[無責任+非專業叱吒頒獎禮表現評]

 [無責任+非專業叱吒頒獎禮表現評]

(將會又係一路諗一路打，唔好捉我文口唔通順同捉錯字了，應該會打唔少字我唔會proof read了)

話說在頭，一向好鍾意聽歌，更鍾意聽Live。所以逢係歌唱節目尤其有live嘅都會想睇。而每年嘅樂壇頒獎禮更加係會儘量搵機會睇晒。(雖然我對音樂舊無深嘅認識)

一直都唔想成為以前後生果時見到嘅“老屎忽”。永遠沉醉係以前嘅世界，永遠覺得自己行開果套行之有效就唔接受改變，永遠覺得自己果套係啱。其實世界一直係度變，而且因為資訊流通得太快所以變得好快。本來都想講下呢幾年新人新歌，不過離題了，都係講返叱吒。

話說直播果日睇唔晒，不過呢2日上youtube搵返晒d表演片段來睇(official有upload)，所以真係好想講幾句。

首先要講一堆前設先。

現今樂壇，唱功水平一定係差過以前，唔使多討論嘅，跟本當年果堆經驗值同面對嘅環境都唔同。而且而家市場唔同左需求亦唔同左，面對住國際化嘅社會加上本土咁細嘅市場，青黃不接同萎縮係正常不過。不過一句就話未聽過/香港樂壇已死…etc果d可以唔使睇落去，無咩好同你地講。其實經過好多年比“純偶像派”洗禮左之後，近年已經多返好多唔錯嘅音樂人同歌手，亦都見到唔少好有heart嘅歌手，我覺得應該支持下本地嘅音樂嘅。不過以下評論之中講嘅“唱功好壞”，真係唔好同舊年代果d比較，我全部都用返而家average來講(當然最起碼都唔好走音無氣啦)。

另外呢，我發覺而家好多人聽歌原來係唔識分live唔live。最基本應該都知CD版係執過晒d聲掛? 其實even大家睇concert果d碟，或者電視上嘅唔係live嘅歌唱節目，唔多唔少都後期執過，同埋即使現場有tune都唔出奇。但係好多人好似耳仔被縱壞…類似叱吒呢d真係即場live仲要無乜和音無tune無遮無掩嘅演出，好多人就現形炒晒車。係網上見到好多人講excuse話佢地無ear mon無盛，其實無意思嘅。同場比較，點解有d歌手完全無事無問題仲唱得好好? 今次真係可以聽得出實力分野。

以下講返叱吒入面歌手嘅表現(有部份我聽過其他live，不過今次主打講叱吒入面嘅表現)

(排名不分先後)

莫文蔚 – 網上竟然都有彈。其實“呼吸有害”唔易唱，佢handle得好好，明顯有練過。因為無練過有d位係會好易上錯/轉錯聲嘅。更加值得一提嘅係佢表演果段Medley，畢竟係前輩級，不論係唱定台風都表現得好淡定大方，重新編曲加上連接各年嘅金曲都做得好流暢(呢個唔關佢事嘅)，我自己尤其鍾意尾二果首 “我們都是這樣長大的”，佢唱得好正喎。唯一我覺得唔好嘅，係佢把聲有老態，唔係咁“悅耳”了。不過佢一直唔係sell巨肺型，要唱晒十幾分鐘前、後輩嘅歌+有高有低音+記晒歌詞，以佢而家地位(算係咁啦)真係好俾面好有心了。

Per Se (featuring樹妮妮) – 我覺得Per Se嘅音樂幾特別(sorry我無乜音樂造詣，只係識講特別)，一開場2人演奏果段音頭都幾正，但係唱呢，就不敢恭維了(唔多講了)。Serrini近年都多人吹奏，我覺得“唔靚+sell唱功”唔代表唱功真係好勁，雖然佢唔係唱得差，不過我唔係覺得好好。暫時只係覺得佢d歌係幾有趣，走另類路線係得意嘅。

JUDE – 呢個一向都係知唔唱得的了。“零分”係好易上口好易入腦嘅歌，亦都因此傳唱度同cover數量都好高，而且幾乎翻唱嘅人都好過原唱… 當晚佢仲好明顯騰騰震勁緊張，全首歌都唱都唔穩…好大鑊…唱完見佢都知奶野。不過歌曲獎，主要係比首歌嘅…(不如都係比連詩雅唱啦)

陳廣偉 – 網上好多人鬧佢炒車。又有人護航，話佢學緊唱歌同埋轉緊唱腔。佢唱之前亦講左佢湊女辛苦亦都未開聲。好啦。我聽完覺得，佢走果粒音係炒得勁左，咁當然專業歌手真係唔好走音嘅。如果真係有眾多原因，一次半次我覺得可以接受。不過重點係，除左果幾粒音，佢全首歌其他位都好穩d聲好靚，屌打當晚好多歌手喎，咁又點計呢? 我偏向認為佢只係一時炒車only。雖然佢有少少李克勤2.0，唱歌sell技巧多過感情，但係我仍然比佢算高分嘅。

關智斌 – 今次sell佢出道17年第一次拿歌曲獎喎。Well，聽CD版首歌係不錯嘅，Live呢，炒到七彩，算吧啦。唱左17年都係咁就算啦，繼續sell你個樣啦。

馮允謙 – 之前一直對佢無感，係上年開始有聽多左佢d歌同埋有睇過佢演出，覺得原來都唔差喎。當晚演出，係眾多歌手炒車情況下，佢反而算係幾穩定，始終都唱左好幾年儲到d經驗值。前段好似未太入局，到第一次chorus之後開始穩定左落來就一直都不錯了。個人來講對佢評價有提升。

許廷鏗 – 果2屆嘅巨聲幫質素係較高，始終都係過五關斬六將出來，加上跳出comfort zone轉公司之後又有新衝擊，個人認為佢呢2年表現更加成熟。係當晚咁多表現嘅歌手，佢算係top果幾個了。有網上討論話其他歌手炒車因為音響問題因為無ear mon乜乜乜，不如睇下佢唱，再問下點解有d歌手(好似佢咁)係同一setting又無炒車?

MIRROR – 新一代歌手，雖然新(其實都出左道2年)，不過我覺得佢地經歷同表演機會算多，本身有潛力又勤力嘅話，其實係好有前景嘅。“IGNITED”都係走返典型近年男團路線，跳唱+rap，成隊跌舞練得好熟，邊唱邊跳無大問題，rap都無走算係清清楚楚，我覺得成場表演OK喎~ 好完滿又炒熱到氣氛嘅演出。千祈唔好話新一代不如一代丫~~

Dear Jane – 穩穩陣陣，Tim唱歌一直唔算係好top，以前仲有少少甩，近2年已經穩定左好多(雖然Howie寫比佢d歌一直都唔難唱)。Tim有佬味算係顏值擔當又唱得算OK+樂隊重心Howie有料+公司幫佢地包裝同拍MV拍得好，所以成功都非僥倖嘅。

柳應廷 – MIRROR其中一員。現場表現我覺得不過不失啦(穩定度有待改善)。MIRROR成班其實都算唔錯了，又後生又新，有前途。

姜B – 老實講，我呢個年紀嘅大叔，欣賞嘅男性外型都會係man果款，唇紅齒白類呢就唔係我杯茶了。不過靚唔靚仔從來好主觀，亦都跟當時大眾口味，的確而家好多妹妹仔或者呀姨就係鍾意佢呢type喎。講返佢表現，其實佢係表現得好唔錯嘅。以佢出道唔算長時間又咁年輕，雖然上台果時好似呆呆咁，又蝦碌攪笑，但係一唱歌就入晒局，睇得出佢身體語言都投入左係演出度。唱來講呢已經算係咁啦，穩穩陣陣唱晒成首歌無甩轆，對比其他人已經算係唔錯。講真，一個人紅可能有玩gimmick，但係好似佢咁紅就一定佢過人之處同原因嘅。

AGA – 如果以拿女獎嘅standard來講，佢真係唔合格。唱到吊吊下，又無氣，真心覺得佢Live唔掂。其實我一直對某堆歌手都有一個category係“Cam前唱cover唱得好好嘅歌手”。有好多而家所謂歌手，係studio/facebook/IG Live/Busking果類唱就好聽，但上呢d大台真係好唔同，唔得果d就會現形…AGA來講佢寫歌都不錯，可唱可作，不過唱就真係要再努力下了…講真，個人覺得唱來講Gin Lee高佢唔止一班。

二汶 – 呢個唔多講啦，好耐之前已經話佢係被低估嘅歌手，本身把聲好聽又有唱功嘅。雖然當晚表現只算係佢嘅平平。

RB – 又係果句，網上講其他歌因為音響呀Ear Mon呀有問題果d，睇下RB呀6號唱，你就會分別到咩叫唱得咩叫唔唱得。其實同場比較，真係無得避無得賴嘅。又要講多次，當年果期一堆band，我一來最鍾意就已經係RB了。無令我失望呀~~

好眼訓，主觀感覺，係咁多。

完