幻想 (Illusion)

(其實中文同英文題目係唔夾o既, 不過其實我講o既野係有少少兩邊踩界)

細個o既時候, 由於各種原因無得睇電視同卡通片(熟人就會知), 加上屋企當時環境並不太好又無幾多玩具同其他野玩, 課餘時間係無咩好攪o既。印象之中除左幾乎逢星期日去呀媽公司打躉同去圖書館之外, 其餘時間就係係屋企唔知做咩。

好多時呀哥會係公共或者學校圖書館借左各類o既書(佢睇d書勁雜, 亦都因此令我睇o既野都好雜)返來, 由於好悶無咩好玩o既關係就會拿來睇。從來都話好多野睇書係好過睇電視, 尤其係故事書(武俠、愛情、科幻...咩都好), 因為從文字描述出來o既野, 仲可以有無限o既想像空間, 而電視(不論真人定卡通都好)都已經規限左好多野, 而且由於資源同現實所限, 有好多野用畫面係呈現唔到o既。再加上導演或演員功力有限(尤其導演), 好多時就變得差過睇書好多。不過, 呢樣野係度不作詳細討論了。

由於第一段所論及o既關係, 自細睇左好多無厘頭九唔搭八o既書, 再加上好多時無咩好玩又無咩好做o既關係, 造就左我經常個腦係度無聊幻想o既習慣了。(無錯係習慣, 並唔係d咩能力, 想得多都唔代表叻o既) 基本上個腦係無時停o既, 除非太?太眼訓, 如果唔係一係就係度諗野, 一係度係度播歌, 總之停唔到落來(所以係煩惱、唔開心o既時候好大鑊, 因為果d諗法non-stop充斥住個腦)。又叉開左話題。

話說, 細個睇埋好多三教九流雜學書籍加上好多小說故事歷史地理哲學之後, 自己都會成日諗埋好多故仔(當然好多都無係blog度寫出來啦, 寫出來果d通常都係果下想寫先會打出來)。就算係街行見到d咩, 都會聯想到一堆可能性/故仔/無謂野, 而細個果時最慘就係會諗到恐怖野, 然後就愈諗愈真愈諗愈唔對路, 自己嚇餐飽, 哈哈哈。

當然地, 對真實o既野都會有呢個情況。對人、對客、對朋友, 我發現人人都自不然去諗好多野, 見到少少野就會去估對方好多野。有d人會諗對方有無錢, 有d人會諗對方做d咩有d咩動機, 有d人會懷疑自己個男/女朋友做左d咩, 最辛苦係有d人諗親都好negative, 人地講多一句/講少一句甚至係facebook多個like少個like都諗好多野, 對住呢d人真係超辛苦。再慘o既係, 有d呢d人仲將自己諗o既當成真, 我覺得已經唔係幻想, 係叫幻覺了, 真可憐。

我覺得一個人要猜度其他人, 一定要係好聰明+見識廣博+好了解對方先至可以估得好準, 有好多時其實唔可以用general去估一個人的, 以我所見, 其實每一個人每一個行為都有好多exceptional case, 根本無野可以以一概全。所以對"人"呢樣野, 我都唔想諗太多。其實"人"對"人", 簡簡單單係最好的, 不過如果"人"唔係咁複雜, 都唔係"人", "人"o既社會都唔係好似而家咁的了。

講講下, 其實已然偏離左一開始想講o既野, 不過邊打邊諗就係咁, 經常離題。but who care? 哇卡卡。

完