NBA終於來到playoff時候，例牌小講一下。附加賽結果如我所料，可惜傷咗JB同技安，第一round可觀性減...
講東岸先。
塞對熱火 -- 又係黑8熱火對塞軍嘅戲碼，今年塞軍補強咗，不過熱火早幾年不斷爆冷嘅戰績不容忽視...本來。可惜Jimmy Butler傷咗，其實就算佢出到，今年真係好難打低呢隊塞軍...Bam唔係領軍材料，Herro唔搵定，Rozier都出唔到，JJJ好唔錯但係始終係新。塞軍就算自爆，應該都好難輸4場。如果熱火有JB可能都贏到2場，無就...4-1啦。
NY對76人 -- 無咗Randle嘅NY，究竟係會勁咗定弱咗呢？76人本來應該係前4嘅料，不過Embiid傷咗先跌落來，所以呢個2對7種子嘅matchup其實差距唔遠。如果Embiid發揮到，76ers應該係贏嘅，不過可能係4-3。
鹿對溜馬 -- 純睇matchup，鹿贏一班波。雖然換咗個為人詬病嘅教練，不過字母哥+手錶佬並唔係溜馬頂得住嘅組合。正常估鹿4-1，不過計埋自爆，4-2啦。
騎士對魔術 -- 魔術今年終於打出來，之前一直都係天賦高但配合度同成熟度不足，今年終於開始來料。Banchero開始成熟，雖然未擔到大旗，德國內線兄弟發揮穩定。不過，我自己就一直都頗like呢隊騎士，其實早幾年有少少似而家嘅魔術，J Allen+Mobley嘅內線，Garland+Mitchell嘅guard組合，加上已經夾咗一排，如果無傷患實在係唔錯。我估騎士4-2。
西岸就真係大亂鬥了。
OKC對鵝 -- 唉，可惜技安傷咗...如果唔係佢+JV嘅內線組合，雷霆班竹竿人係頂唔住，有機會偷雞的。Ingram係勁但仲未到superstar，McCollum都係2、3哥嘅料。估雷霆4-2啦。
金塊對湖人 -- 上年冠軍金塊今年仍然穩定地強，暗湧係少咗個Bruce Brown。湖人陣容都唔弱，唔知點解好多人會覺得被橫掃4-0。我覺得55湖，應該偷到2場。金塊4-2啦。
灰狼對太陽 -- 雖然太陽係第6，但絕對係強隊...KD雖然年紀大但係仍然無解，Booker我雖然一向唔like但佢爆起來係好難搞，Beal雖然比人話勉強三巨頭，但做3rd option夠有突。相反，今年有機會拿西岸第一嘅木狼，Edwards已經慢慢超越Towns做球隊一哥，Towns仍然soft，唔係差但clutch time唔睇好佢，Gobert+Conley唔錯嘅配搭，不過Gobert有時食餅都食唔到...木狼個問題係，佢哋三分線同內線防守都勁，但偏偏佢哋較弱少少嘅一環係中距離防守，而太陽果幾個痴線佬全部中距離都勁嘅。格食格下，太陽佔優。我估太陽贏4-2。有機會木狼兵敗如山倒。
快艇對小牛 -- 第一圈最好睇一定係呢個matchup了。淨係睇星都夠照。Don77同榮叔進攻真係好強，季中入咗Gafford同埋今年新秀Lively大大加強咗本來弱嘅內線同食餅能力。快艇就難得4星都健康！Harden跌咗Watt，但Kawhi仍然好top，PG仍然攻守兼備，Westbrook打後備提供到活力，照咁睇個陣容係勁嘅，甚至有機會爭冠。呢場真係最難估，雖然老友係Mavs迷，但我估艇贏4-3。
完
0 意見:
張貼留言