上星期借左套笑傲江湖新修版來睇，用左d臨訓前同weekend少少日頭嘅時間睇完。呢套無乜大改動，仍然係金庸武俠小說入面自己比較鍾意嘅一套。
小說入面嘅政治隱喻同埋影射人物都幾明顯，所以我都唔使多講了。主要想講下少少對書中入面某d情節同埋人物嘅感覺。
Point Form散寫下算。所以會有少少雜亂無章。
令狐沖 -- 熟我少少嘅人都知係芸芸金庸武俠小說主角入面我比較鍾意令狐沖。主因係佢果種開放嘅心態同埋熱愛自由嘅性格。係主角群入面佢學武嘅資質肯定算係高果堆，書入面都有明講過，除左好快就get到獨孤九劍之外，都有提過佢記性極好，學琴學其他野都掌握得好快，超勁(不過書入面不斷強調佢唔算識好多字，但係係黑牢入面摸到吸星大法佢又摸到大部份出來。似乎古代人唔多識字都勁過好多而家識字嘅人 xDD)。自己而家同以前心態畢竟多少有d唔同，以前會好欣賞沖哥果種少少狂放嘅性格，而家人大左，睇嘅野感受嘅野多左，背負嘅野多左，自然會無咁認同果種不理後果嘅狂放(或許心底裡都會有呢個諗法，但現實無可能許可吧)。
儀琳係小說入面其實係有少少超現實(應該話係超現實小說之中更加再超現實)。古代社會同文化風氣同而家好唔同，我地唔可以用現代嘅眼光去質疑古代人物(仲要係虛構)嘅行為。佢單純，佢同令狐沖經歷左d野因此愛上佢，佢單相思到幾乎瘋狂，我覺得係絕對有可能發生。而佢嘅超現實，係在於佢太好。佢靚，佢身材好(小說入面有講佢即使著住闊大嘅尼姑袍都可以見到佢曼妙嘅身材，咁應該真係好好身材)，佢性格溫柔善解人意，佢對令狐沖一往情深，佢甚至會希望令狐沖開心而禱告佢可以同盈盈一齊，佢會諗盈盈好聰明可能會管束而令到佢無咁自由，總之實在係太好...
莫大先生同寧中則(我唔會叫岳夫人)相信大部份人都會鍾意嘅，2個人物都描寫得好有氣派同埋令人覺得好型!
岳不群其實寫得幾好，因為由一開始極力描寫到佢係君子到之後原來係偽君子果下反差幾大(雖然由一開始已經滲下滲下有好多人對佢不以為然)，可惜佢雖然武功算勁(之後練左辟邪劍法應該都算排頭幾了)智謀又有d，但係格局真係唔夠大。可能由於本身華山派唔強盛(劍宗氣宗之爭都死好多人)，佢都好難靠門派實力去爭雄。最後只係落得個偽君子之名，做到個五嶽派掌門都唔見得有幾風光。
至於左冷禪，雖然書入面儘量描述到佢武功智謀都係出類拔萃果堆，可惜佢一來出場得後又唔算多，二來佢做親d野最後都比人識破左，最後仲要比岳不群謀算埋，為他人作嫁衣，柒晒。
作為最後大佬候選人，任我行身份太特殊，去到最後蘊釀大決戰，不過佢又係盈盈老豆，而故事都去到最後終盤，估唔到就咁交代佢瓜左，少少草草了事。(不過如果唔係咁都好難收科)。要講書中最強對戰，就真係東方不敗一戰了。幾個當世高手圍攻佢都嬴，實在勁得太癲。而佢變左不男不女嘅描述，又真係好令人印象深刻，好詭異。雖然只係出左一場，但人物塑造真係好成功。
我發覺金庸小說入面都出現左好幾次"小師妹套路"。除左岳靈珊之外，仲有戚芳。另外其實馬春花都有少少類似套路。不過相比之下，後兩者比起岳靈珊有更多可愛之處了。桃谷六仙就由以前到而家都覺得好煩，唯一妙語如珠嘅地方就係五嶽劍派大會，不過其實真正講內容嘅係盈盈。不得不提五霸崗果堆"羣雄"，人地魔教聖姑鍾意人，就算你地明唔明白女兒家心思，都無理由攪到咁大啦~ xDD 好好笑。
唔知有無人留意到，書入而好幾個章節嘅尾，都係令狐沖(因為受傷之後再遇到咩事)暈低之後不醒人事咁完，我覺得幾好笑。除左狄雲之外，佢應該算係另一個大部份時間都係帶嚴重傷患嘅主角 xDD
不得不提，書入面後記金庸先生講嘅野我十分認同，尤其係有關在位者反對者同隱仕嘅言論。
最後都想講下，當年TVB版嘅笑傲江湖選角真係好正好切合書中形象(咁當然無可能全部啦)。呂頌賢嘅瀟灑，王偉嘅假道學，陳鴻烈嘅霸氣，何美鈿嘅楚楚可憐，何寶生嘅富家公子氣質，魯振順最忠於原著嘅表達...etcetc都令我印象好深刻，好正。
完(懶得spell check了)
0 意見:
張貼留言