香港典故 之 地鐵站之迷

N年前寫過一篇有關香港野嘅典故, 今次其實唔係講典故, 而係講一d發生緊但係無咩人知嘅野。

****

地鐵站之迷

小強係世上無所不在, 可能係日本少見d, 但係係香港幾乎係四圍都會有, 無論幾乾淨都會無啦啦出現1,2隻。

咁大家又有無留意過, 地鐵站幾乎無點見過小強呢?

係香港地鐵無論入閘後定閘外, 有好多站都有7仔、麵包舖, 甚至有好多賣野食嘅舖頭。

小強固然係無咩野食嘅地方都可以出沒, 如果有食物, 更加好難避免佢地入侵領土。

但係!

地鐵站 -- 香港咁多地鐵站, 又係地底、又有食店, 竟然唔見!

點解呢? 點解呢? 點解呢?

經過明查暗訪, 發現有2個可能性。

可能性1

第一個可能性, 係其實咁多年以來, 其實地鐵公司一直都係個空氣系統落左不為人知嘅特製神經毒氣。

呢隻毒氣嘅目標並唔係小強, 而係人類。

佢會令到人嘅認知能力減退, 然後減弱人嘅思考能力。

點解要咁做?

其實一直以來, 政府、商家最想攸嘅就係集體洗腦, 控制人民思想。咁樣嘅話, 人們就會聽聽話話, 任由政府控制, 而商家佬經常係各樣媒體落廣告, 令人慢慢習慣左消費主義。種種嘅野加埋, 就令好多人變左社畜, 生命一直被消費。

君不見係六、七十年代, d人係有行動力、有主見d, 甚至反政府都會有暴動。

由七、八十年代開始, d人開始溫和、聽話、和諧, 之後變成點就後話不題。

咁同小強有咩關係呢?

我之前有一篇文曾經講過, 小強係係地球上生存好耐、適應力最強嘅生物之一。

佢地本能就對危險嘅野有直覺反應。因此佢地feel到地鐵嘅毒氣, 所以從來都唔會入去地鐵範圍。

(所以更加不得不再承認佢地係地球上高階嘅生物)

由此結論, 地鐵無小強, 並唔係因為人為刻意造成嘅效果, 而係人類陰謀嘅副產品。

可能性2

唔知大家又知唔知, 世界上每日失蹤人數係有好多呢? 其實香港都一直有人失蹤嘅呢? 可能有人會聽過, 係暗網有好多殺人直播, 變態直播, 有唔少無家人無朋友嘅人(甚至有嘅)會比人捉左去做變態野, 滿足有錢人/有權人嘅心理。

直接d講, 自從地鐵落成之後, 簡直係一個好好嘅”秘密基地”。咁龐大嘅地下系統(雖然都有好多架空段, 但已經好足夠), 真係做咩都得。咁又點少得暗網果d野? 不過, 殺人、強姦果d野又點影響到小強呢? 所以今次講嘅唔係果d變態野, 而係一個更強勁嘅 – 魔法陣。

做神秘野又點少得“魔法”? 一直以來地鐵都存在住“魔法”。睇下佢以前個logo就知, 根本係有系統咁排d站出來, 同埋亦都係一個魔法符號。(後期再加好多其他站, 又係另一回事, 此為後話不題)。用魔法、研究魔法, 係現代來講好似天方夜譚, 但其實只係官方隱藏嘅一個事實。超越常理、識嘅人唔多、仲要咁powerful, 你認為會比一般人知咩? 恐慌都似。

至於係地鐵攪緊咩,一般人真係唔會知(包括我), 但係起碼有一樣一定係嘅 – 魔法陣 – 防止探測、隱藏事實、影響生物、控制人心…要做嘅效果可能比神經毒氣更有效。

而當然, 我地世上強勁偉大嘅物種 – 小強 – 自然避之則吉了。

完

後記

好耐無出9up文。

其實一直諗落都有好多野想寫, 今次寫少少先。

來緊仲有香港典故 – 西九龍中心之迷, 敬請期待。

XDDDD