記

19/11(一) -- 收工同呀源陳同學同佢女友唱K; 佢女友果然係K迷, 唱得OK呢~ 最好笑係見到陳同學唔係好like唱但係成日夾硬都要拿咪唱, 哈哈; 到11點幾走。

1. 第一次唱"今晚我靚唔靚", 首歌好攪野好正呀~~; 另, 喉嚨真係今非昔比, 而家真係差過以前。

2. Lunch係間餐廳比冷氣吹正個頭一段時間, 頭赤到夜晚。

3. 今日係好友度聽到d野, 雖然都明白同合理, 但係都唔開心。

20/11(二) -- 收工返企食飯; 呢排返企食飯呀媽都好忙無返, 好似好耐無見過佢...=_=

21/11(三) -- 收工返企食飯。

22/11(四) -- 收工同呀儀同路, 陪佢行左轉銀行中心旅行社, 之後join埋o岩o岩收工o既Connie, 行左下In's Point後一齊同路搭MTR各自返企。

23/11(五) -- 連續幾日返企同呀爸食飯, 今晚返企自己煮自己食。

23/11(六) -- 一早終於睇左早場o既寒戰, 之後返企hea一陣再落返去同佢地食BurgerKing; 之後出MK同C行花園街, 預算行完可以再去SSP或新蒲崗, 點知係果度行左3個半鐘, 行完夠鐘返企食飯了。

寒戰 -- 其實我覺得, 人應該要有望向positive o既目光, 睇人、睇野應該去發掘人好o既一面, 睇下"亮點"係邊; 當然都要識得睇"唔好"o既一面, 但當下下都係negative同批評o既時候, 仲有咩意思呢?
而家d人真係唔識得"睇戲", 睇戲其實可以睇o既野有好多, 當然唔係睇親戲都要好似戲評家咁, 要好識睇, 但係而家d人個個都好"懶叻"咁, 只係去搵人地錯處、搵犯駁位, 有錯o既地方就好似自己好叻咁, 就話人地製作唔認真, 又話無腦; 其實要虛構一個故事出來, 要完全合理係好難, 人地拍片仲要顧好多野, 點先拍得鏡頭好睇、剪接、場境, 仲有演員, 好多好多, 一套戲好唔好睇實在唔係只係睇有無犯駁咯。
有無犯駁, 我成日覺得"建基於套戲本身o既設定"有無犯駁, 有d野設定左係咁, 就無謂再諗果樣野係咪錯, 如果係要咁真實, 邊有戲做? 睇新聞啦各位~ (講真, 而家好多新聞都係虛構架啦~)
講返套戲; 劇情來講, 如果大家要提咩保安局警務署長又咩程序唔o岩, 咁我無咩好講啦; 我就順住佢個劇情來睇, 幾乎全場都好緊湊, 拍得好有逼力呀, 尤其係角色之間o既衝突同埋演員o既演技, 真係好正! 唔使多講, 梁家輝o既演出真係壓晒全場, 呀黃其實我覺得唔太需要交到戲(或者已經比梁家輝掩蓋晒了)。
套戲其實唔係一套平時睇開o既警匪片, 最好睇o既場面跟本就唔係果d鎗戰、動作位, 而係某幾個角色之間果d對話同引發出來成套戲o既張力, 仲緊張過睇動作場面呀!
可惜我覺得好多查o既位同個劇情去到後段開始跳得幾快, 無啦啦就話查左d咩出來, 無啦啦就話查到d人係邊, 個結尾又趕趕地突然知道好多野跟住就完左。但係完得來, 其實又仲留左好多問號係度喎, 有少少我覺得美中不足。
好多人都話好明顯有下集, 我又覺得Open End都OK, 佢最尾果一幕, 反而我覺得係想帶出Poice報告, 話執法人員都拿正來做, 反一反, 究竟呀黃會唔會呢? 而所謂最後大佬, 出唔出都無所謂, 因為彭于晏都話左係有好~~~多人, 跟本個setting就係呢個鬥爭係沒完沒了o既(最合理o既答案當然係梁家輝係最後大佬跟住出下集啦)。
講真, 單以佢拍到全場緊湊同d演員o既演技, 仲有前半場o既懸疑感, 我都覺得呢套係一套好睇o既戲了; 瑕疵、不足之處當然有, 但係瑕不掩瑜, 呢套絕對算係一套值得睇o既好戲了~

24/11(日) -- Lunch同呀哥食飯, 下午自己係企hea一輪執野同打機, 之後出新蒲崗Mikiki同C睇佢鍾意o既Little Twin Star後食埋飯返企。

4. 有時行開街真係無啦啦會睇到朋友鍾意o既野, 禮物唔使一定係要送果時送o既, 有o岩先送, 遲左幾多都無所謂啦~~

來緊:
26/11(一) -- 進進生日飯
28/11(三) -- 中學同學飯
30/11(五) -- 放假半日同八婆行街
2/12(日) -- Man婚禮

完