EL SHADDAI

呢排返工好忙, 無時間係公司打野, 返到來又累, 更無時間打。難得今日唔係咁訓到, 打埋先。

************

見到個title, 係咪唔知咩歐洲文, 有d high的感覺呢?
其實呢個應該係菲律賓文來o既, 至於exactly係咩解釋, 其實我都唔知。(好似係Filipino某大組織o既名, 意思為"God Almighty")。

咁點解突然又要講呢?話說我星期日(19/11)第一次去做我份球場助理part time, 當日o既活動就係呢個"EL SHADDAI"。講返d題外話, 果日ｏ既工作先。果日由朝早9點3到夜晚7點3, 基本上由頭企到落尾, 中間有時有15分鐘break, lunch official 有4個字(team leader比半個鐘), 企死我, 而且大部分時間都好悶, 真係好辛苦。我最弱就係腳嘛...

講返個function, 其實係菲律賓人係香港大球場每年一度攪ｏ既宗教聚會。果日10點開始比人入場, 但係實際就唔記得12點定1點先開始, 到最後人數純計過萬人架! 一開頭有一陣唱歌跳舞, 跟住就有一大隊人入場, 仲拿住d類似聖器ｏ既野入來。跟住再一輪集體歌舞(應該都係聖詩來, 不過唔係大家聽開果ｄ咁莊嚴, 幾有特色而且幾好聽呢), 正式開始後, 都係間住有唱歌, 有人講下野(類似係見證或分享)咁。雖然大部分都係講英文, 但係ｄ口音都唔係好易聽到。到左３點島, 就來正場: 有一個人叫Brother Mike(咁上下名), 聽返ｄ前輩講, 係好似偶像咁ｏ既人, 大家都好祟拜好信佢的。甚至會好熱烈, 會叫。到左佢出場, 果然全場歡呼, 氣氛好熱烈!好彩我馬前炮都估佢唔係歌手果ｄ來, 睇來似係一個宗教領袖咁, 果然, 佢應該係類似平時係國際台見到果ｄ宗教節目入面果ｄ神父咁, 好talk得的。

佢又真係好talk得, 由３點島講到散場差唔多6點7-8個字, 有時講得快ｄ聽唔到佢講乜, 好鬼悶, 又好累!對腳極累! 不過似乎d人都好buy佢, 佢又的而且確一路講, ｄ菲傭會聽到笑; 有時又會講到佢地一齊笑一齊歡呼; 有時又會講到佢地喊, 好犀利。佢有時會叫人一齊講句野, 又或者一齊做d咩動作, 大家都會好齊咁一齊做, 勁過明星好演唱會或者talk show。終於等到佢講完(死唔斷氣), d人走埋清場就收工。

講左咁耐, 其實都未講到我想講o既正題。其實今次雖然辛苦, 但係我都有好深o既感受。首先, 係感受到外國人對宗教o既熱誠。平時都知道, 好似菲律賓呢d有國教o既國家大部分人都係信徒, 真係好熱心地信, 唔似HK咁, 完全係有一堆人係hea信, 經過今次之後, 而家見到有d就算有d成日去教會o既朋友, 都覺得佢地同人地差幾皮。呢次活動, 真係比我深深地感到佢地對宗教果種虔誠, 係幾咁有凝聚力; 成萬人係個場入面, 係幾專心咁參與, 係幾守秩序同乾淨, 係幾開心咁笑, 幾開心咁喊, 全場可以一齊唱歌, 一齊跳, 一齊跳舞, 一齊做同一個動作, 好萬人一齊拍手拍到好齊! 好多野, 都另我感動, 係真的感動。

除左呢種"心"同凝聚力之外, 當Brother Mike講野時, 有時聽到佢講到大家離鄉別井來到HK做野, 講佢地離開屋企人遠走他方, 為左錢o既時候, 見到好多人都眼濕濕, 甚至喊。佢地並無"嗚嗚嗚"咁喊出來, 而係打從心底裡覺得傷心, 忍唔住眼淚滲出來, 果種痛苦o既面容, 非我筆墨能形容, 但係見到時真係覺得佢地係有莫大o既悲傷! 當佢地全場一齊雙手舉起祈禱時, 真係震撼到我! 真係好深感受。

可惜, 我無即刻落blog, 好多野可能會唔記得或者淡忘左, 但係我唔會忘記當日佢地帶比我呢d咁特別o既經驗如咁強烈o既感覺。

p.s. 當日d歌都幾好聽, 有一首我仲覺得好好聽添, 當時有衝動想問下人首歌叫咩名, 可惜到最後都無問到, 真係有d唔似我呢。

完