論"點解咁多人會怕小強"

今日要係度嚴肅咁探討下, 點解咁多人會怕小強(大隻果d)。係世界上, 人類社會有好多唔同地區、種族, 而唔同噶種族、文化都會有唔同噶習慣、喜好......等等。但係係繁榮噶城市入面, 不論中外各地咩文化都好, "小強"都會係某部份人所害怕噶一樣野。點解會發生咁樣噶情況呢? 不論大人、小孩、男人、女人、種族...etc都好, 係驚噶就會好驚, 毫沒來由, 明知自己比佢噶體積大好多, 明知佢點都殺唔死你, 但係就偏偏好驚。點解? 點解~~~!!?

其實, 無論基於生理上、心理上定係精神層面上, 人類會害怕呢樣野絕對係唔出奇噶。且聽我慢慢道來。

小強噶外表, 相信大家都好清楚。如果有心機、有膽色從頭到尾望佢一眼噶話, 你會發現佢一身噶結構係幾咁簡單得來又幾咁完美無瑕: 兩條長長噶觸鬚, 黑色反光噶修長身驅加對翼, 反轉噶話你會見到整齊有致噶幾對腳, 腳上面有刺, 仲有個肚一排排咁, 真係超級核突。此外, 從小學噶課本上都知, 佢地身上、刺上係會有致病噶細菌, 令人更加唔想接觸到佢。基於人對於醜惡噶野同埋疾病噶恐懼, 小強係生理上係會令人類產生極度噶厭惡。

係第一眼見到佢地時, 人類噶士氣值已經有所下降, 覺得厭惡, 唔想掂到佢。但係又點解會驚呢? 驚係從心入面發出的。本來佢咁核突, 已經唔多想理佢, 但係佢最可怕噶地方, 係佢噶"速度"加"未知性"。眾所周知, 一隻大強噶爬行速度同敏捷程度係好高的, 會飛果d更加係防不勝防, 但係佢地同一般動物噶決定性差異並唔係速度, 而係"未知性"。佢地最可怕噶地方, 係連佢地自己都唔知自己想去邊!! 當你想逃走噶時候, 你跟本就估唔到佢去緊邊, 你亦都唔知你逃走噶方向係唔係正確! 呢樣野正正就係佢最可怕之處。佢噶攻擊角度同軌跡係完全"無差別"噶。而人類一向對未知同未能預測噶野會恐懼, 係心理上見到佢地自然負擔同壓力都大增。

不過, 不論係生理定心理上有幾可怕都好, 人類一樣會有好多唔識死噶勇者。但係明明有d人連蛇呀老鼠呀都唔驚, 點解果d人偏偏會驚小強呢? 呢個就要歸咎於最後最決定性噶原因 -- 精神層面噶可怕。而呢一方面更加係牽涉左幾個唔同方面。

係自然界入面, 生物一般都會對於自己"高階"噶生物有恐懼、敬畏甚至係祟拜噶感覺。小強, 係一種存在係世界上最耐、生命力最強之一噶遠古生物; 佢咩都食得落, 唔好話動物植物, 連電線垃圾都可以食落肚, 可以話係生處於食物練噶最頂端; 佢地噶繁殖能力同適應能力極強, 世上無處不在, 唔似大部份生物咁, 只可以適應某種環境; 就憑呢d特質, 已經可以斷定佢地為地球上其中一種"高階"噶生物。

好似老鼠見到貓咁, 根本就無需多講, 一物治一物, 老鼠係完全被剋住一樣; 好多人類見到佢地, 士氣即時跌到"0"。但係小強無論見到咩生物都好, 都係一樣 -- "無懼"。佢地一樣只係會亂衝亂撞, 心情好少少就會向住黑暗噶地方鑽入去, 癲起來分分鐘直接撲入你噶懷裡!!佢地另外一樣強項, 係超強噶"存在感"。就算係我咁大份, 係人群、朋友之間行過, 都未必有人留意到我; 但係佢地一出現, 即時會令人提高警覺, 甚至神經緊張, 牽動到人每一條神經, 可見佢地噶存在感係幾咁強勁! 呢樣野同"體積"無關, 係"氣勢"噶問題。

由此可見, 人類對於小強噶恐懼, 亦都係包括左一種對"高階"(或者同級)生物噶恐懼, 呢樣已經唔止係生理心理, 而係精神層面上噶野了。亦因為咁, 我地可以作出一個結論, 就係小強根本就係位於世界上頂尖噶生物之一, 人類會驚佢絕對係正常噶! 害怕小強無罪!! 胡吼~~~~~~~!!

完