拍拖

有時見到好多人拍拖, 會覺得"愛"同"拍拖"係咩呢? 以前自己都有係blog度講過好多呢個話題。不過而家講返少少最近見到同埋感受到噶野。

而家d人點先會"拍拖"呢? 有好多人真係憑少少感覺覺得鍾意就拍拖, 有d人睇條件OK(靚仔/女, 有錢)就拍拖, 有d人覺得悶、想要身邊有個人就拍拖; 而家仲有無人真係覺得拍拖係一件緊要噶事呢? 拍拖除左相愛(有感覺)之外, 仲要係負起一份責任(不論男方定女方都一樣呀, 責任亦都包括左好多野係入面), 會互相扶持, 亦都會因為鍾意對方、緊張對方、掛住對方而做唔同噶野; 就算唔係認定係對方, 都會以長久關係為前提。以上噶野難道係唔o岩, 係不合時宜?

唔係話一定要犧牲d咩野, 或者付出好多野, 但係點解有咁多人真係話拍拖就得個拍字, 或者就只係大家一齊開心下就叫係拍拖呢? 唔好話"為對方付出", 連"被對方倚靠"都唔會(或者好多時係HK都係女仔盲目咩都倚靠個男仔)。(其實拍拖或者兩個人係埋一齊, 不論男定女都會對對方有一定噶倚靠, 唔係話實質上物理上金錢上噶倚靠, 而係精神上噶倚靠; 如果唔係鍾意對方, 想同對方一齊, 想有個安心舒服噶"心靈"可以慰藉, 又點叫"鍾意", 點叫"拍拖"呢?

更多噶時候, 唔好話付出、倚靠、責任, 係無呢d野噶情況之下, 好多人仲要係對對方有"要求"(甚至係好多要求)。不斷地要求對方做或者唔做某d野、達到某d要求、達成某d條件。有好多女性可能要男性做到好多野(係呢度唔再多講, 無幾耐之前提過), 而男性可能就係需要女性噶身體滿足自己慾望。無論咩都好, 總之就係"需要", 以自己為中心(當然, 呢個世界所有人都係以自己為中心, 不過程度上有所不同), 唔會理會對方噶感受, 而係要求對方之餘, 又唔會有義務去令對方開心、滿足(當然, 愛情唔係交換快樂咁簡單)。呢樣野唔止係有關愛情, 對家庭對社會對朋友都一樣, 其實已經係人噶質素問題了。

有權利、無義務之外, 更甚者, 就係諸多要求, 奄尖聲悶, 仲要不斷投訴、怨懟。一段關係攪到咁為咩呢? 連最基本噶支持同開心都無, 我認為實在無咩必要繼續落去。咁樣落去好難可以行到長久, 根本就係浪費緊時間。如果係咁又何必要一齊呢? 唔長久, 其實已經無意思。有d人覺得尋下開心都可以, 唔一定要長久, 但係起碼都要開心呀? 如果連開心都無, 實在無咩理由應該繼續拍拖落去咯。

其實呢個世界無話永遠噶無私奉獻同付出, 即使係父母噶愛幾咁無償都好, 都會希望仔女對自己孝順, 對自己好d。何況係兩個無血緣關係噶人呢? 如果只係得一方付出, 另一方只係不斷咁接收, 無回報、支持或者鼓勵, 會心淡、會疏離、會逃走在所難免。一段努力經營噶關係到左好多年之後都尚且有機會出問題, 何況連一點經營都無噶呢? (不過似乎仍然有好多人生存係呢d fantasy之中, 亦都有好少數噶傻仔/傻女係度傻更更為對方付出, 到最後, 嘿嘿)

有時都不得不成日重覆講一句, 一段關係有問題發生, "一定"雙方都有問題, 但係問題亦都有分嚴重與否; 出左事並唔會只係一個人噶責任, 但係亦都有可能係其中一方要負起比較大部份噶責任。不過既然都出左事, 追究責任又有咩用呢? 又, 如果從一開始已經無負過責任, 咁又有咩好講呢? 拍拖? 分手? 算吧啦。

完

p.s. 而家係公司無時間寫野, 好耐無試過係屋企寫野呢。(除左雜記)