十月十日 -- Grease

1. 記: 係回程HK噶飛機上睇左"茱麗葉愛情信箱", 好好睇! 係我鐘意睇果種愛情小品呢! 個"女麻女麻"好交得戲, 好正; 套戲睇到我喊呢~~

2. 天氣轉涼, 真正的我慢慢的被召喚回來了...吧?

4/10(一) -- Lunch同同事唱K, 攪手Sandy竟然唔唱歌, Karen好得意, 好攪笑~~ 收工返企之後出去同TMS KWH舊同事們食飯(聯合三樓), 好耐無見黃Sir呢, 大家傾下聚下舊都幾開心, 估唔到個餐係好多野食噶, 好飽食唔晒, 都算幾抵呢~ 我地13個人叫野食果時仲諗住叫一圍再加幾個送, 點知叫左個片皮鴨再加1888套餐之後, 呀姐叫停我地, 叫我地千祈唔好再叫, 原來真係食唔晒的~~~

5/10(二) -- 收工同同事(Queenie, Penny, Wendy)唱K, 11點島散。Wendy其實都唱得唔錯, 不過細聲左d唔上咪。

3. 又半夜醒, 又發夢, 又哭, 唔知自己係發夢果時定係醒果時, 好辛苦, 好辛苦, 好痛苦...好頭痛。

4. 一拖再拖, 終於報左上堂學車。

5. 以前可以不理自己, 去盡量理人, 照顧人感受, 讓人開心; 現在自己的情緒也控制不住, 已經用了很多精神去控制住了...原諒我很多時也照顧不了大家那麼多的感受...

6. K竟然有Creep唱! 之後必唱選擇! (雖然好難唱)

7. 今晚唱K沒狀態、沒感情、沒感覺。

8. 希望今晚不要再發夢...讓我睡好一點好嗎?

6/10(三) -- 收工返企食飯再去上話劇堂(仲有last三堂了); 之後去TKO MCL買飛, 竟然因為果晚無午夜場, 收左工?! 第一次11點島去到係關門大吉噶 =_=

9. bad mood 延續, 點算好, 好害怕又發癲, 好害怕又緊張, 好害怕又抑鬱。

10. 出左典韋, 出左袁紹, 仲有之前噶袁術、曹操紅蓮裝...全部未買...好貴呀~~

11. 唔經唔覺, 踏入10月, NBA仲有唔夠一個月就開鑼啦~

7/10(四) -- 收工即去買飛, 之後去行左下奇趣, 自己無食野, 睇戲"狄仁傑之通天帝國", 都唔錯, 無咩悶場, 有心睇大概到中盤就估到邊個係真兇, 劉華仍然係劉華, 李冰冰都OK, 令我期待劉嘉玲都幾有霸氣, 都好交到戲, 估唔到噶係內地演員鄧超, 個角色幾特別又幾正, 不過佢係成套戲唯一一個因公徇職噶人, 真係慘, 同埋好似有意攪到佢好似奸噶, 但係原來係個好警察, 玩野? haha。幾鐘意套野有好多中國傳統野, 好似d妖法呀, 假國師呀, 易容術咁(順帶一提, 佢個用針易容抄HunterxHunter?!仲有發覺徐克應該有睇唔少日本、香港漫畫, 有好多位都有呢d感覺); 覺得個鬼市個設計+打鬥同埋大佛內部個設計+打鬥都好正呢, 感覺上如果真係起出來可以做旅遊景點呢~~ 睇完去食翠華再去聰嫂後散。

12. 第二日direct site, 可以遲9個字起身返工, 但係就比平時遲個幾兩個鐘訓覺, 打左第一篇遊記。

8/10(五) -- 本來約左收工同Grace食飯, 不過佢話病左所以cancel; 下午上電腦堂, 5點早收工, 之後返企同老豆食飯。

13. 屋企無咩好做, 終於一口氣打完晒北海道遊記, 趁有心機一次過打, 好累呢, 差唔多成萬字。

9/10(六) -- 一個人的早場: 劍雨, 好睇呢~~ 好耐無睇過比較傳統噶中國武俠片, 武指係董瑋! d打戲都幾好睇, 正呀! 入面自己覺得打鬥位唔算少啦, 再多就太多了, 覺得並不如Alex所講悶悶地; 劇情就中規中矩, 亦唔算難估, 成套戲都好流暢; 講下d演員, 楊紫瓊擔正做女主角, 無咩問題, 覺得個角色唔難發揮; 鄭雨盛大部份時間都唔多需要交戲, 最令我深刻印象係覺得佢都幾靚仔有型, 哈哈; 王學圻當然無咩問題, 不過佢十月圍城多好多機會發揮演技, 呢度算係無咩特別了, 要提一提個角色, 有某方面似龍珠入面紅帶軍噶統帥, 不過係叻好多咯...同埋都有d變態, 作為最後大佬都算係咁; 大S估唔到係做個淫婦+又係變態噶角色, 不過感覺上個角色好似無咩用...同埋個結果...有d估唔到, 不過都好o岩佢呢, 嘿嘿; 余文樂做到佢該做噶事啦, 不過一出佢同佢老婆噶位, 就知佢結果係點了 =_=; 三大殺手有一個係變戲法噶, 幾鐘意個角色, 好有特色呢~~ overall又係幾鐘意套戲好有傳統feel, 今年華語片來講都係最好睇果幾套了(不過so far第一評價都係唐山大地震)。

之後睇Grease!!! 估唔到呀哥之前果晚通知我班到半價飛, $295超抵呀!! lunch同呀哥同民民食榮式燒雞扒, 之後就去睇, 好好睇! 真係無咩好講+唔知點講, 有好多野真係要入場睇, 睇Live先正!! 所以唔多評了! 之後去左行太源街, 有收穫, 跟住同民仔去食"再興", d燒味真係好味呢, 而且又唔貴~~ 由於時間尚早, 同民仔搭電車過北角再搭MTR返企。好耐無搭過電車呢, 而家天氣唔熱, 幾好feel。

返屋企之後仲係好早, 睇鵬鯉借比我噶"志明與春嬌", 想睇呢套戲好耐啦~~ 又係余文樂~~ 一開頭係廳用DVD機睇, 竟然發覺得普通話, 攪到好唔想睇, 明明呢套係好地道噶HK片, d用語仲有粗口都係HK噶嘛, 點可以睇? 但係個劇情睇落幾正幾有feel, 竟然忍唔住睇左一段時間先停; 返入房, 諗諗下用電腦試睇, 又有2條track喎! 就算睇左都用廣東話由頭睇返! 自己都係幾鐘意呢類戲呢, 個劇情唔錯, 同埋我覺得演員們發揮得好好~~ 雖說係好現代感噶故事, 做d野都好日常生活, 低係一眾演員都演得好"真", 我覺得都唔可以話只係做返自己, 而係真係做得唔錯呢。

14. 充實噶一日, 充實過後係...

10/10(日) -- 一早起身諗住打波, 好彩都晏左少少起身, 又磨左陣先諗住出門, 民仔臨時打來通知話落雨打唔到, 於是佢就來我家玩; 食左民仔外賣噶BurgerKing之後就開始打機打Winning, 到3點幾佢就返屋企了; 突然覺得好累好眼訓於是就訓到食晚飯了。食完飯行好耐無去行過噶超市呢~

15. 今天很累很眼訓, hea左一日都好, 好似將之前好多好多噶疲累都引左出來, 又休息返一d咁。

16. 又要準備返工了...

來緊:

11/10(一) -- 收工同Kenneth etc 食飯
13/10(三) -- 話劇
14/10(四) -- 羽毛球@順利
16/10(六) -- 同中學波腳們打室內噶籃球
15-17/10(五至日) -- 晚上上堂學電單車

18/10(一) -- 羽毛球@土瓜灣
19/10(二) -- 同Angel食飯, 佢去完旅行返來, 好似好耐無見過佢了
20/10(三) -- 話劇
22/10(五) -- 睇話劇 w/ Connie etc

25/10(一) -- 羽毛球@九龍灣
30/10(六) -- 草蜢concert, 勁期待!
1/11(一) -- 羽毛球@九龍灣

完