新喜劇之王

話說在頭, 我對大陸片/大陸演員/大陸味完全無bias, 我係一向完全無反感的, 所以應該算持平。另外, 我亦無當呢套片係所謂"賀歲片"或者"笑片"來睇, 只係想睇一套好戲。好, 咁正式開始講。

網上都幾多人話唔好睇, 我個人來講就覺得未至於唔好睇, 只係普普通通。
睇完, 亦都終於知道問題係邊 -- 編劇同導演(即是星爺)。

成個故仔個套路真係好大路, 亦太平淡。
好多經典電影個故仔都係好老土, 但係一個好編劇同導演係可以令老土都變得好睇(好似新不了情咁), 而呢套片真係太過平鋪直敘, 故事一開始已經知道晒成條故事線點走, 起承轉合好似無左個"轉", 咁好難會令人覺得好睇。

講下故事入面幾條線同人物。
入面除左王寶強同主角父母之外, 另外幾個配角都太過功能性甚至可有可無。
果個所謂"閨密"出來只係為左講人情冷暖, 無鋪排。(出四場, 第一場話佢地係識ge, 第二場無啦啦被選女主角即時變左唔理佢, 第三場嫌佢丟假, 第四場見佢成功即時想hi返佢, 但係全部都係好短幾分鐘, 無鋪排)
果個"賤人男友"鋪左幾幕, 就只係為左鋪女主角最後成功原因。(聽講係內地網紅, 做戲有d誇張, 個角色亦好似需要咁誇張, 但無咩味道)
果個"鍾意主角的有錢男仔"直頭好似可有可無, 出完一輪到最後都無用, 唔知做乜。

王寶強好好戲, 做果個角色都好有說服力, 而佢亦係戲中唯一有鋪排有轉折同埋帶起後面劇情ge角色(因為自己ge轉折而去鼓勵女主角), 已經叫戲中最好果個(然而佢做果d唔知係咪笑位唔好笑, 唯一好笑(亦幾乎係全場唯一笑位)就係嚇鬼果場)。
口不對心父同埋慈母, 角色太typical, 又唔覺好好戲, 果場叫佢去試鏡ge戲應該可以拍得好感動, 但實際麻麻地...浪費左。
至於主角, 睇trailer時覺得好戲亦好有期待, 但係全場戲來睇, 佢個角色好似好需要好多發揮, 但佢真係太自然定係佢根本就真係太過要做一個咖哩啡? 前面大半其實去到尾都只係做一個認真做人ge受害者, 然後故事去到尾, 突然間就"成功"左, 真係好快好突然, 之前一直講主角好努力, 但係又唔係鋪左好多/講左好多野令人覺得佢好好演技喎? 只係話佢遇到一個機會, 跟住最後果幾分鐘就成功左, 下?

呢套片似係星爺"有一個故仔/一個諗頭"就拍呢套片。中心思想似係 -- even係一個小人物, 有實力的話只要努力堅持就可成功, 但係其實成套戲走向只係令人覺得都係要好彩(遇到機會)先可以成功(雖然, 現實係咁!)。
的而且確, 現實又係好多人(其實真係有好多人)發夢又唔係真係有實力(或者係望唔清自己有幾多實力), 一味覺得自己掂, 或者覺得"努力就可以成功", 又或者更甚係覺得"青春要試過要搏過先無悔", 呢d諗法害左幾多人! 現實見到果d成功人士叫人努力, 或者睇戲見人成功, 究竟失敗左/死左幾多人先成功呢? 又有幾多人知呢?

另外, 都有野突兀野要提。就係歌。
成個故事係內地發生、幾乎全部內地演員, 無問題。用陳百強ge"疾風"串連個故仔, 雖然係廣東歌, 但都OK, 因為歌詞relevant。但係個大陸仔唱lum歌lum女主角用"分分鐘需要你"真係勁違和咯~~ 真係好唔夾個背景同d人喎? 佢咁樣係想拉少少香港人票定係想點? 唔得咯~~

總的來講, 我覺得呢套應該叫係一套"小人物勵志片"。但係由於劇情無大轉折, 所謂高潮位(最後一幕試鏡)拍得唔精彩, 而個結局更加太突然, 所以算係強差人意...

完