假如我有超能力

好無聊, 諗下d可以超級任up噶野先。

我諗無咩人未試過想像自己有超能力掛?不如講下呢d無聊野。(記得之前有個人好認同我白痴兼無謂, 所以提一提大家如果唔鐘意呢d題目就唔好睇啦)

感覺上呢個題目, 起碼都有多d空間比大家留言掛?

一諗呢個題目, 自己就即刻諗左一種最想要o既能力, 不過都係留返最後先講。咁不如就將諗到o既能力逐樣分析下我自己o既睇法啦。(不過寫寫下同講叮噹o既法寶都唔係差好遠...)

仲有, 大家係睇之前不如諗左自己想要咩能力先, 唔好比我影響。

**********

時間旅行 -- 之前都講過, 唔想去到未來, 人生就係有趣在唔知以後會發生咩事呢; 如果返到過去又唔會影響未來o既都OK。

飛 -- 細細個果時應該好多好多人都會想, 諗落又真係幾自由幾舒暢; 不過而家要小心飛機直昇機遙控飛機仲要小心埋d鏹水。

治癒能力 -- 呢個好好, 有咩受傷病痛只要運用能力就好得返, 幫得人又幫得自己, 唔錯呢。

手腳(或身體其他部份)伸長、變大(altenaltion of body) -- 好似...無咩好明顯o既實質用途...睇下咩部份咯...

千里眼、順風耳 -- 幾乎已經被科技代替(同飛唔同, 自身識飛同埋要乘搭d野來飛個感覺係唔同o既), 唔同o既係如果有呢個能力o既話可以係人地唔知o既情況之下就做呢。

力大無窮 -- 呢個社會都係慢慢走向知識型經濟架啦, 所以得鋪蠻力都發唔到達。除左打人好痛, 打波有著數之外, 去做搬運都好方便。不過, 就算幾大力都好, 都搬唔到座山, 大o既野始終都係靠機器唔靠人力, 所以都係小事來o既...

飛毛腿 -- 基本上同上, 都係係人生o既小處上叻左, 最多拿到奧運金牌。

透視 -- 諗到o既用處就係係賭場賭大細, 同埋可以見到人地o既裸體。

點石成金 -- 好實在, 但係唔多好玩o既能力, 不過有錢就唔會唔好玩; 不過唔可以太大量製造, 個價會跌呢。
Marvelous Super Hero的能力 -- 好多都係戰鬥用, 無咩興趣, 亦無咩好講; 用火用冰果d咪方便d, 唔使加熱、制冷咯。

隱身 -- 其實自身能力無咩提昇, 只係人地見你唔到, 係invisible, 唔係invincible, 即係入唔到o既地方都係入唔到(當然, 個能力運用得好, 都可以o既)。能夠係人地不知不覺做好多野, 但係拿住d野係手時, 會唔會果樣野都會唔見埋先?

變身 -- 就算其他能力幾犀利都好, 永遠用來用去都好單一下, 因此變身(Shapeshifting) -- 最多變, 多姿多釆o既能力, o岩晒水皮人呢! 想變左咩人都得, 只係感受下男同女o既唔同已經爭好遠了。而且"變身"仲包埋可以變成動物, 所以可以感受到好多唔同o既感受呢! 唔需要戰鬥力太勁o既能力, 呢個能力都夠做好多野, 想賺錢又得, 想贏運動打交又得, 想犯法都得添(就算擺明去搶野, 之後變個身就無人認得了, 嘿嘿)。所以如果選一種, 我會選呢種能力呢~~

完

p.s. 請大家suggest下仲有d咩能力, 或者自己想要咩能力啦