二零零六年大事回顧

其實打左好幾日, 專登過晒2006年先貼出來; 本來一路仲諗到有野加, 不過無心機, 算了。

**********

套用返電視台年年大事回顧都講o既一句: 2006年對大家來講係有喜有悲(簡直係極度超級廢話)。

由於上年已經開始寫blog, 所以有發生d咩大事都應該寫低左落來, 所以都無咩想再寫。印象中大d o既事都係轉工呀、某人拍拖呀、又某人失戀呀咁, 過下過下又一年, 好又係咁過唔好又係咁過, 都無咩好講。

至於對明年o既希望, 其實都同上年差唔多。對身邊親人、朋友o既祝福, 亦都係上年果d再加上今年新識果d, 不外乎都係工作順利身體健康情路平坦咁上下。不過, 每一個親、友都咁重要, 我係懶, 廢事再個個講一次, 但係係呢度都想特別祝福日安妹妹來年事事順境, 日日開心。

雖然呢篇野好似好廢好頹無咩實質內容, 但係其實係入面包含左我對自己、親友同世界o既祝福架, 千祁唔好睇小同鬧我呀, 哇卡卡卡卡卡卡, 係咁多。

完

同場加映

“二零零六年我的“最”之選舉”

回顧無咩好回顧, 所以攪下花臣, 選一d我而家印象2006年比較特別d o既野。當然, 自己o既一般喜好果d就唔使多講啦, 只係講一d零捨係06年發生o既事或人或物又值得講o既。(當然, 仲包括我而家寫呢個時候記得o既而已, 可能miss左好多野了)

二零零六年點播/點唱率最高歌曲: 草蜢 “我們都是這樣失戀的” (無咩好講, 極愛)
二零零六年最滿意貼文(敘事: 人生取向): "慾, 快樂, 自由 -- 思想空間中雜亂感覺之一角"+"道"+"慾望與自制能力"+"“無”的境界 "+"怪人、豪傑、瘋子、天才 "= 我基本上暫時對人生o既總結同體會。
二零零六年最滿意貼文(敘事: 愛情取向): "味精, 愛情"+"狠批一班無聊為情自傷的人"+"愛情觀"+"洞悉女人心/如何令她愛上你"= 愛情觀+對身邊親友遭遇o既意見同自己o既體會。
二零零六年最滿意貼文(故事): "一分鐘"、"流水無情‧萍踪不定"。一分鐘: 呢個可以話係第二滿意; 幾鐘意分鏡o既感覺, 同埋果種簡單清爽唔會令人太灰o既哀愁。流水無情‧萍踪不定: 叫係最滿意啦, 幾鐘意入面唔同自然景物隱喻左現實o既各類人, 而且亦都係想寫俾身邊o既朋友的。(稻草人有少少2篇野特點加埋, 不過無咁好)
二零零六年出的最想要Gunpla: MG強人(估唔到會出, 不嬲都鐘意o既夢幻機體! 不過又未買...@@)
二零零六年混熟左的朋友: 第一應該係呀Sam啦, 由話劇到而家都年幾, 但係未一年時就同佢同Carmen特別熟, 性格問題, 同呀Sam會熟好多; 另外, 轉左Lands之後, 成班同事都好好玩, 平均係好過BD (BD只有特別幾個熟, 但係有一堆唔熟+玩唔埋), Lands中個個都好玩, 尤其呀亡命八婆君(即係我一到Lands佢就結婚請飲果個)特別夾同熟, 大家係同一類人(做左咁耐人第一次身邊有雙子座又熟o既人, 唔知點解識來識去都識唔到雙子或水皮o既人), 佢又係超癲超講得笑又多野諗多野玩多野講o既人, 大家轉數亦差唔多, 日日超好笑。
二零零六年最Gap朋友: On昇, 戇戇地拍拖, 又散拖, 而且做左一埋好戇的行為, 實在...不知所謂。
二零零六年最奢侈行為: 當然係返鄉下時食o既魚翅鮑魚啦, 再提一提: 係成隻鮑魚叉來食, 成口都係翅。
二零零六年最忙: 一、二月果期, 勁多街去。
二零零六年最大得著: 識多左好多朋友: 話劇初、高班, 打鼓班, 水庫, Lands...好開心, 而且的見識同經歷亦肯定好多到自己o既喜好, 睇法同價值觀等等; 了解左自己好多。
二零零六年自己最騎呢事件: 應該係俾魚骨深喉吧?
二零零六年唔知最咩, 但係又想講的: Payton拿到冠軍指環!!
二零零六年最印象深刻遊記: 係行城門水庫! 無錯, 係果隻我嘰嘰嘰叫佢之後WOW返我果隻馬騮, 同埋俾人搶左野之後wiwiwiwi叫+fing手的馬騮仔, 印象極深, 攪到我而家仲會嘰嘰叫同WOW!
二零零六年最頂唔住o既朋友: 其實一向都唔係呀麥, 係B-E人
二零零六年最期待零七年的TV GAME: 高達無雙! 無錯! 係高達無雙! 好吸引!

純粹隨意諗, 有機會諗到再加。

完