忽略

細個果時, 因為屋企係最細個果個, 亦都同對上一個有咁上下年紀差距, 成日都無咩人理我噶。唔係指起居生活果d, 係當我有問題或者訴求果d, 問都無人應, 有時完全ignore添。一直到而家大個左, 好怕被人忽略, 好怕阻到人, 好怕令人唔開心, 所以會小心奕奕, 甚至揣摩人地噶心意, 然後係人地唔覺之下都會覺得無阻到人, 或者覺得相處得尚算舒服。時間耐左, 已經成為左習慣, 甚至係一種模式。

呢d經驗偏多, 所以一般來講做噶野都ok work的。當然明白, 一變成咁就有好多野主動性唔強, 或者太過小心奕奕就失去自我。不過如果睇得準的話, 一般人地都唔會覺, 同埋都唔會做錯野, 咁都好呀, 起碼唔會令人唔舒服, 就算唔係加分, 都唔係一個扣分噶存在。

唔知點解, 身邊好多朋友(即使係熟噶)都係果種會忽略人噶人, 唔係我要求對方重視自己, 而係真係忽略, 或者可以話基本噶回應都無; 或者係, 如果真係當一個人係朋友, 唔會咁樣忽視對方的。所以慢慢變得愈來愈驚。

講真, 我係好怕比人忽略噶。當然對我講大話會仲大鑊, 但係忽略我我都會好難受。曾幾何時, 比重要噶人對我忽略或者冷言冷語、黑面, 我真係好難受同好驚, 而且呢D野係無從正面去面對的。久而久之, 我只可以選擇唔去面對。由於怕阻到人, 所以唔搵咯。由於怕被忽略, 所以唔搵咯。由於怕黑面同冷言冷語, 所以唔好搵咯。

請別怪我, 對於愈重視、愈想搵噶人, 我有時只會愈來愈唔搵, 甚至愈來愈疏遠。就當我自己被扭曲了吧。

完