風險管理

做每一件事都會有風險, 但係就算讀書曾經讀過呢一個課題, 都唔代表識得真正o既風險管理。

風險管理並唔係要將所有風險減到最低, 而係要有效地降低風險。當然, 唔同o既人唔同o既scenerio能夠承受o既風險程度都唔同, 不過絕對唔係係投放大量o既資源(可能係金錢、時間、人力等等)落去將個risk由5%降到3%。

舉個例, 好似起樓咁, 如果同行有讀過safety o既人都知, 跟本無可能做足safety regulation入面所有安全措施, 一d都唔practical; 如果做足, 都唔知要用多幾倍o既錢或人力。或者用比較生活化o既例子: 係街度隨時都會有花盆係上面跌落來、隨時有車鏟上行人路; 如果要100%安全, 係咪要行人路上面起晒鐵都跌唔穿o既蓋? 路旁起晒貨櫃車都撞唔爆o既欄杆?

用來保護平民同總統當然會唔同, 投放係重要人物上o既資源一定多d, 所以話唔同scenerio會投放唔同資源。不過即使係咁, 所有事情都會仲有一定程度o既風險。真正識得管理風險o既人, 會知道投放幾多資源落去, 去到有幾保險就OK, 而唔係盲目去到最最最安全。講真, 幾保守、幾小心都好, 一定仍然有risk, 放太多無謂o既時間精神人力落去, 非常浪費。

係好多貧窮o既地方, 生活環境惡劣, 唔通又好多人因為危險而死左? 其實長期係惡劣o既環境生活, 反而時常提高警覺性, 發生危險o既機會唔一定會高。曾經有研究指出(唔記得係邊睇, 無得quote返), 自從手機有左handfree之後, 出現汽車交通意外o既數字係比之前無果時高左。see? 好多野唔係單憑想像同一般常識就可以下定論, 如果可以, 世界就唔係咁運轉啦。同樣道理, 個個人o既能力唔同, 有d人唔覺得危險o既野, 唔好逼佢地話係危險o既事, 有時覺得唔安全, 只係因為你能力不足, 唔代表人地做唔到(舉例: 玩Parkour、玩X-game果班人)。

無奈, 唔知由幾時開始, 而家好多人做野不論大小事都極度小心翼翼。小心翼翼唔係問題, 問題在於矯枉過正。於是社會上現左好多正義撚, 極度主觀地將一套野apply晒落所有situation; 出現左好多怪獸家長, 對小朋友過度保護, 令佢地唔識得咩係risk, 大個左盞仲危險。去返工作方面, 咩野都要做到好穩陣, 只會慢, 唔efficient, 太無謂o既穩陣只會浪費左人力物力, 只有無能力、廢柴o既管理階層先會咁做。

我成日都話, 做好人、做壞人都唔緊要, 最緊要唔好蠢。要對住o既蠢人真係好煩好?。
(利申: 雖然我係蠢人但我都唔想對住蠢人咯)

完