實戰, 學習

由於呢篇野長, 而且個開頭同後面o既內容唔同, 所以係一開波呢一段就講左先, 後面o既內容其實係重點, 前面果d只係前言罷了。

**********

終於完左training, 好多舊人都話係最開心最honeymoon的日子。終於落左村做野, 雖然好多程序都未跟過, 但係其實同我畢業出來第一份工做ｏ既野一樣。當然, 有好多程序上同文件人操作上o既野係唔同, 但係癥結所在、最重點要做o既野其實係一樣的。有d朋友可能未做過, 覺得好似好難, 又或者同我講同以前唔同, 但係我無呢個感覺, 尤其係落左村呢２日, 完全感受返, 初初畢業時做果份工o既感受, 亦都知份工最難handle o既野係咩野。不過有無把握handle, 其實好睇每個村o既情況, 不過自己做過黃大仙下村, 知道都唔會好多村差得過呢度了。(並唔係我自大, 有幾個當年的同事講返, 同埋聽返好多其他人經驗都知, 果度村民的痴線率係好高的; 而且當時我做管理公司, 做夾心人比而家要co-ordinate o既野仲多過而家呢份工２重) 即使唔係handle得好好, 起碼都有個心理準備; 而家會有擔心的只係個exit test。

講左半段返工o既野, 大家以為"實戰"係講緊工作, 咁就錯了。其實都係想講下自己最近o既感受, 當然唔係工作方面啦。

自己每遇到問題或者新事物都儘量會諗會學, 從而得益不少。其實最近雖然最近係blog無寫ｄ咩雜記以外o既野, 但係其實自己都有得著同發現新o既"適合自己人生o既theory(道理)"(唔敢講適合全世界)。

有一樣野係見得愈多人愈感受到o既, 就係正面/負面思想。呢樣野睇落好似好簡單, 實際上解釋都好簡單, 但係影響就好大好大。

第一樣影響的當然就係一個人快樂與否。好多野, 從唔同的角度睇, 真係會有好大分別。從好果方面去睇、去諗, 真係會開心好多, 而且又唔見得會蝕左d咩野。何必要諗得咁差呢? 何況好多時情況唔係想像中咁差。最大的影響, 就係錯誤o既負面觀點會影響一個人對事、物、人的態度, 而一個人o既態度亦絕對會影響整個事、物、人o既情況同環境。憑自己經驗同觀察所得, 從好果方面諗會令人更積極, 對人對事都會好d, 個情況即使本來唔太好, 亦自然會慢慢地好返d (就算於事無補, 但一定好過無); 相反亦然, 會更差, 而且更會惡性循環, 最後只會另一個人愈來愈唔開心, 愈來愈怨天尤人。我唔知點係度舉例同埋令人明白呢種感覺, 但係大家自己想像一個情況, 客觀地諗下用唔同角度o既諗法-->行動-->後果, 應該唔難發覺同明白我所講o既野。

有好多朋友(或者識o既人, 身邊同事等等, 尤其係HK人), 睇野真係好片面同埋好鐘意諗向負面。見到一個陌生人, 或者見到咩情況, 都會留意左唔好o既野先, 唔清楚o既、唔知o既就會估係唔好o既先。因此見到好多人都會對陌生人有bias, 尤其係而家d人膚淺居多, 見到人唔靚仔/靚女就會係心入面踩左人先; 我以前都講過, 第一印象好重要; 亦都由於負面想法影響, 人們就會長期對果d人唔好, 睇到佢地唔好一面, 又係惡性循環落去...

另一方面, 亦都有好多人見到新事物就會首先用"存疑"o既態度, 之後不斷地搵該事物唔o岩、有矛盾o既地方, 搵到之後就一味用果一點來話果樣野唔o岩。其實咁樣一d建設性都無, 有少少矛盾都唔代表係錯。而且呢種態度會令人完全失去左學習能力; 尤其係有d人覺得自己識左好多野, 或者對某d野經驗多, 就覺得自己唔會錯, 接受唔到新事物; 眼見有好多人都不其然地犯左呢個錯誤, 失去好多學到野o既機會; 咁樣有咩好處呢? 只係自己心入面覺得自己叻而已, 但係其實一d得著都無。即使一樣事物有錯有問題, 一樣可以從中學習; 能夠睇到一樣野錯係咩地方, o岩係咩地方. 可以用o既地方, 唔可以用o既地方, 咁已經學到好多野! 所以世上每一樣野同每一件事, 有心諗一諗的話係可以學到好多野的! 當然唔係成日有時間同心機同精神去做呢樣野, 但係我相信好多叻o既人、偉人、出名o既人都係有能力從細微處學到野o既人; 即使好似我地呢d凡夫俗子無呢個能力, 但係起碼都唔好事事"存疑", 又唔去諗就否定掛? 同樣一件事, 要d人影響力, 大家信服o既人講出來先有人信, 但係幾時先可以等到呢d人出來, 又幾時呢d人會出來講呢d野? 可惜因為負面思想o既原因, 好多人亦都係唔接受別人講自己錯o既地方, 尤其係被人指出而唔係自己發覺的時候, 即使心中明白係錯, 都死唔肯認, 更找籍口去將錯o既野合理化...

要再講, 實在有太多野可以講, 亦都有好多情況可以一路發展再講落去, 不過個宗旨同原理都係一樣; 只係希望呢個世界上o既人, 可以帶住正面o既思想來生活, 咁樣互相影響之下大家一定會生活得快樂好多! (大家去d貧窮落後或者郊外o既國家同地區睇睇, 民風淳樸o既地方, 真係好舒服, 無咁多猜疑同麻煩...) (雖然人類最終都係會被呢d"壞"o既野影響, 人為左自己o既利益, 就算唔害人, 都會變得小心同猜忌, 去防人害自己...)

希望自己可以保持住自己而家o既心, 快樂同簡單地生活落去...

可惜每一次寫呢d野, 有心機時都係好夜或好累時, 無組織過一路諗一路打, 打完亦無再check過, 又長, 因此我都預左好難睇得明, 亦都無咩人會睇的了。好彩自己睇返應該會睇得明的...夠了。

完