hea底

明明呢排想作下故仔, 但係最終又係係度敘事。
又係講下自己。

**********

我諗可能都好多朋友會覺得我個人好hea底。今次當係自我辯護, 雖然又可能大家覺得解釋等於掩飾 XDD

唔知點解, 自己慣左個人噶精神、身體、各方面顯示出來都係"輕鬆"噶。就算係以前讀書、讀part time、做野果時, 就來到deadline或者個量好多, 如果一個唔關事噶人經過見到我, 應該都會覺得我好似好hea咁。呢個就係我慣常比人感覺到噶狀態。

以果時讀part time為例, 最後要交dissertation果期, 有一排成日同個fnd一齊漏夜做功課。佢就成日對住部電腦, 諗到諗唔到都係度打份功課(或者抄下人地果d)。我就成日hea住一隻字都唔打, 又行來行去, 攪下呢樣攪下果樣。其實呢, 我個腦係一直諗緊點做, 一直組織緊成個大綱, 前前後後同某d細節。結果呢, 去到唔記得幾點, 佢見佢d字數ahead住我好多就恰左, 我就後尾諗好晒開始做。到佢醒果時, 我就差唔多做完了。

我係有少少個情況要我比幾多我就出幾多力果d傾向(當然, 係講緊一d我唔係喜歡做噶事啦)。

咁喜歡做噶事呢? 呢個motivation就真係會大好~~~多。
同做功課一樣, 當我真係要做果時就會好快咁cher住來做, 唔同噶係, 功課果d要時間蘊釀, 去諗下點做, 同埋培養下情緒。但係自己喜歡噶野呢, 就一來就會好自然咁cher住去。自己噶興趣真係唔使多講啦, 有時一玩、一睇、一咩都好就停唔到落來, 樂此不疲。

另一個motivation係"人"。如果係為左自己喜歡噶人, 或者重要噶人, 個動力都會大到我cher住去。當然啦, 係感覺到對方唔太需要、未太需要我噶時候, 我都好似係hea下hea下咁, 但係如果有事發生, 或者有需要去做某d野時, 我都係會cher住去的。(呢個就係某好友話我會訓身噶原因?)

又舉個例啦。上星期日打波就完全係咁噶情況啦。我個死黨兼best Fnd係星洲返來, 早上一齊打波。我即使平時打波幾落力都好, 有時好累或者痛噶時候, 都會有少少懶懶地, 走少兩步。但係當日同佢同場時, 我係勁超級勤力同cher到盡, 有波無波係手都勁走位單擋入攝, 連波都射準左, 總之打得好開心。所以呢, 尤其我呢d自認重感情噶人來講, 朋友, 或者話"人"對我來講都係好大噶motivation。(當然係度都係想話比大家聽果個best friend之位係無可取替的 XDD)

上年開始, 自己噶動力真係好低。當然其中原因係一個身邊噶長期generator無左。所以亦都係覺得自己愈來愈差噶原因, 個渦輪一直只係靠以前剩餘噶能量同埋間唔時有噶風力來run, 邊度有得好似以前咁有power同埋積極呀...至於對人方面, 仲有一樣野呢, 就係我覺得自己其實真係幾怕醜。平時講笑果d我可以好唔要面, 但係平時我真係我唔懂得表達自己好喜歡家人朋友果種情感。寫blog我不嬲覺得無人睇同埋真係想記底自己諗咩先咩都寫出來, 但係平時相處, 就算對住身邊人, 都會好似好無所謂好hea咁。

由於以上噶各種原因, 希望大家明白平時"覺得"我hea底噶原因, 可以比我係適當時候繼續hea落去。或者希望大家比我呢篇野呃到啦, 哇卡卡卡卡。

完