自由意志

唔想講政治, 唔係講佔中。又係講下自己好鍾意諗同埋發掘o既人生/人性。(主要係想發牢騷)

其實大家有無諗過, 而家人人口中講o既"自由"係有幾自由? 係咪真係自己o既意志發展出來? 有時我見到d人口口聲聲咩都話"自由"我都幾想笑。係度想舉幾個簡單例子。

不如先講下審美觀呀。
係外國, 好多女仔都係大大隻, 完全唔需要話咩纖體, 一樣好多人覺得靚, 反而唔鍾意瘦到一排骨咁。相反係亞洲尤其中日韓呢d地方, 女仔係要愈瘦愈好。中國唐代果時亦都係時興有肉地, 四大美人o既楊玉環都係肥野一件添。咁其實咩先叫靚? 點解唔同地方審美觀會完全唔同? 因為環境影響。身邊個個人都係咁諗, 或者當地傳媒、廣告、商家如此營造。有無諗過如果從來都無受呢d野影響, 大家會覺得咩野係靚?

而家好多人都鍾意買野、購物, 甚至覺得買貴野、luxury野、夠豪先有優越感。係第三世界、貧窮國家, 根本唔會有呢d野, 有得食有溫飽已經好開心, 點解會有呢d分別? 都係因為傳媒、廣告、商家營造。如果無呢d野, 由細到大都無接觸, 大家會唔會需要luxury、豪o既野?

再數落去, 例如外國o既男女平等, 港式o既男女平等o既唔同; 而家o既"成功"定義係搵幾多錢, 職位有幾高; 由細到大都被人灌輸要"乖", 唔好"犯規"、"犯法"...等等, 其實大家又有無諗過, 所有呢d野都已經影響左人o既思想, 已經唔係完全"自由"呢?

如果真係"自由", 自己想做咩都得, 就會好似動物、原始人咁, 想要o既野就搶、用武力去解決事情、有食野或性慾就盡情地去搵去做去爭, 咁究竟係唔係自由?? 文明又係唔係"自由"o既框框? 我覺得要爭取自由, 首先要認清楚究竟係爭取緊咩o既自由, 唔係盲目將呢樣野放到一個好似好高o既層次就打個旗號出來爭取咯。

根本, 所有大家以為係自己諗o既野, 一早已經被傳統、社會、環境呢d框框限死左。

**********

來到呢個位, 講左唔夠一半想講o既野。

係政治層面, 無論係管治定要鬥爭, 雙方最先想控制o既一定係人o既思想, 所以最先控制o既一定係大眾傳播媒介。唔好睇得自己太高, 其實人係好易被人影響, 三人成虎, 只要有一定人數講同一樣野就會信。而當一個諗法定左型之後, 人就好容易以果個睇法果個角度去睇野, 之後變左只會睇到一樣野only。

而家o既香港就好似有呢個現象。唔知點解咁多人諗野變左死牛一邊頸, 非黑即白。大家係評論佔中、反佔中、警察、政府o既時候, 係同自己唔同意見o既人傾o既時候, 有無睇過晒雙方所見到o既野?

我覺得有d盲目支持佔中o既人話好和平、盲目支持反佔中o既人話佔中者攪事、盲目鬧警察、盲目話政府唔o岩、盲目話泛民勾結外國勢力、盲目話班學生係廢青、盲目話建制派係左膠...etc etc o既人, 真係得啖笑。

佔中咁多人, 大部份都好和平, 但係不乏衝動或攪事o既人, 唔可以話完全有理; 但相反另一邊o既人亦唔可以只執住呢少部份o既人就話所有佔中者係攪事吧?

警方使用比較強力手法清場, 我無從去評論對錯; 照計佔中果班人幾攪事都好, 都尚算和平, 係唔係有需要用到呢d野去清場呢? 但係於"法"來講, 佢地又可以叫合理喎? 我最頂唔順係果班鬧警察o既人, 又話佢地唔o岩, 又話佢地應該抗命, 又話要佢地辭職。究竟佢地知唔知咩叫紀律部隊? 究竟佢地有無係人地立場去諗過? 如果佢地自己係果個位置, 係咪真係可以放棄份工, 唔使養妻活兒? 或者, 係唔係所有警察都係錯? 仲有好多係普通環頭維持緊治安果d又點計? 竟然會有人話唔交稅唔交差餉, 有無病呀?

傳媒本身就係好容易被拿來做政治工具, 係唔係TBB就一定係維穩, 蘋果講o既野就無偏頗呢? 我覺得邊一方都只係報導左佢地想報導o既野出來。要睇要分析, 係咪應該睇晒所有野先好評論呢?

做過政府部門、公營機構, 尤其覺得而家政府係好難做, 做咩都錯(事實上積怨太深, 而且又真係有好多錯果下吹脹), 但係人們係咪應該個別個案去睇下究竟政府做o既野係o岩定錯?

呢段同頭先"自由意志"想講o既, 係其實大家有無諗過自己思想係被人控制左(無論邊一邊都係)?

**********

講完自由, 講民主。
我從來都覺得, 民主唔一定係好事(但我絕對好L憎中共)。

民主一定係d"民"有咁上下質素先可以"主"到事。各位看倌諗下, 以而家中國大陸大部份人o既質素, 要攪民主會攪成點? 講真, 好似美國呢個自稱民主自由o既國家, 根本好多野都唔民主啦, 而且因為d人膠, 有好~~~~~多法例、個案係膠到無輪o既添! 咁大家又覺得香港人有無質素又攪民主呢? 君不見而家呢壇野, 支持佔中o既人, 有d(好彩唔係大部份, 而我身邊識o既人都唔會)人偏激到講少少唔o岩聽o既野就即刻覺得你有問題, 咁都叫自己民主? 比呢d人攪民主, 死硬。

有人話移民, 有人話去新加坡好。其實新加坡係獨裁統治來架喎? 李光耀以前一樣有鈕鏟除異已, 有貪污; 而家係新加坡有好多野都唔做得唔講得添, 不過佢民生、經濟攪得好咋嘛~~~ 又唔見香港有出聲話新加坡唔好??

講到尾, 都係生活。
當然, 生活只係基本需要, 再高d理想係另一層次野, 但今次香港呢個咁大o既運動, 造成o既原因都係因為政府係呢幾年攪到大家頂唔住先會攪到呢個局面。

**********

最後, 我講下自己睇法。
講真我係好不滿香港政府果堆。我堅係覺得政府廢(當然好多野係呀爺決定, 無得揀), 呢幾年攪衰好多民生, 自由行、樓價...各方面唔使我講大把人講得叻過我, 令到民怨好大。今次o既運動, 即使政府做得o岩唔o岩, 應唔應該都好, 都有d野處理失當, 攪到好核突。攪到而家咁耐繼續逃避問題, 擺平唔到件事, 剩係呢樣已經可以話佢廢"
講真, 我覺得政府唔掂, 咁多年來好多人從好多方法途徑表達過, 無點改善, 的確係需要做d野去表達的。
但無論支持定反對佔中都好, 社會聲音、朋友之間有需要非黑即白嗎?

**********

一口氣打左堆野, 手跟唔設個腦, 亦都無返睇執錯字白字, 純粹發牢騷。
我自己只係一介草民, 見識少, 無咩真知灼見, 只係覺得好煩, 發下牢騷。
希望大家都可以開開心心咁生活而已...(雖然攪到咁好難收科了...)

完