感恩

最近做野, 又遇到一個"開心"o既人。先講下個人: 嚴格來講佢係一個婆婆來o既, 已經七十幾歲。不過佢o既狀態同面上o既痕跡, 睇落最多只係五十幾, keep得勁好。同佢傾偈, 會覺得佢好斯文好有氣質, 好有修養。閒談之間, 真係覺得佢係果種樂天知命, 唔會好強求好多野, 隨遇而安o既人。好明顯係心境開心酬令自己身體狀態keep住好好。

自己做左咁多年野, 其實一直都有遇到呢種人, 而每逢見到呢種人, 都會令我有深刻o既感受, 亦都一直影響住我自己做人o既方向。亦幸而我比起好多人, 都係比較可以用呢一種心態去生活。

我覺得而家o既香港人(其他地方唔知啦, 不過我覺得係世界, 或者起碼係中國人o既發展方向)愈來愈物質化、勢利、負面化。因為"商人"o既關係, 而家所有商店、服務...總之係要來賺錢o既野, 都一定係要賺到盡, 盡量比minimum o既野比消費者; 而消費者、平民、打工仔...等等所有人, 而家已經慣左有著數一定要拿、走捷徑、賺盡, 個心態係"拿唔盡就等於蝕左"。

當然我無任何o既位置同身份去話人不是、去話人o既人生觀同睇法唔o岩。不過我真係覺得咁o既風氣好差, 咁樣落去只係累鬥累, 最後除左本身好有錢果d人之外, 對其他所有人都無好處。社會愈來愈唔和諧, 有錢人同窮人分化得愈來愈犀利, 而有錢人佔o既比率只係好少。

睇新聞, d輿論對d公眾人物(政治人物又好, 藝人又好)總係鐘意挖d唔好o既野來講。講真有咩意思呢? 個個人都有好同唔好, 個個都有做o岩同做錯o既野。果d人真係咁差? 真係只係幾樣錯o既野就証明佢地唔係好人? 証明佢地唔做得野、唔叻? 大家可唔可以睇遠d深入d呢?

所以好多人都話呢個社會愈來愈唔和諧, 成個社會o既氣氛, 不論係上層人士、普通平民、打公仔、輿論所造出來o既新聞, 都係充滿負面。其實呢d野好多都係造出來架咋, "河蟹"並唔完全係一件壞事, 大家生活係呢個充滿怨氣o既城市, 真係會開心咩? 如果話所謂"獨裁"、"不自由"係唔好, 咁大家又點解唔去否定新加坡o既政治呢?

係六七十年代, 香港經濟仲未係咁好o既時候, 好多人都好窮, 但係人同人之間o既關係唔係咁o既。守望相助、鄰里之間o既關係、唔計較、肯蝕底少少幫多d人...呢d野而家真係少見左好多, 但係係以前o既劇集、電影、書本入面, 經常都可以見到呢d情況的。香港都還好, 最可悲可憐可嘆o既係見內地o既文化修養各方面追唔上經濟o既發展(HK都漸漸被影響啦), 人o既質素毫無疑問係愈來愈差。

其實呢樣野, 唔單止係講社會、金錢o既。即使係人與人之間o既關係: 家人、朋友、戀人、夫妻、過路人...咩都好, 都係一樣。寬容d、關心對方體諒對方、唔好過份執著、甚至肯蝕底多少少, 自己同身邊o既人都會舒服好多。不過呢樣野其實要大家一齊做先做到, 只要有人玩爛, 其他人都唔會肯蝕底, 所以好難實行。不過係一個咁o既文化同風氣之下, 要改變真係一件好難o既事...

早排係報紙見到李純恩先生o既一篇文, 講"感恩"。帶出來o既信息都係同一樣野。其實大家應該去睇、去諗自己得到左d咩野, 而唔係失去左d咩野, 更加唔應該諗自己得唔到d咩野。慾望係無止境o既, 成日去諗得唔到d咩野, 只會唔開心。點解唔去睇下自己手頭上有d咩野, 唔去用正面o既角度睇下自己係幾咁值得開心? 人生只得短短幾十年, 日日係度諗住無d咩、唔開心, 就真係蝕啦。物質上蝕少少野, 但係心境上開心好多, 其實先係真正o既"賺"。

愿我身邊o既親人同朋友都開開心心。

完