"有了"有感

生命探測器終於有反應。

終於夠鐘可以講得。
今年年頭開始經常都唔commit一d之後嘅長期活動/體力型活動(難得我又同到好友去秦國)，呢幾個月又好少攪各種飯局/活動，人地叫食飯/唱K又話唔得唔方便唔舒服又盛，其實就係因為呢個原因。結婚頭1、2年係想二人世界，來到第三年開始認真考慮，自己都有d壓力。終於叫可以放下一舊心頭石。

係呢個年代，好多人有好多唔同原因唔想生小朋友。覺得自己未玩夠、自己未夠成熟可以處理、有經濟壓力、社會環境唔好…等等。不過我又咁諗：真係要樣樣嘢都perfect/準備完美先可以生??

人類從來都係好“被動”嘅生物。大自然嘅天氣、地理，人嘅社會、政治、經濟，到到最基本嘅生老病死，其實一般人可以控制嘅真係唔多。咁究竟人生在世係為咗咩? 點解世上要有人類有其他動物有植物…blahblahblah；講到呢d類似人生的意義真係無人答到(除咗宗教)。

老實講，我唔會認為人一定要傳宗接代，亦唔會諗養兒防老，更加唔會為生而生。只不過我覺得唔一定要好好環境、所有嘢都perfect池先可以生得下一代。人類從來都可以/焗住係困境之中生存。係古時戰亂時代甚至饑荒，或者社會動盪時、好多人好窮時，一樣會有好多人生下一代。唔通情況差d就唔好生? 或者，窮人真係唔生得仔? 有錢人生出來嘅一定好? 其實都係睇點教嘅姐(眼見好多有錢嘅都係垃圾吧?)。而家社會、環境真係好差咩? 比起好多好多好多地方，呢度的確唔止唔係唔好，直頭同“差”呢個字沾唔上邊掛?

我覺得好多因素都係要考慮嘅，我亦的確因為好多頭先提過嘅問題而猶疑過、掙扎過。但係最終我都係覺得，除咗一個家庭有下一代嘅感覺會好唔同同埋完滿d之外，多一個小朋友係會令人有好多改變同感受(尤其做產檢見到阿B由粒豆變咗有手有腳同埋聽到佢心跳聲今日隻手仲要比like) -- 人生真係去到另一階段、人需要變得更加成熟同負責、感受到前所未有嘅生命嘅奇妙、好多好唔同好新鮮嘅感受(so99y講嘢1999)。不過，最緊要係要有面對未知挑戰嘅勇氣啊(梁靜茹比嘅?)。

關於養育下一代。點解一定要比“一般人”認為“所謂”最好嘅嘢? 果d係咪真係最好? 人生最緊要係咩? 我認為唔係錢唔係叻唔係所有嘢都要順境。我覺得最緊要嘅係，識分是非、懂得尋找快樂，同埋健健康康。只要有解決難題嘅勇氣，有懂得從萬物中見到美好事物嘅眼光，識得欣賞各種唔同嘅唔同嘅胸襟，其實無論現實環境如何，都可以快樂咁生活。所謂“成功”，從來唔係錢同物質可以衡量到的。(我唔會反對人哋嘅睇法，亦都唔要求其他人一定要認同我。)

老土d講句，真係要多謝所有家人一直以來嘅支持，仲有各方好友嘅關愛，一直以來大家都比咗好多好多support同能量比我哋。我絕對係愛在心裡唔懂開口果種人來。另外亦辛苦老婆，呢幾個月除咗害喜嘅反應令你好唔舒服又長期好攰，仲要我自己都成日唔舒服同好攰，又有時會好似小朋友咁on99。希望陀穩定咗之後會好返d。亦都希望未出世嘅阿B以後亦可以健康快樂，知道爸爸媽媽係滿懷期待咁希望佢嘅出現，聽聽話話，咁就心滿意足了。

仲有多謝有心機由頭睇到呢度嘅人，肯定係真心朋友。🤣🤣 (諗到乜寫乜所以1999，虧你睇得晒)

完