一題二目 -- 好人/Considerate

一個人係唔係好人, 有時真係好難講。

有時覺得好人同幫人係咪好似呃人咁? 有時好似成日幫人, 即使儘力幫人, 但係又唔係成日幫到, 或者有時有心幫, 但係發覺無從入手, 反而未必令人覺得舒服, 咁又叫唔叫幫手?

幫人叫唔叫自私?
有時幫人呢個感覺, 好似好假。唔知點形容。

有時幫人好似都係為左自己咁; 其他人幫人可能想要回報, 有d人幫人係唔使要回報的; 但係後者幫左人之後個心好滿足, 咁樣算唔算係都係有目的咁幫人呢?
諗衰d, 就好似為左自己開心而幫人, 咪好似有目的咯? 有目的而幫人, 咁就好似...有d問題...咁果個人係唔係一個好人呢?

好唔好人, 其實唔係自己定論, 只係人地定論o既一樣野; 即使係一個壞人, 當人人話你係好人o既時候, 你就係好人。

**********

Considerate

一個真係considerate(體貼)的人, 肯定係一個好人。
不過如何能夠做一個體貼的人, 其實好難。

一個真係體貼o既人, 係會顧慮到各方面o既感受同後果, 而作出最恰當o既行為。
例如: 2個人好鐘意傾偈, 但係明明想傾, 但係再傾個世界就會毀滅喎, 咁其中一個就話唔好傾啦。咁樣雖然另外一個想傾偈o既人唔高興, 但係其實觀乎大局, 都係一件"o岩"o既事情。

而"體貼"呢樣野, 似乎係愈熟愈親密o既人身上發現唔到。

大家會對朋友或者同事好, 有時會容忍好多野, 甚至係工作上對客都係咁。但係對死黨, 對家人, 對愛人o既時候, 大家會唔會發覺反而少左呢份"好"同"體貼"呢?
當好多野變成"老奉"(即係奉旨)o既時候, 應該係"體貼"o既野, 變左好似一定要做咁, 而有時應該"體貼"o既時候, 又會完全不理對方, 只係想對方體貼自己。即係對方係唔開心, 唔舒服o既時候, 都要對住你笑, 同你玩, 幫你做家務; 只有你自己先有唔開心, 人地唔可以唔開心; 自己唔開心就要人地tum, 人地唔開心就會令自己唔開心, 所以都唔得。
好多好多野。

自己唔係大晒的。家中老父老母一樣有自己o既經歷, 煩惱同不快, 死黨亦有自己的世界, 工作愛情健康每一樣野都有人煩緊的;
難得有咁親密o既人係身邊(尤其係血脈相連o既親人), 點解大家會對其他人體貼, 而唔對佢對體貼呢?

完