The First Slam Dunk

睇左Slam Dunk電影版。

首先，作為一個fans同有睇過漫畫嘅人，我就好難用一個唔係/無睇過嘅角度去睇了。

自己就覺得好好睇。

而家網上基本上所有野都會有人鍾意有人反，同埋愈來愈多唔同勢力帶風向，再加上大部份人都係會偏向相信自己本來相信嘅方向，所以網上評論已經愈來愈無咩參考價值，除非你本身好理性同埋好識得過濾資訊。(呢方面唔講太多了)

劇情方面，相信大家都知係打山王了，唔算劇透掛? 不過就用左新嘅角度去睇 -- 全套主要以宮城良田為主軸，所以都算加左少少設定同埋多左少少視覺。網上見人話唔鍾意回憶又話只想睇比賽，我就唔多評論了。每逢有劇有戲都係有一堆人覺得應該點點點，唔合乎佢期望就係唔好睇，無咩討論價值。

雖然本來漫畫都睇到幾乎識背，但係場比賽真係做得好睇。除左好多細節位有表現出來(當然有所取捨都cut左唔少野)，d動作做到好流麗，而且完全呈現返漫畫出來(漫畫本來拿鏡頭已經好有電影感)，再加上節奏做得好好，配樂同音效好做到緊張嘅感覺，所以一直睇都唔覺時間過，比賽最後果分半鐘睇到聲都唔敢出，全場靜晒!

今次睇日文版，由於以前無聽過原配日文，所以話轉晒聲優都無咩感覺。呢套聽返日文嘅原配就一定不錯嘅。聽聞廣東話版搵返以前果班來配好有情懷不過怪怪地，第日有機會二刷試睇。

經典場面幾乎全部出齊，真係睇到毛管棟，超正! 新嘅主題曲其實比起舊嘅更適合呢套電影，亦幾好聽。(當然，齋論好聽同feel始終鍾意舊版啦~~)

總的來講，真係好好睇，好感動。

(寫得好求其)

完