八月十七日 -- 明天返新工

1. 12/8(二) -- 收工同胡師父食飯, 無啦啦吳放又來食, 俠士本來話食, 但係因為有事來唔到; 食SSP的強記, 真真正正而家僅存o既大排檔呢! 又係果句, 係SSP浦左咁耐都未去過, 而家終於試過了; 雖然幾出名, 但係唔會貴, 而且都幾好食呢! 值得再食o既地方來o既; 當日得5個人(仲有一個我唔識但係Spenser識o既肥師父)但係叫左8碟野...都OK, 反而個伙計推介o既最大碟又最貴二百幾蚊o既咩所謂石班尾又麻麻地好食又唔抵...(其他都係幾廿蚊咋)

2. 13/8(三) -- 收工返企, 睇左奧運中國女排, 好睇; 不過而家o既中國女排弱過以前了...

3. 14/8(四) -- 係TMS o既last day了; 其實係有唔捨得, 畢竟做左年幾, 有d搭開o既同事都係friend o既...而d呀sir亦都好好, 不過其實自己雖然感情算係豐富o既, 但係從來都唔識表達, 因此表面上都無咩野, 只係講byebye...好彩, 一向拍開夾開o既同事, 好多都早走過我, 而家都係剩返Spenser同呀sir等等少數人係唔捨得o既, d新來o既同事...都係無咩好感...多謝凱琪呢, 送左條tie比我! 收工後同Lands的舊同事Gordon, 俊, Erica, Wendy同Connie(當然係另一個connie, 仲要係我唔識o既)唱K; 估唔到有一間而家暑假都係以unlimit time又唔貴o既, 係寶勒巷o既Neway, d野食都唔太差呢, 不過個電視各方面就好舊, 間野應該已經幾耐又無再裝修過, 所以先會平d又唔限時呢; 當日見返好耐無見o既果堆舊同事, 又順便同Erica慶祝生日; 只係同過俊同Gordon唱過K, 其他人都無, 水準麻麻啦...而且佢地都唔係好好唱...下次都係約食飯好過啦~~~ 不過一齊食下野吹水都好開心, 12點島散。

4. 15/8(五) -- Last Day後休息一天, 係屋企hea足一日, 下午同哥哥(o岩o岩佢又下午off左)睇左2場DVD的concert, 仲砌左新鮮滾熱辣o既SD Gundam Exia, 幾靚呢; 晚上睇左成晚o既奧運,好睇。

5. 16/8(六) -- 又係全日係屋企, 下午民仔上左來, 不過無打機, 全日一齊睇奧運; 晚上佢同G小姐食飯, 我無join, 係屋企睇中國男籃對德國, 都幾好睇呢。

6. 17/8(日) -- 下午民仔又上來, 今次係打機; 5點島去左APM同德福添置返工衫(因為本來唔多夠), 真係好貴呢...未賺錢先使錢...晚上返企食完飯後又睇左成晚奧運。

7. 屋企間房o既室內無線電話真係愈來愈唔掂, 就來頂唔住, 要買過個啦...唔知邊隻好呢?

8. NDS o既十字制又係愈來愈唔掂, 要去整整...

9. 奧運開幕; 之前完全諗住自己唔會點睇, 好似無咩興趣咁, 但係最近睇下睇下發覺好好睇! 仲成日睇添而家! 有好多項目之前覺得唔會好睇o既, 原來都係好睇, 好似舉重射箭果d, 真係估唔到會好睇呢~~ 而自己亦都好自然地支持中國, 當贏左o既時候都會開心會叫, 輸左都會失望; 睇到唔同國家o既運動員各有出色o既表現, 都會覺得好精彩, 好好睇呢! 畢竟係度比賽o既所有運動員, 全部都係世界o既頂尖呀~~當見到佢地贏或者輸o既一刻, 都會好感動, 情緒好受到佢地影響呢! 我呢幾日睇電視o既時間, 係之前幾個月加埋都未必有咁多呢!! 繼續支持奧運!! 順帶一提, 睇奧運係睇亞視好睇d, d評述講得好好多, d o既技術有d咩唔同, 係點樣樣, 好窕唔好等等都講都出來, 唔係9up好勁呀, 好正呀之類呢~~ 徐嘉樂雖然以前睇佢講NBA好似廢廢地, 其實佢真係咩運動都講到, 睇緊o既時候, 唔同項目o既技術重點, 運動員o既背境, 花邊等等真係咩都講到出來, 好犀利呢~ 如果2台都播同一樣野, 睇奧運, 睇亞視!!

10. 睇左2個演唱會; 陳慧嫻o既活出生命2都幾好睇, 雖然佢唱得差過以前(佢claim佢自己演繹方法唔同左), 但係都仍然係好睇, 9成o既歌都係識o既, 耳熟能詳, 選o既歌都好經典好好聽呢~基本上無咩大投訴; 另外睇左之前周慧敏o既concert, 買左返來好耐都未睇; d歌唔係首首熟, 都有d好出名同好聽o既, 不過, 佢始終係偶像派, Live唱得麻麻地...把聲無以前咁雞, 而且d高低音都唱到, 但係把聲發得唔係好constant, 總之就係麻麻地...睇到有d悶...最好睇就係請果d guest:林子祥, 黃凱芹, 邰正宵, 林隆"王旋", 都好正呢!

來緊:
20/8(三) -- 羽毛球活動
搵日同呀強食飯
搵日同Wendy食飯
仍然等呀源打來食飯
澤安K無消息
話劇同學gathering
19/22/29號是但一日同PuzsleWing等人食飯

完