浪費...?

我係想講淋冰水, 不過唔係想講ALS, 又唔係想講個活動有無意義, 而係想講下"浪費"。

首先, 我對"淋冰水捐錢"呢個活動係無咩特別positive或者negative感覺, 身邊親人好友都唔係好多人被tag, 所以好多時見到都係明星、明人多過朋友參與。其實如果唔係有呢個活動, 我相信無幾多人會對個病有認識, 亦唔會捐錢去果個機構, 你話個活動本身有無意義, 我覺得佢令多好~~多人知道呢樣野, 某程度上係有意義o既。

至於"淋冰水", 只係一樣gimmick, 一樣引發連帶關係o既活動。要tag人、要被tag、要拍片上網比人睇, 究竟無唔無聊、係咪低能, 見仁見智。不過有咁多明人明星甚至連政客都會參與, 我相信比較多人係覺得"好玩"先會"玩", 就算係"搏出位""搏上鏡"都係因為有一定人數鍾意睇先會可以得到佢要o既效果, 所以個人來講我覺得唔係"無聊低能o既玩意"。(我覺得大部份有份拍片o既人都玩得好開心, 講真, 開心已經好足夠啦)

即使有人覺得個活動好無意義、覺得d人好無聊甚至低能, 我都唔會反駁, 因為幾主觀。我最唔順超、最想講o既, 係果d話"淋冰水係浪費"果堆人。

我想問下, 係呢個物質過份豐富o既社會入面, 點為之浪費? 無錯, 拿左d可以用來飲、用來洗野、用來可以做好多野o既食水同埋冰來淋落自己度, 係浪費左水o既好多功用。但係究竟講o既人有無資格講"浪費"?

我好想問下話"浪費"果班人, 有無食過buffet? 有無開車? 有無截的士? 有無係咁換智能手機? 大家有無"玩"過? 有無去過主題公園玩? 有無打機? 有無做過任何娛樂性o既活動?

你地知唔知buffet、放題浪費左幾多食材? 明明公共交通工具可以一次過承載好多人去大部份地方, 點解要用咁多資源去開架車去目的地而只係得幾個人用? 點解部手機用得1、2年(甚至有好多人唔夠1年)好好地未壞就係咁換? well, 我認為淋一桶冰水o既所謂"浪費"遠遠唔及以上是但一樣野咯。

唔好話淋冰水可以令多左人aware一種疾病或者令人捐錢去有需要o既機構有無"意義"。如果淋一桶冰水落個身度拍埋片可以令到人開心、有人可以搏出位、有人可以呃到like, 同你地去唱K去玩機動遊戲去打機去搭飛機旅行去做無限咁多種娛樂活動有咩分別? 你地去玩, 使用左果d資源就唔係叫浪費? 我真係好想笑。

Sorry, 如果真係有人係呢個世上係無作出過幾多浪費o既, 我會好歡迎佢鬧d人玩淋冰水係浪費。不過, 起碼係香港我唔多相信有幾多呢d人咯。唔該你地收聲啦。

完