五月二十四日 -- 雜記

有時自己訓住覺講電話, 或者一早有人打來講電話時, 就同呢個樣差唔多...連個電話都似似地...其實有時仲懶, 隻手都唔拿, 就咁"浪"左係塊面度添...

18/5(一) 收工返企, 點知上唔到網, 好難得地砌左模型呢~~ 不過係BB戰士一隻...(仲要係果d透明版, 唔使上色果d...)好過無進展啦~~ (雖然買仲多過砌...)

1. 情牽女人心o既飛到手, d飛點好呢...

2. 冬天又話凍要食多d野保暖, 夏天又話熱要飲凍野食雪糕, 點減肥?

19/5(二) -- 家昇上年plan左11月結婚, 搵左我地幾個中學同學(仲有幾個佢教會o既弟兄)做兄弟, 收工幾個中學同學(馬民猩猩)同佢未婚妻出來去CWB的UCC食飯, 又傾下到時果日o既流程。之後大家吹下水, 始終係最熟o既幾個中學同學呢, 傾得好高興, 而且完全唔覺時間過左, 11點先散呢。

3. 為左令圖片清楚, 暫時轉版面, 直至搵到一個o岩o既位止。

4. 雜記改變下個形式, 同之前有d唔同。

20/5(三) -- 晚上同而家公司但係走左o既同事Pearl媽食飯, 仲有現任同事Charles, Mandy同呀儀, 係MK花滿樓食飯傾偈, 都到10點幾呢。

5. 人總有很多疑心, 想太多, 或者係唔明白、唔清楚o既情況之下亂諗野, 好煩。都係自由最好。

21/5(四) --收工返企。

6. 天氣熱, 又開始有d厚, 於是又自己剪髮, 愈來愈熟手呢, 雖然今次求其左d。本想砌模但係剪完沖完涼上下網, 又泡湯。

22/5(五) -- 收工返企。

7. 收到電話, 姨丈爆血管。肥再加上生活習慣唔好, 真係要小心d呢。希望佢無事啦。

8. 屋企樓下o既運動場開幕, 有條路可以行去坑口, 由於唔使兜, 所以近左呢; 不過, 原來自己都好白痴地會有d唔捨得之前行開好多年果條爛路呢。仲係果條路度見過螢火蟲呢~

9. 屋企附近將會開Jusco超市! 以前係坑口之後執左, 而家估唔到係屋企附近開返, 太好了~~

23/5(六) -- 真真來了, 同佢hea左日呢。多謝果d遲來o既聖誕仲有生日禮物呢。

10. 早上睇左場波; 真係慶幸睇左呢一場可以稱為經典o既一場波呢!經典o既一球!

11. 第一次上釆豐行, 果然平呢。

24/5(日) -- 同澤安白田食lunch, 之後澤安走左。終於買到波鞋, 波鞋街而家幾平呢, 有機會大家去睇下。

12. 早上又睇左場波, 都幾好睇呢。湖人贏波; 雖然而家剩返o既隊都絛話唔鐘意, 但係都係支持Lakers多d呢。

13. 出左孫尚香同徐晃, 前者真係唔多得...

14. 成個星期都係好眼訓, 最終都都無點同同事食飯...本來星期五想食但係佢地去左個好遠又好油又唔多想去o既地方...呢排成日樓下快食完返office訓呢。

15. 明天又要OT, 仲要同老細一齊...

16. 係因為工作, 定係自己都覺得自己o既身體狀態, 精神狀態都差左? 各方面o既修為好似仲差過之前, 心情愈來愈差, 脾氣愈來愈唔好, 忍耐力愈來愈低。唔想再煩了。

17. 不單止情人, 其實只要同人建立左關係, 不論係親人、情人、朋友、定係咩都好, 就會對對方有期望, 一有期望就好麻煩; 為朋友做咁多, 做朋友咁辛苦為左咩? 為左令人開心? 自己開心? 大家都唔開心, 或者單方面唔開心, 都無咩意思; 不論係親人、情人、朋友咩都好, 總之有牽絆就好唔自由, 難怪都有人會六親不認; 咁講落去好似連朋友、親人等等咩野都唔需要了; 好多野好似離一向o既自己愈來愈遠了...我會唔會變到唔再係以前o既自己? 雖然係因為好多唔同o既人o既影響, 但係畢竟改變o既都係自己, 唔會去賴人點對我唔好, 唔支持我, 或者點樣o既。就算以後變左唔再理人, 只係為左自己都係, 都係自己來o既。

18. 受傷害不只單方面會的; 打完人一拳, 其實自己都有受到一定程度o既反震; 無人會鐘意打人的,變態的人例外。

19. 好多野, 唔想打了。

歌:

Carnival- the cardigans

http://www.youtube.com/watch?v=MFIM4HMKNY4

完